أميرة رزق تكتب : تلجاية حاضنة النار

أميرة رزق تكتب : تلجاية حاضنة النار

0
خيطني فيك
غرزة في نسيج القلب
ماتدوبش
ماتتفكش
وأنا أوعدك
هاحفرني فيك وأنقش…دقات ف كل وريد
هاكتبني عالمواعيد
وألف فيك…خطوة في كل مكان
مش شرط شوقي يبان
ولا أندهك وأصرخ…لأني معاك
يكفيني نظرة تطول
ونفصّل المجهول علي مقاسنا
مش محتاجين كاسنا
هاسكر في جفن عنيك وتشربني
نجري في سباق الحب…تغلبني
واكون فرحانة بالمكسب
أرقص ولما أتعب نطير جواك
تبعد…وأستناك بالنظرة والأحضان
يكفيني أعيش وأموت معاك إنسان
عايش بيتنفس
ونعلّى ونأسس
أول مدينة عشق بضلوعنا
الشمس تنسى الكل في طلوعنا
ترميلنا نور وحياة
والليل
يطوّل سهرته ويميل علي الفجر يتأخر
لو قلبك الأخضر ؟يقدر يوقف شيب لأيامي؟!
لو نفسك السكر؟ يستحمل الأوجاع يحليها؟!
هاهديك بذور الروح وترويها
لو أجس أحلامي؟! وأحضنها يوماتي معاك
العقل لما بيدخل الأحلام…القلب بيسيبها
وينط م الشباك
وأنا رامية عقلي قبل ما أدخل لك
محتاجة أكون ضلك في وقت الليل
محتاجة أكون شمسك في كل نهار
وأنا أوعدك بمصير تلجاية حاضنة النار
#تلجاية_حاضنة_النار
#اميرة_رزق

اترك تعليق

يرجي التسجيل لترك تعليقك

شكرا للتعليق