اميرة رزق :تكتب هتلاقي الروح هشه

0

صدقني لو عريت الوش م الضحكة
هتلاقى يُتم وغيم ملوش آخر
هتلاقى كم جروح بيتمشي
هتلاقى روح هشة
خدها الحنين فى مكان وكسرها ميت حتة
لو قلتلى لإمتي؟
هضحك و أخبى الحزن
ليسيبني ويفوتني
لو ليلة صادفت نمت….. صدقنى تعذرني
أنا أصلي نوم العمر ……ضايع وتآه منّى
القهر كوّمني
خلاني إيد ممدودة للي يفوت
جوايا لطشة صوت
بتمني إني أخف و أزوركوا وأغني
بتمني أكون منّي
بصارحني وبلومني
على كل ليل داخل
مربوطة م الكاحل
رغم إن روحي ف ڤالس أو زومبا مجنونة
جوايا شعنونة
لابسة بلاطي الخوف والحكمة والأعراف
مش ذنبي إني بخاف
الله يسامح قفل محطوطلى بإرادتي
أوقات بشيل سيرتي
وأخفيها عن كونكم
بتمشى فى ظنونكم
قدمي تدوب ف الظلم والحيرة من حيرتي
مولودة جوا الهم
والضلمة والتوهة
تسألني بضحك ليه وأنا روحي مندوهة ؟
هضحك بصوت عالي ونكهة خوف أحسن أموت م الحزن
شديت رحالي لكون مش معترف بالحضن
مش معترف بحياة و وجود وحرية
دخلنى ميت غية
هكسرها بجناحى وأطير وأتجنن
جوايا متلون
بس إنتوا شفتوا سواد
خد روحي و عينيا
بصرخ بصوت أموات
على كلي حواليا
ملمسش إلا سراب
جوايا مليون باب تتخض م اللى وراه
لابسة السكوت إياه
دة لإني لاقية صداه وبشوفه و يشوفني
روحك بتخسفني
لكني مش هبهشه
إلا القمر فى سماك
ولا عُمْر جرحي يهون
غير جوا شاش كونك
#هتلاقي_روح_هشه
#اميرة_رزق

اترك تعليق