#انقاذ_حياة سيدة البؤساء

0

 

بقلم : ايمان سلام

اتجوزته هروب من بيتنا كنت عايزة اهرب من بيتنا باي طريقة بسبب ان ابوية كان حابسني لا نزول و لا طلوع و لا شغل اتعرفت عليه عن طريق واحدة صاحبتي و كانت علاقتي بيه تليفون بس اتجوزته.

اول 6 شهور عشت حياة طبيعية جدا كان شغال في دراي كلين بعد كدا اكتشفت انه كان مدمن و بعد 6 شهور رجع للمخدرات لان القرش جري في ايده و بدأ يعرف ستات. راح مشي مع واحدة معاها فلوس كانت بتديله فلوس بالعبيط فرجع للبودرة.

اما اكتشفت علاقته بالست دي و وقفت له و بعدت عنه الفلوس فاتجنن عليا و بقي يضربني و بقي عايز يبيع كل حاجة في البيت باع اوضة النوم غصب عني مبقتش لاقية اكل لانه بطل شغل. اشتغلت كل حاجة اشتغلت في مركز طبي سكرتيرة و اشتغلت في بيوت و اشتغلت جليسة حاولت اقف جنبه عشان يبطل و كان يبطل شوية و بعد كدا يرجع تاني. كنت بيضربني ضرب موت مرة كنت حامل في توأم و اخدت علقة موت و بقي عيل جوا الرحم و عيل برا الرحم و في الاخر الاثنين ماتوا. كنت وقتها يا دوب قربت اكمل 20 سنة فاما كان يتقالي معلش كنت بعدي. كان عندي امل ربنا يهديه فاستلفت فلوس و مضيت علي نفسي ايصالات امانة ب 10 الاف جنيه و عملت جمعية ب 5000 جنيه و فتحت له دكان مكوجي و دراي كلين.

 فتح الدكانة شهرين و بعدها باع كل اللي فيها من ورايا و اخد الفلوس و رجع للادمان و اتقهرت كتير بس عمري ما يأست انه ممكن ينصلح حاله و فعلا رجعت خليته يبطل و حملت منه تاني. فيه موقف عمري ما هنساه روحت استلفت فلوس الولادة و انا داخلة بولد هو كان هو في الحمام بيشم بودرة. تاني يوم الولادة اتخانق معايا لاني اخرته و لحد دلوقتي انا مش فهمة انا اخرته علي ايه ؟؟!!

كنت وقتها بخدم في البيوت و كنت بسيب له البنت و انزل و كان بيجيلي وسواس و انا في الشغل انه ممكن يبيع البنت عشان يشم فافضل اتصل و لو مردش او الاقي التليفون مقفول اروح جري علي البيت علي ملي وشي من الخوف علي البنت بعد شهر من الولادة اكتشفت ان سما بنتي عندها تسمم في الدم و التهاب رئوي حاد جريت بيها لدكتور حسن حشمت قالي دي محتاجة عناية مركزة حالا و لازم تغير دم كانت نسبة الميكروب عندها 97% لفيت بيها علي كل المستشفيات الشاطبي و فوزي معاذ و القباري مفيش مكان.

 اتصلت بالمدام اللي كنت بشتغل عندها و هي اللي اتصرفت و دخلتها عناية خاصة مضيت اقرار علي نفسي لانها ممكن تموت. المدام شالت نص التكلفة و انا بعت حاجات من بيتي و استلفت و سددت النص التاني بعد ما طلعت بنتي من المستشفي كان مطلوب مني حقن و لبن بحوالي 1000 في الاسبوع و جهاز تنفس.

اهل الخير دلوني علي جمعية انقاذ حياة طفل و قالولي الجمعية دي بتاخد حالات الاطفال التقيلة و بتصرف كويس عليهم عند اكبر دكاترة، روحت لهم عشان يساعدوني في علاجها و بالفعل بدأوا معايا رحلة علاج بنتي سما و حولوني لاساتذة كبار و في مستشفيات خاصة لان حالتها كانت لسة صعبة جدا و محتاجة عناية خاصة بعد الولادة صحتي بدأت تروح خالص من البهدلة اللي شوفتها. جالي غضروف في رجلي حولوني لدكتور قال لازم عملية و عملتها في المستشفي الملكي، عمليتي دي اتحددت 3 مرات و تتلغي بسبب اني عندي سيولة و لازم انقل بلازما الجمعية حولتني اجيبها من بنك دم كوم الدكة.

جمعية انقاذ حياة طفل

اخدت البلازما و روحت عشان اعلقها مفيش مستشفي وافقت تعلقهالي عشان انا جيباها من برة و هما عايزين يعلقولي بلازما من عندهم عشان ادفع زيادة روحت الجمعية قلتلهم حولوني علي مستشفي خاص و علقت البلازما و تاني يوم دخلت العمليات.

فضلت علي العكاز 6 شهور و مكنتش قادرة اشتغل راحت الجمعية صرفالي مرتب شهري 1000 جنيه غير علاجي و علاج سما لحد ما اقدر امشي و ارجع اشتغل تاني طبعا بسبب طول مدة التعب المدام اللي بشتغل عندها جابت حد تاني يشتغل بدالي روحت لهم الجمعية حكيت لهم ظروفي الجديدة فقرروا ينزلوني استكشاف لحالات الجمعية بمرتب شهري 1500 غير علاجي و علاج بنتي.

بعد كدا بدأ ضهري يوجعني جدا فحولوني لاستاذ مخ و اعصاب و اتكتبلي علي جلسات اوزون و اخدتها في مركز الحياة و بعدها بدات آلام كتيرة في كل جسمي و بدأت الجمعية رحلة التشخيص الصحيح لحالتي. في البداية اتشخصت سوء تغذية ادت الي ضعف عضلات عام في الجسم كله.

بعد كدا جاتلي مشكلة في المعدة و بدات ارجع دم كتير فحولوني في الجمعية لاستاذ المناظير د عصام بديوي و عملت منظار فاكتشفت ان عندي مرض مناعي اسمه متلازمة كرونز بالقولون و دا مرض مناعي و محتاج علاج بيولوجي كل شهر و نص يتكلف حوالي 12 الف جنيه لمدة 6 شهور و بفضل الله الجمعية مشيت معايا في جرعات العلاج كلها لحد ما خلصت كورس العلاج بتاعي وقتها مكنتش بنزل شغل فكانوا كمان بيساعدوني في الايجار و مصاريف المعيشة مع علاج سما كمان.

كل الوقت دا كان جوزى في المصحة بيتعالج دعم بمعني انه بيتعالج و يشتغل في المكان و في نفس الوقت كانت علاقتي بيه انتهت و مبقاش فيه اي علاقة زوجية بينا من غير طلاق. بعدها بدأ يجيلي نزيف علي الرحم عملت اشعات تبع الجمعية و ظهر ورم و لازم يتم استئصاله. العملية في الوقت دا اتأجلت اكتر من مرة نتيجة ان ظروف الجمعية المادية مكنتش كويسة كان عليهم ديون كتير بسبب حالات حوادث الطرق و حالات العناية فاتأجلت العملية شوية لحد ما قدروا يجمعوا 5000 جنيه حق العملية و دخلت مستشفي سهلا لان كانت حالتي اتأخرت و كان لازم ادخل اعمل استئصال بسرعة و احلل الورم بسرعة.

كان المفروض اني هقعد في المستشفي يومين و اخرج و لكن لان حالتي الصحية كانت تعبانة قعدت في العناية 10 ايام و بالتالي التكلفة وصلت الي 20 الف جنيه زيادة. بعد تحليل العينة عرفت ان عندي كانسر و لازم اخد كيماوي بسرعة و مكنش ينفع استني نفقة الدولة. حولوني في الجمعية لاستاذ اورام حولني لمستشفي خاص و عملي كونسلتو لان عندي امراض كتير و بدات اخد جرعة كيماوي كل اسبوعين بتكلفة 10 الف جنيه للجلسة. فضلت اخد كيماوي لمدة 6 شهور في وسط كل دا كنت بلاقي نفسي في الشغل، كنت على اد ما اقدر انزل ابحاث الحالات و انزل بالحالات مستشفيات و اودي بنتي الحضانة في الجمعية ساعدوني كتير نفسيا اني اتحدي تعبي. و بفضل الله خلصت الكيماوي و الاشعاع و لسة بعافر في الحياه عشان اقف علي رجلي و اربي سما و اوصل بيها لبر الامان.

#جمعية_انقاذ_حياة_طفل

#سيبلك_في_الأرض_علامة_تشهدلك_يوم_القيامة

للتواصل/ ٣٠٩ تقسيم الضرائب خلف جاد سموحة، الاسكندرية

01272222468

01272222463

 

اترك تعليق

يرجي التسجيل لترك تعليقك

شكرا للتعليق