أمنية مجاهد تكتب: رمضان وأيامه

0

أيام رمضان غير كل أيام السنة، أيام مليانة خير وحب وتراحم. بتشوف كل القيم والصفات النبيلة بوضوح شديد فالشارع.

حالة من الصراع علي الخير بتملي نفوس الناس وقلوبها، وروح جميلة من الود لو دامت طول السنة هتفرق كتير فحياتنا.

تبتدي من الناس اللي بتقف توزع مياه أو عصير علي الصايمين، والوجبات اللي البيوت بتطلعها فالشهر الكريم للمحتاجين، وحملات التبرع بالملابس للأطفال، ومحاولة رسم البهجة علي وجوههم.. لحد صبر الناس علي بعضها فالشارع، أو حتي محاولة الصبر اللي بترتبط دايما بكلمة اللهم إني صايم.

لمة العيلة والتجمعات اللي ممكن مبقتش تحصل غير فرمضان وبس، وطبق الحلو اللي طالع نازل بينك وبين جارتك، وروح الحب اللي بنتنفسها طول الشهر الكريم.

تخيل لو الروح الحلوة دي كملت طول السنة، هتلاقي حالة من التكافل الاجتماعي والبيوت اتملت ببركة صلة الأرحام، وروح الحب اللي بين الجار وجاره غطت علي أي مشاحنات أو زعل بسبب حاجه بسيطه.

رمضان بيخلينا نبدأ صفحة جديدة مع نفسنا ومع اللي حوالينا.

استقبلوا الشهر الكريم بحب لنفسكم ولكل الناس .. تجاوزوا الخلاف وجددوا حياة قلوبكم بالتسامح.

رمضان كريم،،،

اترك تعليق