شقـــاوة قلــــــــب بقلم : عادل حراز

0

مولود في فمى خافض لسان حديد(مانع للكلام ) لكن قلبى العنيد طلع شريانه وكتب بيان وزعه على الأخوه العرب والامريكان ..وعلى كافة الانس والجن والنسوان قال فيه : مسير المستخبى يبان !
كل أعمالى الادبيه والغنائية كتبتها بدون اسفاف ولا تدليس ولا تعرييييييي…… ( معلش النت فصل )ولا فكرت اكتب للرئيس قبل الثورة اخترناك ولا حتى هنا وهناك .
ومعرفتش انشر انتاجى علشان معندناش بلكونه والدنيا قعدت مغيمه 8 سنين !!
كملت تعليمى لحد آخر كوبرى سيدى جابر ـ وفجأة ـ لقيت كمين ! سألنى الباش انت مين ؟
قلت له أنا الشعب
قالى : بأمارة ايه ؟
قلت له : حافظ جدول الضرب يابيه
قالى : هو انت لسه فاكر ؟
قلت له : ودى حاجه تتنسى ؟
قالى : ياااه ده كان زمان قوى
قدمت له الشهاده بص فيها بنص عين وزغرلى قائلا:
عاش اللى قال الكلمه بحكمه في الوقت المناسب ( قالها بمنتهى الجديه ) ثم أضاف بسخريه :
بس وانت نازل من على الكوبرى لازم تحاسب !
قلت :آآآآآآآآآآآآه ..جينا للجد
قلبى رفض دفع الحساب .زالامين كتبنى في كشف الحضضور غياب ! والباشا رمانى في البوكس ومشى !
فاتت سنه وأنا على الربابه بأغنى:
تعيشـــــــــــى يامصـــــــــــر
وفى وسط الاغانى طلع المطرب حسن شاكوش وحمو بيكا ومجدى شطه وكزبره وحنجره وهانى شاخر وناس تانيه بوقهم معووووج وشكلهم وحش واساميهم قريبه من اسامى الصرف الصحى قرفت احفظ اى اسم منهم بس كلهم فجأة بقيادة نكيب الموسيخيين غنوا في صوت واحد على طريقة شعبولا هييييييييييييييييه !
قلبى استغل الهيصه وهرب م الكمين وراح اشتغل بوسطجى ومن ساعتها وهو عمال يدق على كل باب في المحروسه ويصرخ بعلو صوته الحيانى :
ياأهل مصر المحروسه امنعوا الكوسه !!!

عادل حراز

اترك تعليق

يرجي التسجيل لترك تعليقك

شكرا للتعليق