طارق عرفه : الجريمة والعقاب فى السوشيال ميديا

 

شهوة السبق …شهوة الخبر …شهوة الكومينت ….شهوة اللايكات …..ماذا يحدث فى المجتمع المصرى ….ماذا جرى للمجتمع المصرى ….لقد اصبت بالذهول التام ليس بسبب جريمة المنصورة التى ذبح الجانى ذبيحته المجنى عليها التى ادعى انه يهيم بها حبا وهو ابعد مايكون عن الحب فانا كرجل قانون اعتاد ومعتاد على مثل هذا النوع من الجرائم ولكن الذهول كان منبعه هؤلاء الذين يقومون بتصوير ام ملتاعه على ابنتها …يصورونها على قبرها ….لا اعلم ولا اعرف كيف يفكر هؤلاء …ماذا استفاد هؤلاء الذين صوروا ام منهارة على قبر ابنتها …أليس للقبر حرمته ….أليس للموت حرمته ….كل هذا من اجل ان نستبق ونجرى نحو الفيس بوك والانستجرام وجميع منافذ السوشيال ميديا ونقوم بانزال اكبر كم من الصور للحصول على تريند او لايكات او كومينتات دون حرص على مشاعر الاخرين طيب ياعمنا انت مش عارف ان تصوير الغير دون اذن منه وتشييره دون اذن منه هو جريمه قانونية اعترفت بها اعلى محكمة فى مصر وهى محكمة النقض …لو مش عارف اعرف وعلشان كده عجبنى اوى ان احد اللاعبين الاجانب عندما علم بمصرى لايعرفه سبه سباب عنصرى قام بمقاضاته ….بل المثير للدهشة ان عوام الناس بجهلهم القانونى يحاولون الادعاء بان هناك نوع من المحاباه للمتهم قاتل زميلته…طيب تساله ليه وازاى ياعمنا …يقولك اصل المتهم هينزل متهم بتهمة القتل مع العمد بالاصرار دون الترصد …طيب ايه المشكله ياعمنا لما انت يا ابوجهل تعرف ان القانون يعطى للقاضى الحق فى ايقاع عقوبه الاعدام شنقا فى القتل العمد مع سبق الاصرار او الترصد….يعنى يافالح مش شرط سبق الاصرار والترصد سويا …لو سبق الاصرار فقط ممكن اعدام ولو ترصد فقط ممكن اعدام ولو الاتنين سوا برضه ممكن اعدام …

طيب ولما شيخ الازهر قال فيما معناه ان الست المحترمه اللى لاتؤذى الاخرين ومش محجبة وتقوم باعمال الخير ممكن تكون افضل عند ربنا من المحجبة التى تؤذى الاخرين بسلوكها …طبعا عتاة التطرف فهموا كلامه اخطا …انت ازاى اساسا تفكر ان تقيم كلام الامام الاكبر شيخ الجامع الازهر اه هو انسان ومش معصوم بس اللى يجيى يقيم حد فى التخصص لازم يبقى فاهم التخصص وليس كل من هب او دب كما يقال يهبد كلمتين او ينشر الخبر منقوصا يكون من حقه التقييم لان التقييم انذاك صادر عن جاهل وانا شخصيا اؤيد الامام الاكبر لان فى النهاية الدين هو الدين المعامله… الحجاب فرض بس ليك وعليك والصلاه وباقى الاركان فرض بس كل نفس بما كسبت رهينه ولكن انا كشخص مستنى سلوكك المنضبط معايا …والله ولطالما شاهدنا باعيينا اناس يدعون الفضيلة وهم ابعد مايكونوا عنها وقاموا بايذاء الاخرين ….طب استفدنا ايه بقى بحجابهم وصلاتهم …ولاحاجه

اريد ان اقول انه ما اكثر الجرائم اللى بنرتكبها على السوشيال ميديا دون ان نشعر واننا نحتاج الى ميثاق اخلاقى قبل ان يكون قانونى فى احترام الناس واحترام الخصوصيات وانه مش علشان نلاقى لايكات على صورة مش لازم الصورة دى تكون على حساب احزان الناس وحياتهم الخاصة واؤيد وبقوة اتجاه المحاكم فى تشديد العقوبات على كل منتهكى خصوصيه الاخرين وياريت ياريت نبطل نعمل اننا خبراء وبنفهم فى كل المجالات الهندسيه والقانونية والاقتصاديه ….لازم نبطل شغل الفهلوة وكله على كله لازم ….مش كده ولا اييييه بصوت الفنان فؤاد المهندس …

بقلم طارق عرفه المحامى بالنقض والمستشار القانونى

التعليقات متوقفه