طارق عرفه يكتب : الصلح مش خير يا حكومة

0

 

 

وبينما كان الرجل وزوجته وابناؤه يتسامرون  ويتناقشون فيما بينهم عن الاستعداد للمصيف  وتقترح الزوجة التوفير تخفيفا للعبء الواقع على الاسرة مثل اى اسرة  وبينما كان الرجل يضع ساقا على ساق ممسكا بسيجارته اذ دق جرس الباب  وكان هذا الحوار الاتى

صاحب البيت :  مين حضرتك

الاخر :  انا مندوب الحى يافندم

صاحب البيت :اهلا وسهلا بس انا والله مسدد رسوم النضافه اجيب لك الوصل

مندوب الادارة : رسوم نظافه ايه يابيه  انت عليك مية وخمسين الف جنيه للحى

صاحب البيت : حى ايه يابنى   انا مالى ومال الحى انا قاعد فى حالى  وبفكر ازاى  هسدد فاتورة الكهربا المولعه والغاز والمياة والتليفونات والانترنت للعيال تيجى انت تقولى الحى عايز منى مية وخمسين الف جنيه بتوع ايه بقى ان شا الله

مندوب الادارة : دى رسوم الصلح مع الحكومه ياحاج  ف الشقة بتاعتك

صاحب البيت : يابنى وهو انا كنت مخاصمها  …دى حكومتنا حبيبتنا ..حكومه الشعب ….سلم لى عليهم وقولهم انى مش مخاصهم علشان نتصالح ..احنا اهل   ومفيش فارق بينا  ولو هما زعلانين من اللى بقوله ع النت  بسبب فواتير الغاز والكهربا وخلافه   خلاص حصل خير مش هعمل كده تانى  وبرضه انا مش مخاصم الحكومه علشان اصالحها  …ياسلام هو فى ف الدنيا حكومة زى حكومتنا 

مندوب الادارة : يافندى يامحترم  دى الرسوم علشان انت اشتريت شقة ف المخالف  وانت اللى قبلت تشترى ف المخالف مشترتش ف الرخصه ليه  كنت خليك ف السليم    …انت بقى مخالف فلازم تدفع

صاحب البيت : يابنى مانا عرفت من المقاول انه متفق مع الحى وهو بيبنى انه يفيش الهوامش ويبرطش البراطيش وكله ف السليم   والحى شاف وكانه مشفش  والحى قبض وكانه مقبضش وكله متراضى  فانا لما لقيت الحى متراضى ففهمت ان الحكومة متراضيه  …هى مش يا استاذ الحكومه تبع الحى برضه  والحى برضه تبع الحكومه  ….هو مش انتم اكلتم عيش وملح وكباب وكفته مع الحكومة وقعدتم شيشتم مع بعض وكله متراضى ….

مندوب الادارة : ياحاج الكلام ده عييب   كباب ايه وكفته ايه ده اتهضموا من زمان  .. واللى  فات مات بقى  خلينا ف الصلح الجديد  هتدفع ولا مش هتدفع

صاحب البيت : ادفع منين يابنى انت اتجننت  انا بقولك فواتير الكهربا ولعه  يعنى انا بشتكى من 200 او 300 جنيه وصل كهربا  تيجى تقولى عايز مية وخمسين الف جنيه   ليه يابنى ده الضرب ف الميت حرااااااام    حرااااااام 

مندوب الادارة : شكلك هتغلبنى   يعنى مش دافع صح …مش هتدفع طب اعمل حسابك بقى  هنقطع عنك المية والكهربا

صاحب البيت : كهربا ومية ايه اللى تقطعها  اومال دخلتوها ليه  ودفعنا دم قلبنا فى المقايسات ليه …..ده اقل مقايسة بالشىء الفلانى ….هى فوضى ولا ايييه …لا بقى ده انا اجيب خيمة  انا وكل سكان العمارة  ونفرش ع الارض ونعمل خيم بقى  وشوفوا بقى هتعملوا لنا ايه …جرى ايه ياحكومه   ..هوه ده وقته …هو مش فى قانون بيخلى المخالف المقاول او صاحب الارض يدفع الغرامه  يعنى انتوا المخالفة الواحده كده بتحصلوها تلات مرات …مرة بالكباب والكفته    ومرة غرامات المحكمة  ودلوقتى غرامات التصالح ….هوه فى ايه  ..ده احنا بنحبكم والله  …احنا مش اعداء  ..ده لو اعداء هتستعملوا الرحمة 

مندوب الادارة : يعنى  مش هتتصالحوا

صاحب البيت : احنا ممكن نتصثالح بطريقتنا  

مندوب الادارة : اللى هى ايه بقى

صاحب البيت : نبوس راس الحكومه  …نبوس الحكومه كلها  …حتى لو فين    ابوس ايدك ياحكومة   ارحميناااااااااااااااااااااااااااا   بقلم طارق عرفه المحامى

اترك تعليق

يرجي التسجيل لترك تعليقك

شكرا للتعليق