أم حوده : ايه حكاية الدور اللى ماشى بيعدى الناس بتاع اللى ياكل مكرونه ده يامعلم ؟
المعلم خليل بفره : اسمه كرونا ياحاجه مش مكرونه
أم حودة : وده جه منين ياخويا؟
بفره : والله سؤالك مهم يا ام حوده حقولك الحكايه من اولها بس طولى بالك شويه .
1 ـ من ايام الانفشاخ الاقتصادى ظهرت العدوى بعيد عنك بتاعة مرض الكرونا لما فجأة الهرم اتقلب بقى فيه البيه البواب والباشا الزبال ولم ينتبهوا ايها الساده! ( دى كرونا )
2 ـ وقبلها كانت بداية المرض ايام كايده العزال انا من يومى ..ايوه آه ! والسح الدح امبو ..والعتبه ازاز والسلم نايلو في نايلو !( دى كرونا )
3 ـ بعدها لما اصبحت اسرائيل دوله صديقه والدول العربيه اعداء( دى كرونا )
4 ـ يوم ماسيبنا سينا للبدو والتكفيريين يعملوا فيها خنادق ويهربوا منها حتى الاكسجين باتفاقيات غير معلنه مع المرحوم بتاع الضربه الاولى .( دى كرونا )
5 ـ لما حصل اتفاق وتم اطلاق الاخوان من السجون للشوارع والجامعات( دى كرونا)
6 ـ لما بقينا نزور الانتخابات عينى عينك وننجح بتوع المخدرات وبتوع غسيل الامول .(دى كرونا )
7 ـ لما رضينا نخصص الشركات كلها وبدون استثناء ( دى كرونا )
8 ـ لما وافقنا نبيع املاك الدوله واراضيها بتراب الفلوس للمحاسيب والمعرصين والحراميه ( دى كرونا )
وغيرها كتير وكتير يام حوده …الكرونا مش فيروس جاى من بره ياحاجه الفيروس ده مصيره العلما حيلاقوله علاج زى اى فيروس قبل كده المسأله مسألة وقت ولازم يروح في الليله دى ملايين دى سنة الحياه ياحاجه كل 100 سنه تيجى كده شوطه زى تسونامى تزيح الفساد وتنظف الطبيعه .
لكن اللى مالوش حل ومالوش علاج يا ام حوده ال 8 حاجات اللى قلت لك عليهم في الاول فاكراهم ولا اقولهم تانى
ام حوده : أيوه ياخويا فاكره انا بينى وبينك حاخدها من اصيروا ومش حدخل المكرونه دى البيت خالص لا عوقل ولا اقلام ولا اسباجيتى ولا حعملها بالباشاميل ولا بصلصه!!!
بفره: احااااااااا
مفيش فايده في اهلك يام احوده حتفضلى طول عمرك همك على بطنك
ام حوده : ماهى المعده بيت الداء يامعلم !!!
عادل حراز