عادل حراز يكتب : التحرش القانونى ف العرف الفساخونى !

0

 

التحرش القانونى زى الكتف القانونى في كرة القدم لا يحسب فاول ..والتحرش القانونى اقوى بكثير من التحرش الجنسى والتحرش العقلى
وطبعا القانون لا يحمى المخفلين .
يعنى لما تلاقى الباشا الصغير (13) سنه راكب مرسيدس وتوقفه وتسأله فين الرخصه حيرد عليك بالقانون ويقولك فين الكمامه يامرعى ؟ويقلب عليك الترابيزه هو (واسدكائه الفرافير ) وحيطلع منها زى الشعره م العجينه وانت اللى حتاخد جزاء جامد لانك مش فاهم القانون .
والقانون ياسيد في مصر المحروسه زى الكانون بتاع ستى ام الباتعه بالظبط كانت دايما تنصحنا وتقولنا اوعوا ياولاد حد يوزكو وتيجوا جنب الكانون ..نقولها ببراء الاطفال ليه يا ست أم الباتعه ترد بفلسفه الشارع وحكمة الرصيف :
الكانون يابنى ده صفيحه مفتوحه من الجانبين تحط الخشب وتولعه من ناحيه والهباب يطلع م الناحيه التانيه اما بقى فوق الصفيحه وده سقف الكانون شخصيا ده اللى بتتحط عليه الحاجه اللى حتتشوى علشان الباشا بيحب الرز والطاجين يبقى على نار هاديه يعنى بأختصار الكانون ده للباشاوات بس مش لو ولاد الكلب بتوع الشعب اللى زيينا دول اخرهم لو حبوا يطبقوا الكانون بيدخلوهم بيت النار وبيتحولوا رماد .
عرفتوا بقى ان الكانون اقوى مليون مره من القانون ..يبقى تحمدوا ربنا وتشكروا فضله ان الباشاوات الايام دى بيطبقوا عليكم روح القانون مش نار الكانون .

عادل حراز

اترك تعليق

يرجي التسجيل لترك تعليقك

شكرا للتعليق