الزباله ع الفاتوره
طب فين هما الزبالين ؟
تبعتوا م الاصل صوره
والاصل فين ..يامجرمين
الزباله ف الشوارع كوام كوام
اللى بيقول م الحكومه
واللى بيقول م المدام
كللكم سايبناها ملعب
للكلاب والنباشين
ـ
النباشين مش ف الزباله
النباشين في حاجات كتير
والوطن فوق نقاله
بيشيلوه كل الحمير
من جذوره ومن مبادئه
جرفوا م التربه صدقه
واللى حارس ع الاراضى
ضيعته ليه بالظلم حقه ؟
تحت الوطن انفاق شوارع
اندفن فيها الضمير !
ـ
ومنين بتيجى النباشين
من حوارى المحرومين
من نفوذ الجبارين
من قصور الاغنيا
م العقول الاغبيا
اللى قطعت بسيف قانونها
حبل رزق الزبالين
ـ
ممنوع عليك لم الزباله م البيوت
ممنوع عليك تهد بيت العنكبوت
ممنوع عليك تعملى كوم
ممنوع عليك كمان تقوم
م الفجر زى المسلمين !
ـ
سيب الشوارع وامشى جوه ف الشقوق
لما نعطس ..
توصلك ذرة نشوق !
أنت عايز ليه تفوق ؟
كمل انت بس نوم
سيبنا ننهش ف اللحوم
سيبنا ننهش في البرابر
واما تصحى ف سيدى جابر
اوعى تمشى ع اليمين
الطريق ف السكه ديه
مش لكل النباشين .
ـ
قوم يامصرى .. قوم وحارب الفساد
النباشين ف الليل بيسعوا
ينهشوا لحم البلاد
عادل حراز