عادل حراز يكتب : بياع الجــــــاز …وبتاع الانابيـــب
الحكايه وبايجاز
الدنيا فجأة اتغيرت
بقى كل شيىء بالكهربا
مسامير عضامنا اتمسمرت
بلدغة من ايد عقربه
ساعة ما كنا سرحانيين
ماشين يمين ومصدقين
ماشيين شمال مع مجرمين
فهمونا :
ان الجاز ده مهنه كويسه
والصغير لما يكبر راح يخش المدرسه
مدرسة بترول
والفصول …فيها بير كبير
كل الدراسه فيها
توصّل المواسير
من كفر عبده… للغردقه
تاخد شهاده كشيخ خليجى
تبقى اجدع من فريد وم المليجى
ممكن تصدر غاز لبره
تروح وتيجى
وتروح وتيجى !
طول عمرنا سريحه
ف الشوارع ..والزقايق
وف حوارى المعدمين
طول عمرنا ..جدنا بيبع ف جاز
واما جه جيلنا اللى بعده
كان نصيبه انابيب
انابيب بوتاجاز
طول عمرنا ويا الخطر عايشين
طول عمرنا متهددين ..
زى اللى ماشيين ع الازاز
ايه يعنى لما نتفق..
مع عزرائيل
ونصدر الغازاللى طالع لاسرائيل
ونشد حبل المشنقه
على كل واحد باع ف جاز
وكان بيمشى ع الازاز
وقلبه كان زى الفولاذ
وايده زى المطرقه
اصل الحكايه م البدايه للنهايه
فيه ناس حثاله
وناس عزاز
حسين سالم مش حسين
كان مبارك ع الضفتين
وهما بره معروفين
انت بقى راح تبقى مين ؟؟
انت واحد باع فى جاز
مين اللى صورته منوره
يابن المرا
ف البرواز ؟؟؟!!
عادل حراز