عادل حراز يكتب : ومن أعمالكم سلط عليكم

0

 

لما رفضتوا تطبيق القانون بعودة ابن الاصول والتاريخ والحضارة جيفارا الغناء العربى ايمان البحر درويش لمنصبه رغم حصوله على حكم في كل درجات المحاكم بعودته نقيبا للموسيقين وتكالبتم علي تنفيذ الحكم كانت ايه النتيجه ؟
النتيجة بأختصار في هذا الفيديو.
على رأى محمد حمزه الله يرحمه ( شوف بقينا فين ياقلبى !!)
بعض الملاحظات مابين السطور :
1ـ يطلع الاستاذ المحترم جدا جدا احمد موسى في تلفزيون الدوله ويدافع عن النقيب الحالى ويستغرب ويقول هانى شاكر بيطبق القانون شوفوا هانى المظلوم حمو بيكا بيشتمه ؟!!!
ياراجل يامحترم كنت فين لما القانون ما اتطبقش في قضية ايمان البحر ؟
2 ـ انتشار الفيديو بتاع حمو بيكا وحمو موسى المذيع اللامع ده بالتأكيد وباليقين في مصلحة حمو بيكا لانك كده يا اعلامى يا محترم اديته مساحه في الاعلان الرسمى وعملتله دعايه مجانيه واصبح حمو بيكا هو قائد الغناء العربي مثله تماما مثل امير الغناء العربى زى ما بيقولوا بالبلدى كده بقوا راس براس !! وطبعا النكابه ( الكلمه صحيحه ) مش حيرضيها ان عيد ميلاد جرحى انا يتجرح من حمو بيكا ؟؟
صح الكلام يا انشراح ؟
…. : ايوه ياستاذ صح وعين العقل
….: طيب ما تشخرى يا انشراح ساكته ليه ؟
3 ـ في الحاله دى لازم نعمل مجلس صلح بين الفنان الكبير حمو بيكا والفنان بتاع عيد ميلاد جرحى انا ..حمو يجيب ناسه وجماهيره والاستاذ هانى يجيب اعضاء النكابه لان جماهير الاستاذ مش في قوة ولا عدد حمو بيكا وبخاصه بعد تفرق جماهير الاستاذ بين الاعجاب بمحمد مرضان والاعجاب بمجدى شطه .
4 ـ وطبعا لازم تغنى الاستاذه ناديه مصطفى بصفتها عضو في النقابه اغنية الصلح خير ويتدخل كبار الموسيقين والملحنيين للحكم في الموضوع من منطلق يابخبت من وفق راسين في الحلال كى تعود المياه الى مجاريها ويرجع حمو وهانى زى السمنه ع العسل ويبقوا راسين في لباس !!!وبخاصه بعد ان صرح حمو بيكا على الملاء انهم طلبوا منه دفع رشوه 300 الف جنيه .
5 ـ ما تستغربوش من حجم المبلغ النكابه بتعرف دبة النمله ومين اخد كام وفين طبعا المبلغ ده طلبوه بعد عودة حمو سالما غانما من الامارات بعد ان تبنته سيده اماراتيه هناك واغرقته بالهدايا والعطايا وربنا يبارك فيك ياطويل العمر .
6 ـ من فضلك لحظة نقف هنا ماهو نفس الاسلوب اللى بيتبعه الاخوه في الخليج لالساد الرياضه والفن انهم يشجعو كل فاسد لتولى المناصب الحساسه زى عمو تركى اللى متدخل في الرياضه ودلوقتى بقى شاعر كبير واكبر ملحن في الوطن العربي بيلحنله ويغنيله ( ياولاد غنوله علي عرضه وطوله وعواد باع فنه )
7 ـ سبق وان تغنى امير الغناء العربي لاحد الشعراء اللى مالوش علاقه بالشعر اصلا وكان بيشترى الكلمات من الشعراء الموهوبين الغلابه وبيسجله باسمه ( منصور الشارى ) وبعد دفع مبالغ طائله للنقيب الحالى مقابل ان ييغنيله .
8 ـ عرفتوا ليه بقى بيحاربوا ايمان البحر درويش لانه الوحيد المحترم اللى بيعمل اغانى لمصر ويرفع رايتها عاليه على حسابه الخاص وبدون اى مقابل حتى مسرحيته الاخيره مكتوبلى اغنيلك لسه حى الان بعد نجاحها النجاح الساحق في الاسكندريه طوال شهر كامل لم يتقاضى اجره ولا اجر اغانيه التى صرف عليها من جيبه الخاص والتى كان معظمها في المسرحيه تتغنى بحب مصر والانتماء لمصر .. مازال ايمان البحر بيحث عن حقه الذى لن يضيع بين اروقة وزارة السخافه المصريه .
9 ـ ايه رأيك يابنت يا اشنراح في الموضوع ده ؟
….: والله يا ستاذ انا شايفه من وجهة نظرى ووجهة نظر الشارع وجماهير حمو ان حمو بيكا هو اللى بيبقا النكيب بتاع الموسيخييين !!!
….: قصدك الموسيقين ؟
….: ايوه يا استاذ اصل انا بعد ما شوفت الفيديو بتاع حمو خلعت ضرس العقل ! وبقيت لدغه في الشيييييين

اعتذر عن انى اطالت في المقال نظرا لضيق وقتى الذى لا يسمح بأن اختصر المقال !!!

عادل حراز

اترك تعليق

يرجي التسجيل لترك تعليقك

شكرا للتعليق