مساء الخير .. ازيك .. عامل ايه ؟ .. وحشني و الله ، بقالي فترة متكلمتش معاك بس غصب عني مشغوليات و الدنيا تلاه .. انت عارف !
بس دا مش معناه إني أقدر أستغني عنك دا انت حبيبي و أنا و انت واحد ..
بص أنا مش عايزك تتكلم ولا ترد ماشي ؟! أنا قاعد معاك النهاردة علشان تسمعني ، حابب أفضفض معاك ..
الأول نشرب القهوة علشان نعدل دماغنا ، أنا عارف بتشربها بن غامق و سادة و معاها .. أقول ولا بلاش ؟!! هقول .. معاها سيجارة ملفوفة ، علشان القهوة ما تحلاش من غير السيجارة دي ..
أنا عارف في ناس هتقول ايه دا انت بتشرب حشيش يعني حشاش و تلاقيه كرمش وشه و مناخيره و تحس إنه هيرجع و هو بيقولك كلمة حشاش .. صح ؟!!
مع إن الناس دي كانت قاعدة بتتفرج و بتسمع لواحد بدرجي يعني شمام هيروين أو كوكايين مش هتفرق و كانوا مبسوطين منه اوي و بدأوا يسمعوا كلامه و كانوا علي وشك إنهم يقوموا بثورة .. بس سيبك دا مش موضوعنا – الثورة يعني – لأن إللي مستنكر سيجارة الحشيش دا ممكن يكون بيشرب خمرة و عنده محلات الخمور مفتوحة عادي جداً ، لأ و ديليفري كمان .. و ممكن يكون مبيشربش علشان منظلمش حد و يكون فمه طاهر بس الظاهر إن الطاهر مبيكملش – حلوة دي – ليه ؟!!!
لأن عم الطاهر ممكن يكون مرتشي – آه عادي – أو يكون حسود و حقود .
الكلام أخدنا بس أنا عملت القهوة و السيجارة و احنا بنتكلم ، اشرب بقي و ولع السيجارة – يولع في عدوك – ها إيه رأيك عظمة مش كدا ؟!! عيب دا أنا دكتور .. اضحك
اضحك ..
بص يا سيدي بمناسبة الحسود و الحقود إللي بيبقي قرفان من الحشاش و هو من جواه بيقول لنفسه آه معاه فلوس يشتري حشيش و يعمل دماغ أُمال بياكل بكام و يلبس بكام و و ..
الناس دي كتير و كتير أوي ، منهم الكتوم يعني من جوه لجوه و منهم إللي تلاقيه ظريف في نفسه و صريح و يغلف الحقد و الحسد في خفة الدم و إن دا عادي و أنا بهزر يا جماعة . خللي بالك نسبة كبيرة من الشعب المصري حسودة ظريفة . ما علينا سيبك منهم احنا معانا ربنا .
عيوبنا كتير يا صاحبي و كتير أوي كمان و أصبحنا وحشين أوي مع بعض ، بص يا سيدي أنا بشتري متطلبات البيت بنفسي سواء من السوبر ماركت أو من السوق عدي جداً .
سيبك من السوبر ماركت لأن الأغلبية بتتزوق و بتعمل نفسها ولاد ناس ، تعالي ننزل السوق الشعبي و نتعامل مع البائعين و الناس و الزحمة هتلاقي تاجر جشع و مشتري عامل نفسه مفتح ، الاتنين نفوسهم وحشة لا دا ربنا هيكرمه و لا دا ربنا هيرزقه و يبارك له ، بس أهه بيضحكوا علي بعض .. ماشي !! دي الغالبية العظمي من الشعب .
تعالي بقي لجنة الدين … تا تا تا تا تااااا ..
هتلاقينا – آه أنا جمعت نفسي معاهم – هتلاقينا علاقتنا كويسة بربنا – مقدرش أقول ممتازة و لا جيدة – و إلا كان حالنا إختلف كتير يا عزيزي .. طب إزاااي ؟!!! أقولك .. دا يا سيدي طبع قديم جداً في الشعب المصري ، احنا شعب بتاع ربنا ، ممكن نبعد عن الإستقامة و نمشي عوج و نعمل الغلط و احنا عارفين إن دا غلط و ممكن الناس تبقي كرهة بعضها و محدش طايق التاني و كلنا مفتحين و معلمين ..
بس .. و دي نعمة يحسد عليها الشعب المصري إن جوه قلب كل واحد فينا في حته عمرانة و منورة بذكر الله ، كل واحد علي حسب تربيته و بيئته إللي نشأ فيها ، بس لازم هتلاقي الحتة دي . مش الحرامي لما ربنا بيسترها معاه بيقول الحمد لله .. صح ؟!
الكلام أخدنا تاني و انت حبيبي نعمل بقي دور قهوة تاني مع سيجارة أكيد .. حبيبي
بص يا سيدي علشان مطولش عليك ، احنا يا مصريين محتاجين نزود حتة النور إللي في قلوبنا بمعني إن احنا لازم نرجع لربنا مش لازم تحصل كارثة في البلد علشان نكون إيد واحدة و علي قلب رجل واحد .
لازم نفهم إن محدش واخد معاه حاجة أو زي ما بيقولوا الكفن ملهوش جيوب ، إزرع الخير هتجنيه . احنا محتاجين إعادة تأهيل ديني و تعليمي .. و إيه ؟!! تعليمي ؟!!! ليه تعليمي ؟!! لأن الشعب الجاهل سهل جداً تكفيره و موضوع التعليم دا بقي عايز قاعدة تانية – قاعدة عرب – بس أنا لسة قايلك علي نعمة ربنا علينا إنه وضع جوانا في قلوبنا شعاع و لو بسيط من نوره سبحانه ..
أقولك .. كفاية كدا علشان الفضفضة دي جاية عليا بخسارة .. يللا قوم روح .. أنستنا .
اشترك في نشرتنا الإلكترونية مجاناً
اشترك في نشرتنا الإلكترونية مجاناً.
الأربعاء, أبريل 17, 2024
آخر الاخبار
- فوز فريق الاتحاد السكندرى ٢٠٠٧ على الزمالك بالقاهرة ٢-١
- رحلة لجماهير الثغر.. لمشاهدة لقاء الاتحاد السكندري و الزمالك بإستاد القاهرة
- الاتحاد السكندرى يتصدر الدوري بفارق الأهداف
- حل فزورة فريش اليوم الأحد 21 رمضان.. بلد السكر والقهوة والتبغ في الكاريبي
- بحضور 600 شخص .. نادى السلام البحرى ينظم اكبر مائدة افطار على ضفاف قناة السويس ببورسعيد
- تأجيل مباراة الاتحاد السكندرى و المصرى البورسعيد لتقام يوم الخميس 4 إبريل
- سلة الاتحاد السكندري تتعاقد مع صانع الألعاب الأمريكي ” مايكل ديكسون “
- دوللي شاهين تنتهي من تسجيل أغنية “ست البنات”