مايسة كمال تكتب: محو الأمية الزوجية .. الحلقة الأولى

سلسلة محو الأمية الزوجية .. الحلقة الأولى
جوزي بيتفرج على مواقع إباحية أعمل إيه؟!

بعد استشارات كتير أوي ورسائل جاتلي، تخص الموضوع ده، قررت إني أعمل حلقة، أتكلم فيها بشكل لائق عن كيفية التعامل فى الحالة دي، لعل وعسى ناس تانية تستفاد، أو تبعت الحلقة دي لناس تشوفها وتستفاد.

تعالوا نقسم الموضوع لنقاط .. وأكيد اللي بيعاني من المشكلة دي، هو اللي هيكمل قراءة كل النقاط.

1) فيه ناس فعلاً عايزة تبطل متابعة مثل هذه الأفلام، ومش عارفة، وفيه ناس أصلاً مش شايفة إنها بتعمل حاجة غلط، وضميرها نايم، ومش هيصحى أصلاً! يبقى إحنا كده قسمناهم لنوعين.

2) لو زوجك بيعمل كدة، وهو شايف نفسه مبيعملش حاجة غلط .. اتكلمي معاه بهدوء، وعرفيه إنك مش هتسكتي على الموضوع ده أكتر من كدة، وقوليله أنا هسيبلك فرصة تعيد حساباتك وتفكر تبعد عن الموضوع ده بشكل نهائي، الفرصة دي على الأقل تكون شهر أو شهرين، مش من بكرة تستني يبقى فيه نتائج مريحة بالنسبالك.

3) لو مستجبش بعد المدة دي، أطلبي منه يروح لحد متخصص .. بصي .. هو في الغالب مش هيروح، وهيقاوح .. ساعتها استخدمي الكارت الأخير .. وهو إنك تشتكي لحد حكيم فى العيلة، وتخليه يتكلم معاه يمكن يفوق.

4) خدي بالك .. إوعي تشتكي لحد أبداً، إلا لما تكوني استنفذتي كل الحلول، وهو خلاص ساق فيها، ومبقاش فيه طريقة غير دي، وطبعاً باستمرار شجعيه وعرفيه إن فيه فرص ربنا بيمن عليه بيها ولازم يستغلها.

أما لو حاسس باللي بيعمله .. وحاسس بالذنب .. ومش عارف يعمل إيه .. خليه يقرأ الكلام ده

1) قوليله لو حاسس بتقدير لنفسك قليل، إعرف إنه بسبب المواضيع دي .. كفاية تحس إنك قدام الناس بوش، بس أصلك وش تاني خالص .. حاسس طول الوقت إنك متناقض .. مش محترم فى عين نفسك.

2) لو مهما عملت، وحاولت تقرب من ربنا، ومع ذلك فى حاجز انت مش عارف هو إيه .. إعرف إن هو الذنب ده .. لأن معصية السر أعظم عند ربنا من أي معاصي .. هيفضل خاتم على قلبك، وبعيد مهما حاولت تقرب.

3) خرج كل الناس اللي بيشجعوك على ده من حياتك بالتدريج، ولو مفيش قدامك غيرهم .. ادعي ربنا بصدق يبدل الناس دي بناس تانية.

4) وقتك الفاضي هيقتلك .. متستسلمش ليه .. وقوم اعمل حاجة مفيدة فى حياتك.

5) الحل السحرى .. عليك بالدعاء ثم الدعاء ثم الدعاء .. وانت قايم، وانت قاعد، وانت لسه صاحي، وقبل ما تنام، ومابين الأذان والإقامة، وكل يوم جمعة .. ادعى يا رب توب عليا.

6) قبل ده كله .. خد القرار .. كلنا عايزين نتغير .. بس محدش خد قرار حاسم .. القرار اللى بنية صادقة .. واللى فيه بنبقى بنفكر اننا أقوى من الشيطان، مش سايبين دماغنا ليه ونرجع نقول صعب.

7) فيه تغيير على شكليين .. الأول هو الاقتلاع مرة واحده، تقرر، ومن ثم متتفرجش تاني .. أو لو انت واصل لمرحلة متأخره تاخدها بالتدريج، وتقلل عدد الفرجة بشكل أقل من النسبة الطبيعية، لحد ما تختفي تماماً وربنا اللي شاهد، وعارف انت بتضحك على نفسك ولا لاء.

8) لو انت متجوز، حاول توصل انت وزوجتك لشكل علاقة يرضيكم .. إحساسك الدائم إنك مش عارف تكتفي بإنسانة واحدة ده وهم .. وهو ده الأصل في إنك بتتفرج .. وقت ما توقف كل العك ده .. هتبدأ تركز فى بيتك وترضى.

دي الضريبة اللي انت بتدفعها فى الدنيا .. عدم إحساسك بالرضا مع زوجتك .. تأكد إنك لما تبعد عن الذنب ده هتبدأ ترضى بيها.

9) أما لو حد لسة شاب مش متجوز .. حاول تسرع فى الزواج .. انت مستني إيه؟! .. هتقولي الماديات .. ربنا قال كان حق على الله يرزقهم ومنهم انت .. شاب يريد الزواج وربنا ييسرلك زواجك فى أقرب وقت .. وعليك بغض البصر.

الشيطان كل ما تقفله باب .. هيفتحلك باب، ومش هيزهق .. انت برضة كل ما تضعف قوم تاني واوعى تزهق .. حارب شيطانك بنفس سلاحه.

10) حافظ دايماً على نظافة لبسك الداخلي .. لأن أي رائحة ممكن تثيرك وترجع لنفس النقطة.

11) لما تقرر ويظهرلك علي السوشيال ميديا أي فيديو بالصدفة .. متقولش هبص بصة بس، أنا استحالة أرجع .. لا لا .. انت البصة هتخليك ترجع .. عدي الفيديو على طول .. ومتتفرجش خالص.

12) انت مش ضعيف، وقادر تتخلص من اللي انت فيه .. انت بس خدك الأمل عشان ستر ربنا عليك .. عارف لو معصية الناس هتشوفك وانت بتعملها؟ كان زمانك عرفت تسيطر على نفسك .. لكن عشان شايف إن الموضوع محدش يعرف بيه من الناس، فسايق فيها .. وسايب نفسك تبدع وتغرق في الذنوب.

13) الستر اللي انت فيه ده مش هيستمر كتير .. خد بالك من النقطة دي .. زمان أحد الصالحين كان بيحكم بلد وأهل البلد اكتشفوا إن شخص فيهم سرق فذهبوا بيه للحاكم يطبق عليه قطع اليد، فناس اتعاطفت، وناس قالت لأ، نستني يمكن أول مرة .. رد عليهم وقالهم استحالة يكون أول مرة يسرق وربنا هيكشفه .. لأن كل واحد لينا ليه فرص في الستر، وبعدها ستر ربنا بيتكشف عنه! .. بالله عليك متخليش ربنا يغضب بسبب تماديك، ويكشف ستره عنك.

14) لما تبقى شايف إن كل الدنيا ذنوب وحاسس بمياعة النفس، أو إن العالم مبقاش طاهر .. حضرتك ده عشان انت فى قلب الحدث .. عشان انت محكمتش إنسانيتك وحكمت شهوتك اللي هى الفرق الوحيد بينك وبين أي كائن تاني .. وأي كائن تاني معندوش غير الشهوة اللي بتحركه .. فمتخدش من طباع كائنات لا تعقل وتبقى مستغرب ليه شايف الدنيا بالقذارة دي .. انت بس اللي حاسس الإحساس ده .. لكن في فالدنيا ناس بتصلي وطاهرة طول الوقت، وحاسة بنضافة، وبتستنشق هواء نضيف، وظنون خير في اللي حواليها وفي الخالق سبحانه.. كيفما تكون يكون قلبك!

15) التخيل أداة من أدوات النفسية المهمة جداً.. تخيل نفسك .. وشوف نفسك بالصورة اللي انت عايزها .. شخص بقى تعرض عليه الحاجة دي ويعارض يكمل .. شخص بيستغفر من الذنوب وقاعد ندمان عليها .. تخيل شكلك وانت بعيد عن الحاجات دي .. ومدى احترامك لنفسك وثقتك بنفسك هتكون قد إيه .. تخيل نفسك فى عكس الصفات اللى بقيت غرقان فيها.

16) الدعاء .. برضو ثم الدعاء .. قوله يارب ساعدني .. وجدد النية .. وكل ما تقع قوم تاني .. مجاهدة النفس مش سهلة وليك عليها أجر والله.

17) انت مش أسوأ شخص على وجه الأرض .. اللي انت فيه طبيعي .. ربنا خلقك تنجذب للطرف التاني .. اللي مش بينجذب هو اللي عنده مشكلة .. الفكرة إن بعد ما ربنا فطرك على حب الشهوة .. وعدك بالمساعدة، لو انت سألته العون، وجاهدت نفسك، وعملت حكمه في الأرض .. وهو .. غض البصر .. انت لما متنفذش اللي أمر بيه، ساعتها بيظهر فى حياتك كل المشاكل .. من أهمها عدم البركة، وانقلاب نعمته عليك .. وتحول عافيتك.

مايسة كمال
محاضر ومستشار العلاقات الزوجية
مؤسس فريق زعماء فالصغر

تم ايقاف التعليقات وسيتم فتحها قريبا