محياي ومماتي .. من أشعار محمد دنيال

0

لفيت موالد الاوليا اجمع ..
سكران بدور ع اللي ضلتني

الذكرى دمع نزفته ف اتبخر ..
نتجت سحابة ذكرى ضلتني

ماسك ف ايدي سبحتي وداير..
ف الحضرة سيرة وسيرتي كات انتي

مستني ريح ف حضرني ( طيفك ريحتك )
ولمحتك انتي بتضحكي ف الفكر

وسرحت فيكي نسيت… انطق حروف الذكر

رتلت اسمك وارتوت روحي

حسيت ساعتها اني لقيت راحتي

فضوا المجالس فجأة وانفضوا

بصيت اشوفك… كنتي روحتي

وانا مش عليل والله والعلة

اني هويتك والهوا غلاب

خلاني بقصد باب الاوليا لجلك

ازهد عن الدنيا ولكني بحتاجلك

بحتاج امان عينك .. او حضن حنية

محتاج لوصل قريب .. يا ساكنة ف النية

بسم اللي كان ..
واسم المكان

واسم الزمان ف زمان كان بيينا قبل فراق

ببعت اليكي سلام متعبي بالاشواق

حرب الحنين جوايا لم تحترم
لا سكوني ف السجدة .. ولا ف شهور الحرم

مهما اصوم واعتكف .. قلبي الحزين يرتجف

يبكي مع التواشيح

ارفع ايديا لفوق .. وابكي ف حضن ضريح

وادعي لرب السما .. ليردني ليكي

اسأل عليكي بياعين الحب

واسال عليكي نجوم سما .. ف ليالي كاملة البدر

واتمنى اكون الخضر .. واعرف طريقك فين

الفين نهار غايبة..
وانا ف الهوا ناسك

ماسك ف ايدي سبحتي وداير

لفيت موالد الاوليا حاير

محتاج وصالك .. يكتمل ذاتي

اوهب اليكي النسك .. محياي ومماتي

شئتي وابيتي عن الغرام فيا

فيا الغرام ساكن ولا يختل

انا كنت ساكت راضي بالوحدة

اول ما حبك حضر سكن الوريد واحتل

وفضلت طول الوقت ..
باخد وعود واوعدك

وماكانش ف الحسبان ..
ان الفراق يبعدك
والخوف يموتني

ولا اني افضل كدة ..
سكران بدور ع اللي ضلتني

اترك تعليق