منة الله المشيرفى تكتب : مين طالع الرحلة 

 

لما بتيجى طالع رحلة بتختار مين من أصحابك يطلع معاك، مش أى حد والسلام ، انت طالع رحلة وعايز تستمتع بوقتك على أتم وجه …

 

الحياة كده برضه عبارة عن رحلة سواء كانت طويلة أو قصيرة ، لازم نختار الناس اللى نحاوط نفسنا بهم علشان هما دول اللى هيبقوا جيشنا العتيد فى الأيام والمواقف الصعبة، اللى هنواجه بهم أزماتنا، اللى هيبقوا رفقاء رحلتنا …

 

ناس كتيييير جدا دخلت حياتنا وعلاقتنا بهم كانت Very toxic ، دخلوا نبشوا فيها وسمموها وخرجوا، النوعية دى مكانش ينفع نحتفظ بهم تحت أى بند من بنود العلاقات البشرية، وجودهم مؤذى جدا …

 

أكم ناس كنا بنحبهم ومش متخيلين حياتنا من غيرهم وزعلنا لما خرجوا من حياتنا ، وكنا بنلتمس لهم الأعذار، وبنسكت الصوت اللى جوانا اللى بيقولنا لا مش هما دول اللى نضيع عمرنا معاهم، لكن بعد خروجهم اكتشفنا إن أد إيه وجودهم كان ضاغط علينا طول الوقت ومعيشنا فى ضيقة وأزمة وأد إيه دلوقتى بنشوف إن ربنا رحمنا لما بعدهم عننا وإزاى إحنا كنا جايين اوى كده على نفسنا ومكملين معاهم ؟؟

 

فى أى علاقة فى حياتك لازم تسأل نفسك سؤالين:

الأول: هل أنا سعيد بوجود الناس دى حياتى ولا تعيس؟

الثانى: هل المجهود اللى ببذله للحفاظ على الناس دى ولإبقاء الود معاهم مساوى لمجهودهم ولا مفيش أصلا مجهود بيعملوه؟

لما تجاوب ساعتها هتعرف هل أنت فى Toxic relationship ولا لا!!

الأهم من ده إن مش كل من هب ودب ينفع تقول عليه صديق ، زمان أخدنا فى المدرسة إن الصديق وقت الضيق، فكر كده وشوف مين وقت ضيقتك كان موجود جنبك وساندك، مين اللى كمل معاك للأخر ومخذلكش…..

مين اللى كنت محتاج له وسابك من غير تردد ومين إللى كنت محتاج له وفضل معاك ؟؟

مين المعطاء ومين الشخص الأنانى اللى يحب ياخد وميديش ؟؟

مين اللى جرى ورائك واستغلك واستنفذ طاقتك وشعورك ووقتك وبعد كده طار فى الهوا ؟؟

مين اللى بيتمنى لك الخير ومين بيغير ؟؟

مين اللى أقواله عكس أفعاله ومين إللى أفعاله كلها حنية ودعم وسند ؟؟

مين اللى زعلك غالى عليه ومين إللى بيستلذ بكسرك وقهرك ؟؟

مين اللى بيخليك تجلد وتحاسب نفسك ومش بيشوف نفسه غلطان ومين إللى مش بيهون عليه إنه يسيبك زعلان أصلا ؟؟

مين ومين ومين ؟؟؟؟؟

وقت ما بتقع شوف مين اللى بيفضل معاك ؟ ولما تعرفه امسك فيه بإيدك وأسنانك ، اوعى تفرط فيه.

وقت الأزمة الناس المحترمة الحلوة اللى فى حياتنا هما اللى بيعدوا بينا لبر الأمان، هما اللى بيسندونا وقت ما بنقع …

افتكروا دايما إحنا فى حياة بعض علشان نقوى بعض ونسعد بعض ونكون عون لبعض ..

سيبكم من الكلام وركزوا على الأفعال

We are old enough to recognise the bad one

فلتروا الناس اللى فى حياتكم وحافظوا على المسافات علشان متشوفوش الوحش منهم لأن مش كل مرة تسلم الجرة فحافظوا على قلوبكم، الكسرة والخذلان وحشين اوى، اعرفوا تقولوا امتى ولمين ” مع السلامة” ، اختاروا مين اللى يطلع معاكم الرحلة !!!

جبران خليل جبران بيقول :

” البعض نحبهم لكن لا نقترب منهم، فهم فى البعد أحلى وهم في البعد أرقى، وهم في البعد أغلى.

البعض نحبهم ونسعى كى نقترب منهم ونتقاسم تفاصيل الحياة معهم

ويؤلمنا الابتعاد عنهم ويصعب علينا تصوّر الحياة حين تخلو منهم.

البعض نحبهم ونتمنى أن نعيش حكاية جميلة معهم ونفتعل الصدف لكى نلتقي بهم ونختلق الأسباب كى نراهم ونعيش فى الخيال أكثر من الواقع معهم.

البعض نحبهم بيننا و بين أنفسنا

نصمت برغم الألم لا نجاهر بحبهم حتى لهم لأن العواقب مخيفة ومن الأفضل لنا و لهم أن تبقى الأبواب مغلقة.

البعض نحبهم فنملأ الأرض بحبهم ونحدث الدنيا عنهم ونحتاج إلى وجودهم..كالماء..والهواء ونختنق فى غيابهم أو الابتعاد عنهم.

البعض نحبهم لأننا لا نجد سواهم

وحاجتنا إلى الحب تدفعنا نحوهم

فالأيام تمضى والعمر ينقضى والزمن لا يقف ويرعبنا بأن نبقى بلا رفيق.

البعض نحبهم لأن مثلهم لا يستحق سوى الحب ولا نملك أمامهم سوى أن نحب نرمم معهم أشياء كثيرة نعيد طلاء الحياة ونسعى صادقين كى نمنحهم بعض السعادة.

البعض نحبهم ولا نجد صدى للحب فى قلوبهم فننهار ونتخبط فى حكايات فاشلة فلا نكرههم، لا ننساهم لا نحب سواهم ونعود نبكيهم بعد كل محاولة فاشلة.

والبعض نحبهم ويبقى فقط أن يحبوننا. ”

دمتم سالمين

منة الله المشيرفى

التعليقات متوقفه