منة الله المشيرفي تكتب : الحظر الممنوع

0

 

المقالة دى اتأخرت جدا فى كتابتها لكن إللى متأكدة منه إن ده أنسب وقت تطلع فيه….

من اكتر من شهرين وإحنا منعزلين، ممنوعين من رؤية أهلنا ، أصحابنا، أحبابنا…

حياتنا فى يوم وليلة اتغيرت تماما، حالنا اتقلب، روتين اتغير، الحركة قلت اوى، فكرة إنك فى حظر …

الفكرة نفسها غريبة، وأخدنا وقت لحد ما استوعبنا الدنيا فيها إيه….
بعد شوية اتأقلمنا والدنيا إلى حد ما مشت….

لو كنت اتكلمت عن الموضوع ده فى الاول ، بالنسبة لى الكلام هيبقى عادى ، المشكلة مش فى إنك إزاى تستثمر الوقت؟
الفكرة فى حاجة تانية خالص !!!

عارفين صلاح جاهين لما قال :

في ناس بنشوفها بالألوان وناس جواها مش بيبان…..
وناس أسود وناس أبيض وناس محتاجه بس أمان…..
وأكتر ناس تآمنهم ما يجي الجرح غير منهم…..
وناس انت بعيد عنهم بتنسي معاهم الاحزان…..

الفترة دى كانت أحسن فترة البنى آدم يأخد فيها هدنة من كل شئ، ينعزل، يسمع صوت نفسه فقط لا غير….

يقعد مع نفسه فى هدوء، يركز، يقيم علاقته بالآخرين على كافة المستويات….
لو فكرت هتجد إن ده فعلا كان أنسب وقت…

أنا بقول الكلام ده ليه؟
لسببين :
أولهم : إن طوال الفترة دى وأنا فى حالة ترقب، بتفرج ، بشوف الدنيا رايحة بينا لفين، مين إللى بيدخل حياتنا ومين إللى بيطلع منها، وهكذا…

من غير قصد، كل واحد حدد مكانه فى حياة التانى، كلنا بلا استثناء عرفنا مين وجوده فارق معانا ومين بيشكل عبئ علينا ، مين إللى يستحق يقرب ومين إللى المفروض نعمله حظر عن حياتنا …

السبب التانى: إنى اكتشفت إننا مش محتاجين غير ٣ شهور بس علشان نقيم فيهم علاقتنا، وعلشان نكتشف فعلا حقيقة الأشخاص إللى بنتعامل معاهم…

اكتشفت إن علاقتنا كلها عبارة عن منحنيات، فى أولها تلاقى نفسك بترفع وتعلى من قدر البنى آدم، بعدها بشوية بيبقى فى حالة ثبات إللى هو إنك تشوف الكويس والوحش إللى فيه، بعدها يا المنحنى يرجع يعلى لفوق أو ينحدر للأسفل….
انت إللى بتختار وتحدد بناءا على إيه إللى يناسبك …

لكن ولا تزعل ولا تكتئب زى ما بيقولوا c’est la vie
دوام الحال من المحال، كنت كتبت قبل كده فى إحدى مقالاتى إننا كلنا بلا استثناء مراحل فى حياة بعض، وفى ناس زعلت وعلقت وقالت ليه؟

لكن يمر الوقت وأنا لسة عند رأيى، فعلا إحنا مراحل فى حياة بعض، ومش معنى إن كونك مرحلة وخلصت إنك وحش، لا بس وجودك كان له لازمة فى حياة الشخص التانى ده فى فترة محددة، سواء أخد فيها درس منك أو اتعلم منك حاجة أو كنت سند له أو دخلت فيها البهجة لحياته أو حاجات كتير وعكسها….

وهما كمان غيروا فى حياتك وأثروا فيها، صحيح إحنا أوقات كتير مش بنعرف الحكمة من قرب بعض الناس مننا وساعات بنعرفها متأخر وساعات بتبقى واضحة زى الشمس، لكن الأكيد فى كل ده إن كل شخص دخل أو خرج من حياتك بيبقى لحكمة معينة، والحقيقى أكتر إنه لا توجد لقاءات عبثية فى الحياة!!!!

فى ناس وجودها نعمة وناس وجودها نقمة وناس وجودها جنة وناس معرفتهم جحيم..

الناس فى المجمل عاملين زى العملة المعدنية، ملك وكتابة، بيتقلبوا ما بين وجهين، بيبقوا محتارين عايزين يبهروك، بيعملوا بهلونات ….

وفجأة تلاقى العملة ثبتت وظهر الوجه الحقيقى !!!!

وعليك يا تكمل يا توقف لحد هنا وتفكر فى الحكمة من وجود الناس دى فى حياتك!!

عارفين فترة الحظر دى عاملة زى إيه؟

عاملة زى الفلتر، حقيقى أنت قاعد مش بتعمل حاجة، بتقيم وبس وبمنتهى الهدوء إللى فى الدنيا، مش محتاج إنك كنت تبذل مجهود…

هتلاقى الناس اتفلترت لوحدها وكله اخد مكانه الصحيح ….

هتلاقى ناس بعدت وانت كنت فاكر انهم قريبين جدا، متزعلش لعل فى بعدهم حكمة وتقوية لقلبك على حاجة أقوى..

ناس تانية كنت فاكر إنهم على هامش حياتك، فجأة قربوا ووجدت إن الحياة لذيذة معاهم…

وناس وسط، داخلين خارجين مش ثابتين على حال، أطلقت عليهم فئة المهمشين أو التائهين، مش عارفين هما عايزين إيه ، حبة كويسين وحبة وحشين، وجودهم مالوش معنى أصلا..

وناس واضحة بالقدر الكافي محافظة على المسافة ودى أكتر فئة مريحة، إللى هو أنا مش بعيدة لكن عندما تحتاج لى ستجدنى بجانبك، الناس دى يترفع لها القبعة حقيقى…

وناس مؤذية ، موجودين للأذية وبس….

وناس أصحاب طاقة سلبية متجددة، إللى هو أنت مش متنكد ليه، لما اجى انكد عليك….

وناس استغلالية، عارفين إيه مصلحتهم معاك وهيستفيدوا إزاى منك ….

وناس قاسية اوى، وناس عاملة نفسها عارفة كل حاجة وناس شغلتها التدمير والهدم وناس بتغير من حاجات تافهه بس برضه بيتحطوا فى خانة الغيرانين، وأشكال وأنواع إيه، زبادى خلاط بجد…

أنواع كتير لا تعد ولا تحصى وكله ماشى.

الفترة دى حقيقى وضحت لنا هو إحنا إيه مدى أهميتنا عند الآخرين ومدى أهميتهم فى حياتنا…

الدنيا حلوة بس بالكام واحد إللى طلعت بهم من الفترة دى…

وإياك تستعجل لازم تقفلهم ٣ شهور متعرفش فى آخر ساعة ممكن يحصل إيه؟؟؟

فى مقولة لعلى بن أبى طالب جميلة جدا :
” أحبب حبيبك هونا ما عسى أن يكون بغيضك يوما ما و أبغض بغيضك هونا ما عسى أن يكون حبيبك يوما ما ”

حقيقى من أصدق ما قرأت….

الحياة قصيرة مهما عشنا ، استمتع بها على اد ما تقدر مع نفسك ومع الكام واحد إللى طلعت بهم…

بعد كام يوم المفروض إن الحياة هترجع لطبيعتها والكل نازل…..

وانت لابس الMask وال Gloves بتوعك، إللى هما حصنك ضد الكورونا، افتكر إنك كونت حصن قوى ضد الناس إللى ملهاش لازمة، الحصن ده جواك ، مش ظاهر لحد ، حصن بيقويك ضد أى علاقات زائفة أو علاقات بتستهلك من روحك سواء قريب، غريب، جار، صديق، حبيب، أيا كان!!!

خد الدرس واتعلم، الفرصة مش بتيجى كتير، ودى كانت أكبر فرصة….

فترة الحظر كانت هدنة وفرصة لإعادة ترتيب أولوياتك فى الحياة وترتيب الناس فى حياتك …

الحياة حلوة بك، بنفسك، بطموحك، بإرادتك، بشغلك، بموهبتك، بحياتك إللى انت حابب تعيشها، بحلمك إللى عايز توصله، بالكام واحد إللى طلعت بهم فى الفترة دى….

خليك فاكر مين طلع ملك ومين طلع كتابة؟؟!!!

دمتم سالمين

#الحظر_الممنوع
#منةالله_المشيرفى

اترك تعليق

يرجي التسجيل لترك تعليقك

شكرا للتعليق