منة الله المشيرفى تكتب : الحب الغير مشروط

2

 من كام يوم وبمحض الصدفة بسمع أغنية الحب الحقيقى لمحمد فؤاد، اللى فاكراه كويس إن الأغنية دى أول ما ظهرت عملت ضجة كبيرة اوى وكل الناس أصبحوا بيرددوها فى كل مكان، والكليب بتاعها كمان كان مختلف وكانت الأغنية دى بتتغنى للأطفال بطريقة لطيفة الغرض منها تعريف إيه هو الحب الحقيقي وطبعاً المقصود فى الكليب واللى اقصده أنا فى المقالة دى هو الحب بشكل عام ، الحب على نطاق واسع مش الحب اللى فى نظر أغلب الناس اللى بيقتصر على المشاعر بين الرجل والمرأة….

هو فى حب أصلاً ؟ طيب هو إيه الحب؟ طيب هو الحب مهم ؟ طيب واللى عايش من غير حب!!!!

كل دى أسئلة بتيجى على بالنا من وقت للتانى، تلاقى نفسك سرحت وفضلت تفكر فى الأسئلة دى اللى غالباً مش بتلاقي لها إجابات محددة وقاطعة….

الشىء الأكيد اللى واثقة منه إنه فعلاً الشعور بالحب مهم، يعنى من فينا مش حابب يحب أو يتحب، أو إزاى الإنسان يقدر يعيش من غير وجود ناس بيحبهم وبيحبوه؟ 

فى نظرى الشعور بالحب عامل زى نسمة الهواء اللى بتعدى ترطب الدنيا فى عز الصيف، الحب بيعمل طراوة على القلب الكئيب تخليه يرجع يفرح من تانى، الحب هو الشعور بالسكينة والهدوء والاطمئنان…

عارفين أشرف عبدالباقى فى فيلم حب البنات لما كان بيقول ( إن ربنا خالق الناس دى طول الوقت فى الدنيا بيدوروا على الحب، فى منهم ناس محظوظين بيلاقوه وفى ناس بيعيشوا ويموتوا وهما بيدوروا عليه) … 

فعلاً الناس بتعمل كده طول الوقت ويمكن كمان من غير ما تحس، اللى هتلاقيه متعكنن ومش عارف السبب، اللى مش مرتاح، اللى تايه، اللى عايش فى ملكوت تانى، اللى عايش فى الخيال، لو دققت هتلاقيهم كلهم بيدوروا على الشىء أو الشعور المفقود ده ” الحب” ومش أى حب، الحب اللى بيدوم الحب الغير مشروط……

وعلشان الدوشة الكبيرة والزحمة فى حياة الإنسان اللى بتسببها علاقات ملهاش لازمة وإنه فى احتمال إن مش كلنا هنقابل الحب الحقيقى اللى هو هنا ال Partner لحياتنا…كان لازم حاجة تعدل شكل حياتنا وتعمل فيها توازن زى رمانة الميزان كده…

حياة الإنسان عاملة زى كفتى الميزان اللى بيظبطها وبيحافظ على توازنها هى رمانة الميزان ورمانة الميزان هنا هي الحب الغير مشروط، اللى بيخلينا نطلع من منطقة الشعور بالفشل أو بخيبة الأمل لمنطقة أفضل ونكون أكثر راحة فيها، اللى بيخلينا قادرين نوقف على رجلنا من تانى..

الحب الوحيد الحقيقي الغير مشروط هو حب الأباء والأمهات لأولادهم، هو ده فعلا الحب اللي مفيش عليه خلاف….

حب فطري من غير سبب، مش مرتبط بأكلة حلوة أو بخروجة أو بمعاملة كويسة أو بكونك شخص ناجح في حياتك ولا لا…..

حب ربنا بيحطه في قلوبهم بيخليهم يستحملوا أي حاجة علشان خاطر ابنهم أو بنتهم….

حب بيخليهم سند لأولادهم، بيعلمهم يبقوا أقوياء علشان يعرفوا يحموا أولادهم ، حب بيمدهم بالشجاعة والجرأة علشان يكونوا دعم لأولادهم..

حب بيخليهم دائما يتمنوا إن أولادهم تطلع أحسن وأفضل منهم….

حب بيخليهم مش بخلاء، ومقصدش البخل المادي إنما أقصد البخل العاطفي…..

لما بدقق في علاقات الناس ببعضها بشوف فعلاً إن البقاء لحب الوالدين، مهما كان عندك أصحاب وأصدقاء وأخوات، مرتبط أو مش مرتبط، مفيش حد هيخاف عليك أو هيحبك غير والدك ووالدتك….

لما بتسأل أي شخص أنت بتحب فلان ده ليه؟ يقولك علشان كذا وكذا وكذا ويبدأ يعدد لك الأسباب، لكن الحب الوحيد اللي بتحب وتتحب علشانه ومن غير أي أسباب هو حب والدك ووالدتك لك…

ولو عايز تعرف والدك ووالدتك بيحبوك إزاي شوف أنت بتحب أولادك إزاي، نفس شعورك وإحساسك اتجاه أولادك هو هو نفس شعور والدك ووالدتك إتجاهك….

من الآخر الناس اللي دمهم بيجري فيك هما دول اللي بيحبوك والأولي بحبك واللي حبهم ثابت مش بيتغير ….

هي دائرة مغلقة: والدك ووالدتك، أنت، أولادك….وباقي الناس اللي بره الدائرة هما النكهة أو اللي بيخلوا للحياة روح ماهي الدنيا مش سواد اوي كده….

وكل حاجة ولها exceptions، في ناس كويسة جدا في حياتنا ومش بيربطنا بهم صلة قرابة ولا حاجة، وبتلاقيهم واقفين جنبك في أحلك وأصعب المواقف وبيبقوا سند لك وبيكونوا أكتر من الأخوات ودول بيبقوا نعمة ورزق ربنا يديمهم دائما في حياتنا لكن أنا بتكلم بصفة عامة لأن مش كل الناس محظوظة بإنها تلاقي ناس كويسة في حياتها …

وعلي فكرة وجود ناس نحبهم ويحبونا ده شئ مهم من غيره تقريبا مفيش حياة وعلاقتك الجيدة بالناس اللي بتخليك تعدي من أزمات كتيرة وبشوف دائما إن الإنسان دائما محتاج ناس حواليه تحسسه بالأمان والسند والدعم علشان يقدر يعيش بشكل سوي…

بس سبحان مقلب القلوب هرجع وأقول مفيش ثوابت في العلاقات ومفيش حب حد أنت بتملكه أو تضمنه غير الحب اللي اتكلمت عنه…

بصفة عامة الحب الحقيقي فعلا هو اللي مش مرتبط بأسباب أو ظروف لو انتهت هو كمان يبقي انتهي، لكن طول ما في أسباب اعرف إنه حب زائل وهينتهي بمجرد زوال الأسباب دي …

ولو فعلا عرفت تقدر وتعرف حب والدك ووالدتك لك وتشعر به فهو ده اللي هيخليك قادر علي حب الآخرين لأن الحب ده زي أي بناء لو أساسه مش موجود يبقي هو مش موجود والأساس هنا هو الحب الفطري اللي اتكلمت عنه…

خاب وخسر اللي عاش حياته واتلهي فيها ومعرفش معني ولا قيمة حب والده ووالدته له…

#Unconditional_love

#Mennatallah_AlMisherfi

#حب_غير_مشروط

Mennatallah Al Misherfi

 

  1. admin111 يقول

    يقال إن الله لما خلق الكون، خلق عرشه سبحانه، ثم خلق القلم، و أمر الله القلم اكتب ( لا اله الا الله .. محمد رسول الله )
    … فلم يكتب القلم ، فأمره الله أن يكتب ثانيا ثم أمره سبحانه أن يكتب ثالثا ….
    فنطق القلم محدثا الخالق سبحانه .. وكيف اكتب اسم بجوار اسمك على عرشك يا الله
    فقال سبحانه : أكتب يا قلم أنه محمد حبيبي … فلولاه يا قلم لما خلقتك ولما خلقت العرش ولما خلقت الكون كله
    لقد خلقنا جميعا بسبب حب الخالق لسيد الخلق صل الله عليه و على اله وصحبه وسلم تسليما كثيرا 🕋
    للحب خلق الله الكون وبالحب يحيا وبدونه يفني الكون كله – رغم أن الرواية قد تكون غير حقيقية الا أننى أؤمن بأن الحب هو سبب خلق الكون ولولا محبة الله للبشر لما ادخلهم الجنة برحمته.
    خالص تحياتي وتقديري لكلماتكم – معتز الشناوى

    1. منة الله المشيرفي يقول

      تسلم يا أستاذ معتز وشكرا جزيلا لحضرتك

اترك تعليق

يرجي التسجيل لترك تعليقك

شكرا للتعليق