منى رضوان تكتب : إبحث عن الخازوق – مشاهدات حياتية لمهندسة مصرية

2

 

انا متخرجة من كلية الهندسة و في الكلية خدنا كمهمندسين مواد كتير في سنين الدراسة من اول إعدادي لحد البكالوريوس .
بعد ما اتخرجت والتحقت بالعمل و تدرجت فيه فهمت كتير عن الحياة المهنية و ربطت حاجات نظرية كنت بدرسها في الجامعة بالحياة العملية و من واقع تجاربي كمهندسة اكتشفت ان اكتر حاجة درستها في الكلية و لقيتها في الحياة العملية هي الخوازيق…ايوة الخوازيق😊
علمياً ما هو الخازوق ؟
الخازوق هو نوع من انواع الاساسات الي ممكن يكون من مواد و خامات مختلفة ، زي خرسانه و ما هو معدني ( ستيل ) او خشب.
تستخدم الخوازيق في التربة لنقل الأحمال وبنستعملها عادة في التربة الضعيفة ، دة التعريف العلمي بتاع الخوازيق بس موضوعنا اكبر من كدة شوية لانه عن الخوازيق الحياتية مش الي درسناها في المحاضرات و الجامعة .
حقيقية مثبتة شخصياً معايا و مع دواير كبيرة من الناس ان الخوازيق بقت اسلوب حياة له اسسه و قواعده و مفاهيمه . الخوازيق بقت all over the place ، من الناس القريبة أو البعيدة أو الي حتي منعرفعمش اوي . و منها ما هو مقصود و منها الغير مقصود بس الاتنين بيضروا في الاخر . شوية مشاهدات علي الماشي:
ناس كتير مش عارفة هي عايزة ايه و كمان مش عارفة هي مش عايزة ايه ،الناس دي بتخبط و بتلّوش فينا و بتاخدنا في سكتها ، خازوق غير مقصود ساعات بس بيعلم فينا و بنبقي ضحاياه في احيان كتيرة.
الناس بتفكر في مصلحتها الاول – و دي حاجة عادية و مفهومة الي حد ما ، بس المشكلة انها بتفكر في مصلحتها اولا و ثانيا و ثالثا و بعد كدة لو ربنا بيحبك الدور هيجي عليك و دة لو مكانش الشخص من بتوع : أنا و من بعدي الطوفان.
الشطارة و الالتزام و الكفاءة مش كفاية لنمو و التقدم بتاع اي حد ، من غير سياسة و دپلوماسية و شكليات و ساعات حد يتبناك ممكن متحققش خطوات نجاح ملموسة ، من الأخر الي الي ليه ظهر مبيضربش علي بطنه ، من جد وجد و من زرع حصد و كلام كتب القراءة دة في المدينة الفاضلة و الواقع اليوم اننا مش في يوتوپيا .
الزحمة و المرور واقع لن يتغير – خازوق بقي واقع ، التكنولوچيا ساعات بتساعدنا علي مواجهته فنعرف نمشي من طرق ايه امتي ، ربنا يخليلنا الست الكُمل بتاعة Google Maps .
عيلتك و أصحابك مش دائمًا عارفين الاحسن ليك ، عادة بيسقطوا تجاربهم عليك ، بينصحوا نصيحة خالصة و من القلب بس تنفعهم هم بظروفهم و حياتهم لكن انت مش هم . ودة خازوق في أسر كتير و اصحاب حوالينا و مننا.
الفلوس مبتشتريش السعادة ، دة خازرق مغلف بكلمات رنانة 😂 علشان الفلوس مهمة و بتفرق في الحياة و ساعات الفلوس بتجيب سعادة علشان بشكل غير مباشر بتجيب حاجات زي البيوت و العربيات و الدهب و الياقوت و المرجان، و كمان بتسهل حاجات في الدنيا زي الجواز والطلاق و دول بيجيبوا سعادة احيانا.
خدعوك فقالوا : انك لما تكبر وتشتغل هتعمل الي نفسك فيه ، اموت و اعرف بيجيبوا الكلام دي منين بس.
مفيش اهتمام فجأة ، ورا كل اهتمام غير عادي طلب او خدمة او مصلحة ، مش حب فجأة علي فكرة.
عادة الإيميلات المتستفة الطويلة عربي او أنجليزي او اي لغة مهما كانت دة خازوق بس مكتوب . بتبدأ عادة بجملة : As per our conversation .
تاخد الي بيحبك ، تاخد الي بتحبه كلها خوازيق .
تتجوز عن حب ، تتجوز صالونات ، تتجور جواز مصلحة ، تتجوز خواجة او خواجية او متتجوزش خالص ، ممكن في كل هذه الأحتمالات سالفة الذكر تاخد خازوق برضه ، هي زي البطيخة.
لما تلاقي الحاجة ماشية كويس و الموضوع سواء شغل او غيره مفيهوش لعبكة ولا نفسنة ولا خطط و مؤامرات ، استعد كدة و خد نفس عميق و خلي روحك رياضية علشان الخازوق قرب.
العشم و الخازوق مرتبطين ببعض بعلاقة طردية ، كل ما زاد العشم بيكون الخازوق اكثر شدة.
يأتي الخازوق علي هيئة شخص او حاجة و في خازوق كومبو بيجمع الأتنين او خازوق مزدوج المفعول زي مثلاً انك تخاف تاخد خطوة تتخزوق او تخاف تفضل في مكانك فتتخزوق برضه .
السعادة شخص ، خازوق تتوارثه الأجيال ، علي فكرة ممكن السعادة تكون اكلة او صُحبة جميلة او رضا و سلام نفسي عند البني آدم.
في الهندسة كل ما كانت الخوازيق عميقة كان المبني اثبت و اقوي في اساساته لكن في الحياة عمقها بيبقي مشكلة لانها بتعلم فينا ، دة حتي أحمد مكي غني أغنية عن الخوازيق الصح .
الجانب المشرق الوحيد في الموضوع انك لو سألت اي مهندس هيقولك علشان تبني اساس قوي و سليم يبقي لازم خوازيق في الأول 😊
انا بقترح نعمل group therapy لتقبل الخوازيق و التعود عليها واهو منها نستفيد من تجارب بعض و نتأقلم علي وجود الخوازيق في حياتنا و نبقي متخزوقين & proud .
#إبحث_عن_الخازوق

  1. حنان حاتم يقول

    خازوق حبنا 😍😍😍 تحياتي ليكي دايما يا اجمل وامتع كاتبه

  2. دال يقول

    على فكرة الست Google maps نفسها ساعات بتبقى خازوق كبير. خاصة في أماكن زي المعادي. بتوه بلد

اترك تعليق

يرجي التسجيل لترك تعليقك

شكرا للتعليق