ناس كتير فاكرة ان اقصي أمانينا اننا نلاقي فارس احلامنا الي هيجلنا علي حصان أبيض و تكتمل قصة الحب الملتهب و المشاعر و الرومانسيات بس في الواقع ان في ناس أمانيها من نوع تاني خالص زي انها مثلاً تاكل و متتخنش .
أمنية فارس الأحلام دي طبعاً أمنية جميلة بس مش معقولة الحصان الأبيض يفطس من وزن ست الحسن أول ما تركب مع الفارس علي الحصان.
علي دخلة الشتا بتبقي امنيتي هي انيّ اكل و متخنش و ببقي حاطة هدف محدد هو انيّ اخس قبل الشتا علشان فصل الشتا كدة كدة بنتحول فيه لدوائر مكتملة الأستدارة فعلي الأقل نكون خسينا الي تخناه في فصل الصيف و ما قبله.
في الموسم دة بنبدأ نعمل دايت و تلاقي الرِجل زادت علي دكاترة الرچيم و علي چروپات الفيس بوك و الواتس اپ الخاصة بالتغذية او إنقاص الوزن او الرياضة او كلهم متفرقين او مجتمعين.
اكبر تحدي في الدايت الي قبل الشتا دة بقي انه دايت جاي بعد ايام عز و نغنغة. بداية من رمضان و عزوماته علي الفطار و السحور الي فيها ما لذ و طاب من الحلو و الحادق و المحمر و المشمر و الشوربات و الكنافات و البشملات و المحاشي و الفول و البيض و الطعمية و الجبنة الي بالطماطم و الاجبان و كافة شيء يخطر علي بالك . بعد رمضان بيجي العيد الصغير الي بتبدأ معاه مرحلة الكحك و اديني بقي مترحمنيش كحك سادة و عجمية و عين جمل و غُريبة. تخّلص العيد فننتقل بعدها لمرحلة الصيف و المصايف و تجميعة الناس و الاصحاب و الأهل حول سفرة الفطار و الغدا و العشا و حوارات ان البحر بيجوع و الصيف بيحب اللمة و اللمة بتفتح النفس و فتحة النفس بتأكل و الحاجات الي انتوا عارفينها دي .هوپ يخش علينا العيد الكبير و الفتة و اللحمة و كل ما تشتهي الأنفس .
بعد العيد الكبير بنبدأ مرحلة الصحوة و ادراك الي عملناه في نفسنا و مع تكرار ان هدومنا مش قافلة علينا و اننا لما بنعدي قدام مراية بنسورق من انبعاج اجسامنا بتبدأ اول خطوات اليقظة و مواجهة الحقيقية الي لا مفر منها و هي اننا لازم نعمل دايت .
و بعد كل هذا النعيم الي عشناه و بلا اي مقدمات نلاقي نفسنا اقصي امانينا ثمرة فاكهة!!
بنفضل نشجع نفسنا و نستجمع قوانا و بنحاول نقوي ارادتنا علشان الرحلة الي علي وشك ان تبدأ محتاجة نفس طويل .
و يا ولاداااه علينا بقي ، بدل فطار الفول و الطعمية او الأوملت و الكرواسون بالجبنة و الزعتر و لاتيه او شاي بلبن بنفطر جبنة قريش و عيش سن ناشف و شاي او قهوة من غير سكر ، و بدل الغدا الي فيه لازانيا و پانيه و سمبوسة و ورق عنب و بطاطس و فراخ محمرة و بامية متسبكة بناكل قطعة لحمة او فراخ .١٥جرام مشوية او معمولة ني في ني و بتطلع مأددة و بتنكمش للنص و معاها ٣ معالق رز او مكرونة مسلوقة او بني و طبق سلطة خضرا ، و العشا بعد مكان ساندوتشات جبنة سايحة او فينو بالجبنة الرومي او بيض او جبنة بالطماطم او نيوتيلا يبقي واحدة زبادي لايت و تفاحة ????
صدمة كبيرة جداً ان الواحد بعد ما لذ و طاب ياكل الأكل بتاع الرچيم و فوق دة لازم يبقي بيلعب رياضة و بيشرب مية كتير و فارد وشه و راضي ببرنامجه الغذائي و مُقبل علي الحياة…تحدي كبير انك تعد تأرأض كمية الخس و الخيار دول ، دة الواحد بيصدع من سماع صوت جرش الأكل في بقه و فكه بيوجعه من المضغ البطيء دة غير انه بيحس انه بياكل حشائش و نباتات مش خضروات. انا عن نفسي بحس اني رشيدة المعزة بتاعة بكار من كم الورقيات الي مقررة عليا ، و يوم ما ادلعّ اوي و تكون المينيو متجددة يبقي الجرجير بالجبنة القريش دة فطاري…احنا بنتهان و الله و بنتذل جامد ????
في خضم ما دة اكلنا تلاقي حد بقه بيلعب ٢٤ ساعة و هاري نفسه پيتزا و مناقيش و معجنات و ساندوتشات كل الي يخطر علي بالك ، بياكل و يطحن كل الكميات الي نفسه فيها في اي وقت و كل وقت و مبيتخنش بالمرة ،. و ما يزيد من سخرية القدر بقي انك لما تستفسر يقولك اصل انا حرقي عالي … حرقك عالي في عينك حضرتك انت حارق دمنا و عاملنا عقدة من الزْلط الي بتزلطه و مش باين عليك، كمية الرز الي بتاكلها في وجبة اد كمية الرز بتاعتنا في اسبوع و انت بتخس و احنا بنربرب يا سيدي الفاضل.
او الي يقولك اصل انا بروح الچيم مرتين في الأسبوع … لا جبت الديب من ديله انت كدة ! ما احنا بنروحه يوم اه و يوم لأ و بعد ما نفرهد بنخس نص كيلو و غالباً بنتخنه مع اول قطمة من الوجبة الفري.
و يا سلام بقي لما تعد تسمع ان ازاي الشخص خس و بقي احسن في نومه و مزاجه بعد ما عمل الديتوكس و شرب كمية مية بحلقات الخيار و اللمون او كرفس علي بقدونس مضروب في الخلاط و ان ازاي المشروبات الجهنمية دي خلته بلا سموم في الجسم … بذمتك دة كلام ؟ الديتوكس بيعمل تحسن في المزاج؟! اومال الشوكلاتة بتعمل ايه علي كدة؟ الكرفس و البقدونس دة مشروب ؟ اومال عصير المانجا الي فيها حتت مانجا دي ايه سيادتك؟!
و يا حلاوتك بقي لو ربنا و قعك في دايت من الدايتس التريندنج ، اشي دوكان و اتكنز و صيام متقطع و كيتو كلاسك او كيتو مش كلاسك و فيچن و دايت قليل الكاربوهيدرات و دايت نباتي و دايت قرطاي و الدايت المتوازن ودايتات يا اخي بتطلع كل يوم علينا من كل الأتجاهات…مفيش دايت الزر بالشركسية ليه ؟ ولا دايت الشعرية بالمكسرات و كفتة داود . باشا بالصلصة؟المهم ان حالة الدايت دي لها اعراض زيها زي دور البرد ؛ اولاً بنعد يومين قبل الدايت علي حسّ اننا هنبدأ و ناكل اكل بأفترا، قال يعني احنا محرومين منه فبناكل علشان نقدر نكمل المشوار الي اصلاً مبتداش.
بعدها بنعّرف الصغير و الكبير و عيلة العيلة و حتي عم عبده البواب اننا هنبدأ رچيم ، و نتقمص دور الشباب الهيلثي و ننزل نعمل شوپنج الدايت و دي لوحدها فقرة هزلية بنجيب فيها كل ما تملكه يدانا من الأكل قليل السعرات كثير الألياف و ندفع دم قلبنا.
بعد كدة نحاول نخلي حد او كذا حد يبتدي معانا و نعمل حشد و دعاية لدايتنا المرتقب علشان نشد من آزر بعض و نبقي متحدين كخلية قوية ضد كائنات الكالوريز الشريرة الصغيرة اللعينة الي بتخش دواليبنا و تضيق هدومنا.
و يجي اليوم المنتظر و نبدأ رحلة الكفاح و الضني و نبقي مع كل وجبة بنحسب الكالوريز الي فيها علشان منعديش العدد المسموح …و تفضل الأيام شبه بعض و الي نقوم فيه ننام فيه و هكذا.
طبعاً في ناس كتير بتقع في السكة و مبتكملش خالص و ناس أقلية الي بيقدروا يتمسكوا بال goal بتاعهم.
قرار الدايت دة من اكتر القرارت الي الواحد ممكن ياخده و يتراجع فيها في يومها او بعده بساعات ، مع اول پيتزاية تشوفها بترفع الراية البيضا و تقول خلال هبتدي من بكرة????.
بحلم ولا يكتر علي ربنا ان يبقي في دايت people friendly و ما يطلق عليه دايت صديق للأنسان ، حاجة كدة متحرمناش الحرمان الي بعده في لحظة تهور بناكل الأخضر و اليابس و نفسي يبقي الي بيعمل دايت يقدر يعيش عادي و ياكل برة من غير ما شكل طبقه يجيبله حسرة و يعد يبص علي اطباق الي حواليه يمين و شمال ، و اكتر حاجة كمان نفسي فيها ان اصدقاء السوء بتوع : يا سيدي دوق بس دي او يصّر انك تاكل معاه طبق بطاطس محمرة او حتتة ميلفيه سكر انهم يرتجعوا و يسيبونا في حالنا ، احنا متلصمين و علي شعرة ارجوكم حسوا بينا.
اتمني مع تقدم العلم و مرور الأيام الدكاترة يخترعوا اقراص مكتوب عليها الوزن الي عايزيين ننزلها في اليوم و ناخدها و تحدث المعجزة ، قادر يا رب ما تكسفنا و تبعتلنا حد ممكن يعمل القرص السحري دة.
بكتبلكم المقال دة و انا باكل عدد ٦ لوزة نية ، ايوة ٦ لوزة بعد ما كان العادي تبتدي تحسب بعد ربع كيلو من المكسرات المحمصة… يلا معلش الرشاقة بتمن و محدش بياكلها بالساهل وانا بقيت احسن بعد ما فضفضت معاكم و فكيت عن نفسي بالكلمتين دول.
دعواتكم اصمد و استمر يا ريت و مروحش اجيب كرسي و اقعد قدام التلاجة في لحظة ضعف انسان جعان.
مش عارفة يا اخي بنيجي علي الأكل ليه مع اننا مشوفناش منه اي حاجة وحشة ????
#الدايت_للجدعان
#كرفس_بالجنزبيل
#ياعيني_عالحلو_لما_تبهدلوا_الأيام
اشترك في نشرتنا الإلكترونية مجاناً
اشترك في نشرتنا الإلكترونية مجاناً.
الجمعة, أبريل 26, 2024
آخر الاخبار
- سلة زعيم الثغر تواجه الزمالك في قبل نهائي كأس مصر يوم 30 إبريل الجارى
- مجلس الصيد يكرم فريق مواليد ٢٠٠٩ لكرة القدم
- مصيلحى ينظم رحلة للجماهير لاستاد البرج
- رحلة لجماهير الثغر.. لمشاهدة لقاء الاتحاد السكندري و الإسماعيلى بإستاد برج العرب
- سموحة جاهز لمواجهة بلدية المحلة الهداف احمد على امين يبحث عن فرصة للمشاركة
- اطلاق اسم السباح نبيل الشاذلي علي مجمع حمامات السباحة بالنادى الاوليمبى
- فيوتشر يتخطى فاركو بهدفين ويصعد للمركز الثامن
- فوز فريق الاتحاد السكندرى ٢٠٠٧ على الزمالك بالقاهرة ٢-١