منى رضوان تكتب : المغامرون العشرة – لغز العشر ستات

1

 

المغامرون الخمسة مجموعة قصصية بولسية الفها كاتب اسمه محمود سالم في السبعينات ، الابطال سنهم من ٩ الي ١٤ سنة، هم نوسة ولوزة وتختخ وعاطف ومحب وكلبهم الأسود زنجر.
مع كل مغامرة مكتوبة كان بيبقي في مقدمة بتقول : من هم المغامرون الخمسة؟ إنهم أصدقاؤك الذين يتدخلون لحل الألغاز والإيقاع باللصوص وإنقاذ المظلومين.
السلسة بتاعة المغامرون الخمسة لاقت شهرة و كان لها متابعين في كل الوطن العربي و شكّلت جزء كبير من طفولة و مراهقة الجيل دة وقتها.
انا مش هكلمكم عن المغامرون الخمسة ، موضوعي عن مغامرون تانين بس هم مش خمسة ، مش ولاد و بنات ، مش معاهم كلب او بمعني ادق كلابهم مش من ضمن فريق المغامرون العشرة .
اولاً هم كلهم ستات في الأربيعنات من العمر مش اطفال و لا مراهقيين ، و مغامراتهم مع بعض مش ضد اللصوص و لا لأنقاذ المظلومين ، مغامراتهم حياتية بحتة بيحلوا فيها بعض الغاز الدنيا و بيعشوا قصصها سوا.
( د غ ) طبيبة ، ام لثلاثة بنات و ست لطيفة و جدعة و صاحبة صاحبها ، بتحب الناس بس مش اي ناس و شخصية واضحة مفيهاش دهاليز.
( م ب ) مهندسة و ام لبنتين ، ست شيك و بنت اصول و جميلة برة و جوة ، فرفوشة و تحب الناس السهلة البسيطة ، مثقفة و لينة القلب و ممكن تجرب حاجات جديدة بأقدام .
( ر س ) صيدلانية و ام لتلاتة بنات و انسانة بلسمية الطباع كل كلامها و تعاملاتها غاية في الرقة لدرجة ان الواحد بيحس انه راجل جمبها .
( د م ) مهندسة ، شخصية منظمة لأبعد الحدود و افكارها مترتبة و محبة للقطط و الكلاب من الطراز الأول ، ام لولدين ، تحب الثقافة و الفن و ست حبوبة .
( س ه ) مصرفية مرموقة وام لأربعة اولاد ، ست مُحبة للحياة و فيها حتة اهتمام بكل من تحب و بتعبر عن دة بكل وضوح ، موزونة في تناولها للأمور و تحس انها تنفع تبقي اختك او صاحبتك المقربة .
( ش ب ) ام لولد و بنت و بتاعة امن تكنولوچيا المعلومات ، مالية مركزها و الواحد يتفشخر بيها ، منتقية جداً للناس الي بتدخلهم في دايرتها و لما بتاخد عليك بتشوف جوانب فيها خفة ظل و حب خاص من القلب و يصل للقلب.
( ن ل ) محاسبة و عمود اساسي في المجموعة و هي عبارة عن كتلة ايجابية تمشي علي قدمين و اكتر حد مدهش من كم المفاجآت في شخصيتها و تأثيرها الحلو علي الي حواليها . رسمياً معندهاش ولاد انما الحقيقية ان مشاعر الأمومة عندها تفوق كثير من الأمهات .
( م ر ) مهندسة ديكور و عندها ذوق في الالوان و ايه يمشي مع ايه و بتطّلع من الفسيخ شربات . و اخف دم علي الأطلاق في المجموعة ، ام لتلاتة اولاد ، مينفعش اي تجمع من غيرها ، ست جدعة و مش واخدة الدنيا علي صدرها ، ملكة القفشات و القلش الهادف ، برج السرطان و دماغ مختلفة.
( ر س ) ، مهندسة مهاجرة لاستراليا من كذا سنة ، ام لولدين و مثال للست الي جامعة بين تقدم الناس الي برة و اصالة الناس الي جوة ، دمها خفيف و تلقطها و هي طايرة و لها خبرة حياتية كبيرة و اذا عملت اي عمل تتقنه و متحتاجش تبص وراها.
و اخيراً ( م ر ) مهندسة ، معندهاش ولاد بس عندها كلب معتبراه ابنها بتحبه حب خيالي و مطلعة طاقة مشاعرها فيه ، شخصيتها بكيزة كدة في نفسها و متعهد الترفيه في المجموعة ، بتحب الحياة و الناس و جوزائية بس مش مجنونة .
زي ما انتوا شايفين كدة المجموعة عبارة عن توليفة غير تقليدية فيها كل حاجة و عكسها ، طباع و شخصيات هادية علي مش هادية و نمكية علي بسيطة و قلاشة علي بكيزة و منظمة علي عشوائية و حاجة سمك لبن تمر هندي خالص.
الفريد في مجموعة المغامرون العشرة انهم علي اخلافاتهم كلها متوحدين علي قيمة مهمة و هي قيمة الصداقة الي مخلية حياة كل واحدة فيهم احسن من قبل كدة ، مجموعة متوحدة حول هدف و هو ان الواحد في الدنيا محتاج ناس معاه يشيلوه و يشيلهم ، يتقبلوه زي ما هو و يحبوه بعيوبه قبل مزاياه ، و اهم حاجة انهم عارفين ان الحياة رحلة محتاجة صُحبة و ان محدش هيقدر يعيش لوحده من غير ونيس و اصدقاء يخلوا للحياة معني.
مجموعة المغامرون العشرة دول اثبتوا ان الصداقة مواقف مش عشرة عُمر و ان ياما ناس عرفناها سنين مبيبقوش هم السند و الظهر وقت الشدة ، مجموعة متقبلين اختلافاتهم قبل تشبهاتهم و اخيراً و قبل كل شيء ، مجموعة مهما كانوا فين و بيعملوا ايه اوقاتهم سوا بتبقي احلي الأوقات.
كل واحدة من المغامرون العشرة عندها تحديات في حياتها و مشاكل عاشتها و لسة بتعيشها بس لما الواحد مبيبقاش لوحده في الرحلة بتهون المشاكل حتي لو متحلتش.
اذا كان المغامرون الخمسة كانوا بيعرفوا اللصوص و بيحموا المظلومين و بيحلوا الألغاز فالمغامرون العشرة بيحموا بعض و بيعرفوا اللصوص برضه و بيشكلوا سياج واقي حوالين بعض .
الدنيا رحلة مش وجهة ، طريق كل الناس بتمشي فيه فلما تلاقي ناس تمشي فيه معاك بتهون المشقة و بيتولد مشاعر حلوة الواحد بيحس من خلالها ان الدنيا بخير.
مفيش مرة اي حد من المغامرون العشرة حصله حاجة الا لما الباقي كان معاه و حواليه و اقفين وقفة اخوات و اصحاب مش مجاملات و مظاهر.
حياتي بوجود المغامرون التسعة معايا اختلفت للأحسن و بقي فيها ملمح منهم و بصمة و جو خاص نابع من الشخصيات الجميلة الي وراها.
أيها المغامرون العشرة ، انتوا احسن ناس و انا بحبكم و مدينة بكتير من السعادة الي حواليا بسببكم. ان شاء الله دايما مع بعض نعيش الحياة و نخلق ذكريات جديدة.
اعزائي القراء ، انا واثقة انكم زيي بالضبط حواليكم مغامرون معاكم في الحياة و اصدقاء اوفياء بيمثلوا جزء كبير من حياتكم و ذكراياتكم ، ربنا يحفظ لنا اصدقاءنا و يجعلهم دايماً في زيادة مش نقصان و يجمعنا بالناس الي تبقي خير سند لنا في الرحلة.
#المغامرون_العشرة
#أعرف_صاحبك_و_عّلم_عليه
#الصداقة_مواقف_مش_عشرة_عمر

  1. Tareq يقول

    بصراحة مقال طريقة سرده جميلة و جرتني لحد ما خلص، و زعلت انه خلص

اترك تعليق

يرجي التسجيل لترك تعليقك

شكرا للتعليق