منى رضوان تكتب : انت جيت ” شهقة ” يا رمضان ؟

0

ايوة رمضان ابتدي و ادينا في اول اسبوع و ان شاء الله هنصوم و نصلي في بيوتنا و للأسف السنة دي مش هنعرف نشوف حبايبنا واهلنا ولكن هم دايماً في قلوبنا و افكارنا .
احب افكركم ببعض النقاط المهمة الخاصة برمضان :
لازم كلنا ضروري نعمل سوفتوير update لنفسنا و ننزل احدث اصدار نسخة رمضان ٢٠٢٠، و دة فيه التحديثات التالية: بدل اي شتيمة هنقول اللهم اني صائم ، برنامج الاذان هينزل في ال applications و كذلك كلنا هنزل امساكية رمضان علي تيلفوناتنا .
لازم نصوم عن الكلام الوحش و نركز في الجزئية دي علشان لو قلنا اللهم اني صائم وشتمنا في سرنا يبقي برضه شتمنا فلازم نصفي النية و نفّوت للناس علي قد ما نقدر.
من ١ رمضان ل ٣٠ رمضان ممكن نستبدل جملة ” شوفوا اي يوم و نفطر او نتسحر فيه سوا ” المشهورة بجملة ان شاء الله نفطر او نتسحر سوا قريباً او يكون الفطار و السحور virtual .
محتاجين نتجنب الناس الي بتشرب كوفي او سجاير اول ما تفتح عينها ، دول في الظروف العادية بيبقوا stress agents فما بالكم في زمن الكورونا هيبقوا عاملين ازاي . دول محتاجين اول اسبوع للتصالح مع انفسهم و الناس و ممكن من تاني اسبوع يصلحوا للاندماج في المجتمع .
محدش يتفرج علي رامز ، مجنون رسمي بالفعل و احنا يدوبك بنحاول نحتفظ بالربع الباقي من عقلنا قبل ما يضرب.
في بعض الناس بيجيلها انفصام في الشخصية في رمضان ، قبل الفطار يحطوا ادعية و بعد الفطار يحطوا اغاني تترات المسلسلات علي الفيس بوك ، يا ريت دول نعملهم unfriend او unfollow، احنا مش ناقصين لخبطة .
رمضان شهر روحانيات و كدة فمبدأياً كل الناس بتبقي عارفة معاد صلاة الفجر و المغرب بالدقيقة و الثانية الباقي بقي شكليات .
رمضان و المسلسلات : مش فاهمة ازاي الممثلين كملوا تصوير في خضم الأزمة ، انا كمني مش هتابع ياسمين صبري لأنها مبتعرفش تمثل و مش هتابع يسرا و دينا الشربيني لان الواحد نفسياً تعبان مش عايز يشوف ادمان و خيانة و غدر . مش بتابع غير ليالينا ٨٠ و نحب تاني ليه ، عايزين رومانسيات بقي او قصص حلوة حتي لو النجوم فيها أوڤر، عايزين نهرب من الواقع لدنيا الاحلام شوية مش تبقي مسدودة في وشنا من مجامعيه . كمان سمعت ان نيللي كريم قررت تخّف علينا السنة دي و تقدر ظروفنا و تعمل حاجة كوميدي بدل السيكوپاتية الي كانت بتغّب بيها علينا كل سنة ، مش عارفة دة صحيح ولا لأ ، لو صح يبقي كويس ممكن اشوفه . أخيراً سمعت ان مسلسل يوسف الشريف حلو و الريڤيوز عليه ممتازة ، المسلسل عمل قلق و الخارجية الاسرائيلية احتجت عليه لتصويره للمستقبل بعد زوال دولة إسرائيل ، يبقي دة مسلسل لازم يتشاف خصوصاً لمحبي الخيال العلمي ( الي انا مش منهم ) لأن يوسف عبارة عن روبوت بس طالما القدس هتتحرر يبقي اشوفه و نص.
رمضان و الأعلانات : لو الي بيعملوا الاعلانات عرفوا احنا بنعمل ايه في وقت اذاعة الاعلانات في وسط المسلسلات مكنوش هيصرفوا عليها مليم ، وقت الأعلانات هو انسب وقت انك تروح تعملك حاجة تشربها او تاكلها او تتكلم في التيلفون او تدخل الحمام ، هي بالفعل commercial break بس بناخد فيه بريك نخلص فيه الي ورانا.
في رمضان لو حصل و قابلت اي حد او شفت ناس جديدة ( دة لو خرجت اساسا) متقلقش، دول الستات و الرجالة اصحابك الي انت اصلاً عارفهم بس من غير make up و كوافيرات و حلاقين فنصيحة احسن متعلقش علي شكلهم ، ان شاء الله شدة و تزول .
لما حد يقولك صحيني علي الفطار يبقي صحيني علي الفطار – يا ريت محدش يجّود من عنده و يصحيه بدري نص ساعة ، بتقلب خناقة .
فانوس رمضان مهم في رمضان طبعاً – بس يا ريت نفرق بين الفانوس و الكهارب ، الفانوس بيبقي معاه مسحراتي انما الكهارب بيبقي معاها رقاصة .
لو قررت تدلع نفسك و تجيب حاجة حلوة يا ريت تفتكر ان الكنافة بالنيوتيلا و الرد ڤلڤت دي بدعة ، فياريت كل واحد يعيش عيشه اهله و خليك في الكنافة و البقلاوة و البسبوسة بتاعة زمان الي احنا عارفينها دي .
جملة صايم ولا زي كل سنة دي بطلت من السبعينات و الي بيقولها يجوز عليه الحد ، التجديد مطلوب يا ريت.
كل الأسرة قاعدة وشها في وش بعض فعلشان متفطريش يا ست الكل و تقدري تتعاملي مع تكشيرة الراجل المصري الاصيل يا ريت تقولي المعوذتين اول ما تلاقيه في وشك ، تعاملي مع هذا الپووتوكول لحد ما الأزمة تعدي ، في عيال في النص فمش عايزين نسب الطلاق تزيد .
المشمش في رمضان اسمه قمر الدين ، و المكسرات اسمها ياميش و شنطة رمضان اسمها Ramdan Box
شهر رمضان هو الشهر الوحيد الي الست المصرية بتستعمل فيه النيش ، بتطلع طقم الخشاف الي محطوط جواه فيا ريت تتصورا سلفي معاه او جمبه لانه قطعة اثرية في البيت المصري بتُستعمل من السنة للسنة ، و للعلم طقم الشوربة و الخشاف حاجة واحدة علي فكرة.
اي حد هيسأل اي حد علي اي حاجة هتتعمل امتي الاجابة الصحيحة هي : بعد العيد او بعد الحظر ما يخلص ايهما اقرب .
مفيش اي حاجة في الدنيا تستاهل انك تفطر شوربة و سلطة و تتسحر زبادي لايت و ثمرة فاكهة ، ميبقاش كورونا و حبسة و جوع .
اشهر سؤال في رمضان : هنفطر ايه النهاردة .
رجاء شخصي : محدش يبعت يقولي سامحني علشان رمضان – سامحتكم قبل كدة و لسة زي ما انتوا.
لما حد يسأل حد تشرب ايه يا ريت يرد عليه رد واضح ، حاجة ساقعة دة مش رد اسمها پيپسي حضرتك
#رمضان_يجمعنا_افتراضياً #تبا_للرچيم #انت_جيت_شهقة_يا_رمضان

اترك تعليق

يرجي التسجيل لترك تعليقك

شكرا للتعليق