الجواز و تقاليده و موروثاته جزء لا يتجزأ من القصص الي بنعيشها في مجتمعنا الشرقي ، تقاليد منها ما هو بالي و عتيق و يقتل الهدف الأساسي من الجواز و رسالته المتمثلة في كونه مودة ورحمة.
سرحت في عقل بالي و تخيلت قصة زواج تابعها العالم و مّصرتها . تخيلت جواز ميجان و الأمير هاري in Egyptian Style .
الامير هاري ابن اميرة القلوب ديانا و الامير تشارلز و حفيد الملكة اليزابيث ملكة المملكة المتحدة اتجوز واحدة ست اكبر منه ، و مش من نفس جنسيته ، اصولها من عرق افريقي ، من عامة الشعب ، و كمان مطلقة.
– تفتكروا الملكة قالتله ليه تعمل كدة هو انت ابن اي حد ، خليك ناصح و خد واحدة ضغنونة تربيها علي ايديك ؟
ولا قالتله دي سمرا متشوفلنا واحدة بيضا كدة و قشطة علشان ولادك يطلعوا حلوين ؟
ولا تفتكروا قالتله قلبي و ربي غضبانين عليك تتجوز مطلقة ليه ، ناقصك ايد ولا ناقصك رجل ؟
و بالنسبة للفرح ماله سوكيتي كدة ؟! ايه العريس عليه اقساط فبيوفر في المصاريف ؟ فين النجم هشام عباس يخش علينا باسماء الله الحسني و يبارك و يهني ؟ ولا فين الست ماجدة الرومي تقولها طُلي بالابيض طُلي ؟ العروسة داخلة كدة هُس هُس ولا اكنها داخلة علي محاضرة متأخر و مش عايزة تعمل صوت .
وايه الفستان دة ؟! ايه الملكة اليزابيث معندهاش ترزي ملكي يشغل الفستان و يطرزه بدل ما هو سادة و فاضي كدة . فين هاني البحيري ميخليش سنتمتر من القماش باين ويملاه ترتر و لولي و بُربرء ، ولو مش عايزين هاني ممكن اي مصمم ازياء من بيروت يجي ينًطق الفستان شوية.
اما بالنسبة للميك اپ، انا مش فاهمة جارة العروسة الي واخدة كورس عاملهولها و لا ايه ؟! مفيش الوان خالص ، فين الروچ الملعلع و الفوانديشن الي بيقلب علي محارة و فين الاحمر الي في الخدود و الاي شادو بتاع العين المسحوبة ، فين الرموش المتركبة ؟! شكل هاري مرضيش يدفع تمن الميك اپ و قال لميجان المكيب علي العروسة وهي الفلوس خسعت معاها وحطتها كلها في الجهاز والنيش وطقم الصيني
وايه التسريحة دي؟! وفين اللون ال ash blond وال highlights ، لامة شعرك كدة اكن كان عندك فومين غسيل و شوية مواعين في الحوض.
اما بالنسبة لحزمة الكرفس الي انت ماسكاها ؟ دي هتحدفيها ازاي و صاحباتك تطير تلقفها و تقرصك في ركبتك علشان تحصلك في جمعتك ؟ .
وانت يا هاري شعرك هايش و حالتك بالبلا كدة ليه ، مش كنت تروح تضبط نفسك و تلزق شعرك كدة و تعمل عريس، و قاعد مش علي بعضك و تبص للعروسة و عنيك كلها حب ، مش تتقل كدة و تدبحلها القطة في ليلة عرسها.
اما بالنسبة لبدلة الدكاترة بتاعتك و الباچات الي عليها ، دي ليلة العمر ، طلع من تحت البلاطة و اشتري بدلة كسفتنا يا موكوس.
بالنسبة للأكل بقي حاجة قورديحي علي الأخر ، كل المعازيم دول جايين من اخر الدنيا و لابسين برانيط بشئ و شويات و متأنتكين و قاعدين مفيش اي حاجة ينئنئوا فيها ، مفيش شوية فردق و لوزدق و كاچو ، ولا اطباق كدة فيها كوبيبتين تلاتة و ميمنعش ورق عنب مَزة و لا حتي شوية نواشف يزلطوها، طيب بلاش اكل ، اي حاجة يشربوها دول ضيوفكم برضه ، عصاير ، موز بالبن او حتي زبادي خلاط .
وفين اهل الفن و الطرب ؟ طيب فين فقرة الصور الي كلها فضايح ؟ الي بتتعرض علي الپروچيكتور دي ، الصور الي بيطلع فيها العريس و العروسة لابسين پامپرز في احسن الظروف ؟!
طيب فين فقرة الدبل و الشبكة الي مدفوع فيها شيئ و شويات ؟! طيب فين التورتة ال ٢٥ دور و فين موسيقي التورتة و رقصة السيوف ؟!
والبوفيه فين البوفيه ! مفيش؟! الناس هترّوح علي لحم بطنها كدة ؟! لا دي مش رويال ويدينج خالص دة شغل استرخاص رسمي.
احب اقول للعائلات المصرية ان الاكلشيهات الي قلنها دي ودت ولسة بتودي اجيال في داهية . بلاش كلام البغباغنات دة ، ارفعوا ايديكم و سيبوا الي عايز حاجة يعملها ، اتحضروا شوية و اقتنعوا ان طريقتكم لبست ولادكم في الحيطة وكانت ولا تزال مصدر تعاسة لاسر كاملة . بطلوا بقي التفاهة والتقاليد البالية الي تأخر شعوب و مجتمعات ، اتعلموا الدرس و خدوا العبرة قبل فوات الاوان، لقد هرمنا .
مالها لما واحد يتجوز المطلقة مش فاهمة ، بديل مثلا ولا مناخيرها ب ٣ فتحات للتنفس؟! وخير فيها ايها لما تبقي اكبر منه .
الفرح دة ممكن يبوظ اجدع جوازة مصري و ام العروسة هتتشال و تتهبد و تقولك هو انا بنتي اقل من اختها ، و جايز جدا تفركش الجوازة و لو كملت هتكدر العريس كل ما تشوف خلقته !!
ارجوكم اطلعوا منها و سيبوا الناس تحدد مصيرها ، الي ناقص في جوازة زي دي لو عندنا ان ناس تهتف جواز هاري من ميجان باطل.
اشترك في نشرتنا الإلكترونية مجاناً
اشترك في نشرتنا الإلكترونية مجاناً.
الجمعة, أبريل 19, 2024
آخر الاخبار
- فوز فريق الاتحاد السكندرى ٢٠٠٧ على الزمالك بالقاهرة ٢-١
- رحلة لجماهير الثغر.. لمشاهدة لقاء الاتحاد السكندري و الزمالك بإستاد القاهرة
- الاتحاد السكندرى يتصدر الدوري بفارق الأهداف
- حل فزورة فريش اليوم الأحد 21 رمضان.. بلد السكر والقهوة والتبغ في الكاريبي
- بحضور 600 شخص .. نادى السلام البحرى ينظم اكبر مائدة افطار على ضفاف قناة السويس ببورسعيد
- تأجيل مباراة الاتحاد السكندرى و المصرى البورسعيد لتقام يوم الخميس 4 إبريل
- سلة الاتحاد السكندري تتعاقد مع صانع الألعاب الأمريكي ” مايكل ديكسون “
- دوللي شاهين تنتهي من تسجيل أغنية “ست البنات”