منى رضوان تكتب : حلاوة زمان …عروسة حصان

0

حلاوة زمان عروسة حصان وآن الأوان تدوق يا ولاااا.. تعالى لعمك وشوف الحلاوة.. وعيط لأمك عشان الحلاوة.. وعكر في دمك عشان الحلاوة آن الأوان ودوق يا ولااا.
أغنية جميلة اجتمع فيها جمال صوت محمد قنديل و عبقرية و بساطة كلمات صلاح جاهين بمناسبة مولد النبي محمد عليه الصلاة و السلام ، كل سنة وانتم طيبين جميعا .
مع مولد النبي بترّن في دماغي جملة مؤثرة عنه تتمثل فيها حكمة بعثه للبشرية : انما بُعثت لأتمم مكارم الأخلاق .
يعني نبي المسلمين محمد عليه الصلاة و السلام جه علشان يكمل الي عمله الانبيا الي سبقوه من نشر الأخلاق و حسن المعاملة و ارساء قواعد المعاملات و نشر الخير و المحبة للذات الألهية و للناس كلها ، علشان كدة مولد النبي هو احتفال بمولد انسان استثنائي صاحب رسالة ، وان كانت جت للمسلمين خاصة لكن الأخلاق انبياءها كُتار و كلهم مولدهم عيد حتي لو انا مش من دينهم او علي ملتهم .الاخلاق اصلها ملهاش ديانة لانها ملك الأنسانية كلها و مش بمصحف او صليب او توراة.
في مصر المحروسة مولد النبي يعني حلاوة المولد ، الي بتتباع بالقطعة او بالطبق او بالكيلو ، سعرها للقطعة بيبتدي من خمسة او عشرة جنيه لحد الف جنيه او اكتر للعلبة حسب وزنها و مكوناتها و خامة العلبة و شكلها ، فعايزين نتفق اننا عاملين دايت توفيراً للنفقات علشان ملهاش لازمة المصاريف و لا ليه لازمة الُتخن لأن السعرات الحرارية فيها فظيعة ، قطعة السودانية فيها ٨٥٠ سعر حراري و اللوزية و الفزدقية فيها ٦٥٠ سعر حراري دة غير الملبن و خلافه فالطيب احسن و بلاها اكل حلاوة المولد الأنتقامي لحد ما نفضي العلب و هنكتفي اننا ناخد حتة صغيرة ناكلها و نكمل بعد كدة اكل بعنينا و نبص علي صورها .
في اتجاه بيتعامل مع مولد النبي علي انه بدعة و اتجاه اخر بيتعامل معاه انه تقليد و كلٍ له وجهة نظره . بعيداً عن مشروعيته او صحته او عدم صحته، ايه يا تري اصل حلاوة المولد تاريخيا ؟ وايه هي حلاوة المولد اصلا؟
حلاوة المولد هي نوع من الحلويات الي بتظهر في الدول الإسلامية وبالأخص في مصر في مناسبة المولد النبوي الشريف. دخلت مصر علي يد الفاطمين وساعدوا في نشرها علشان تكون حاجة حلوة يدوها للشعب و يوزعوها عليه كنوع من التقرب السياسي من عامة المصريين في ذلك الوقت ، لها عدة أنواع وأشكال واطعمة و بيدخل فيها مكسرات مع السكر و الشربات . في مثلاً الجوزية والملبن والفولية والفستقية والبندقية واللوزية والحمصية والسمسمية واللديدة.
حلاوة المولد طول عمرها مقرونة بعروسة المولد والحصان ، كتب التاريخ و التراث بتروي اصل قصة العروسة و الحصان و بتنسبها الي عهد الخليفة الفاطمي الحاكم بأمر الله، الي كان بيخرج مع واحدة من زوجاته في يوم مولد النبي، وهي لابسة أجمل الثياب ومتزينة ولابسة فستان ناصع البياض، وتاج من الياسمين فوق رأسها.
فكانت ‘ عروسة حلاوة ‘ على شكل زوجة الحاكم بأمر الله، واتحطت في قوالب الحلوى وزينوها ولبسوها ثيابا مبهجة لانها منسوبة ليوم فرح و سعد و هو يوم ميلاد النبي الاميّ محمد عليه الصلاة و السلام.
و في رواية اخري يقال ان الخليفة الحاكم بأمر الله امر بمنع الزواج إلا في المولد النبي وعلشان كدة أبدع صناع الحلوى في صناعة العرائس وتغطيتها بأجمل الهدوم وفساتين بيضاء، وأصبحت العروسة الحلاوة ليست احتفالًا بالمولد النبي بس ، دي كانت احتفالًا بموسم الزواج كمان، و كانت هدية يقدمها العريس لعروسته.
أما ‘ الحصان الحلاوة ‘ فكان يمثل شخص الخليفة الحاكم بأمر الله، وهو راكب حصانه، وشاهر سيفه وخلفه علم الدولة الإسلامية.
وكان ‘ الحصان ‘ على مر العصور رمز الفروسية والرجولة والشجاعة وبيقدموها للولاد علشان تعيش القيم دي داخل الأطفال من وهم صغيريين.
مرت الايام و السنين و بقي موروث العروسة و الحصان علامة من علامات مولد النبي.
بعيداً عن ان النبي عليه الصلاة و السلام هو النبي لديانتي الاسلامية ، فالنبي محمد حتي قبل ما يوحي له كان انسان امين و صادق و نموذج للحب و الخير و العطاء ، زي انبياء اخرين ربنا بعتهم لأممهم علشان ينشروا الحب و الخير و الرحمة.
من كتر ما النبي ايقونة للحب و التسامح تلاقي في كلام في لسانا بنقوله يدل علي مكانته العظيمة عندنا ‘ سايق عليك النبي ‘ و ‘ صلي علي النبي ‘ و في امثالنا الشعبية بنقتدي بيه زي ‘ النبي وصي علي سابع جار ‘ و في ناس بتحلف بيه . طبعاً مش كل الحاجات دي صحيحة من الناحية الدينية بس الي أكيد ان ذكر النبي و الصلاة عليه حاجة كلنا بنعملها و اتعودنا عليها .
كل سنة وانتم طيبين و محتفلين بمولد نبينا و انبيائنا كلهم مسلمين و مسحيين و يهود ، كل نبي مولده عيد ، علي اختلاف ديانتنا في البطاقة لكن انسانيتنا واحدة.
عيسي نبي و موسي نبي و محمد نبي و كل الي ليه نبي يصلي عليه .
و أجمل منك لم ترى قط عيني … و أفضل منك لم تلد النساءُ – خُلِقَت مجرداً من كل عيبٍ … كأنك قد خُلِقتَ كما تشاءُ
#Happy_Moled_ElNaby_Everybody
#حلاوة_زمان_عروسة_حصان

اترك تعليق

يرجي التسجيل لترك تعليقك

شكرا للتعليق