منى رضوان تكتب : زملكاوي الطباع .. و قلبي شجاع

0

 

تحديات كتير في الحياة عموماً و في حاجات معينة خاصة بكل انسان بسبب ظروفه الشخصية . تبدأ التحديات من اول زحمة مرور الي التكدس سكاني الي أزمات اقتصادية مروراً بمشاكل الدخل و سعر العملة و حاجات خاصة بالمعيشة و اسعار الوقود الي بتأثر علي صناعات موازية متعددة . مشاكل لا حصر لها و تحتاج مجلدات لسردها و وقت خيالي لحلها انما فوق كل التحديات دي في تحدي خاص بالمصريين فقط و هو تحدي انك تكون زملكاوي .
دة تحدي كوم تاني و فيه مستوي اعلي من المعاناة و تتجسد فيه لمحات من جلد الذات والبحث عن السعادة الضائعة .
لو بصينا للجانب المشرق في الموضوع نلاقي حقيقة دامغة لا تقبل التشكيك و هي ان الانسان الزملكاوي دة انسان شخصيته لازم تدرّس لانه نموذج للصراع في صمت و تحمل الشدائد و في خضم الأحداث بيبقي واقف صالب طوله و شموخه يذهلك .
ساعات بحس و بشوف بشكل فعلي ان الزملكاوية اقلية بتدّور علي بعض و بيستمدوا قوة من انهم يتحدوا و يكونوا خلية متماسكة ، تحس انهم كلهم بلديات او ولاد خالة.
لما قعدت و حللت الموقف بتاع انك تختار انك تبقي زملكاوي ، عقلي موصلش لحاجة مقنعة ، يعني بمعني اخر ، ازاي شخص ساب كل الفرق و اختار يبقي مع الفريق الابيض بارادته و هو واعي تماماً لتبعات القرار دة علي المدي القصير او الطويل.
وانا بحاول احط ايدي علي سر اللغز سألت نفسي سؤال بديهي : يا تري ايه الأسُس الي وصل لها و قادته انه يشجع الزمالك و يبقي فريقة المفضل ، يعني in other words ازاي حد يشجع فريق الزمالك لكرة القدم في بلد الكورة فيها بشعبية اهرامتها و نيلها و هو شايف النتايج و الأداء ؟ طيب بلاش دي ، هفترض انك اقدمت علي الخطوة دي في وقت كان في نتايج كويسة للفريق …سؤالي ليك : ازاي لسة مستمر في قرارك 😂
طيب ازيدكم من الشعر بيت : الجيل القديم ممكن افهم تشجعيهم و انتمائهم ، لانهم اتولدوا و كان الزمالك فريق بينافس و ندّ يتعمله حساب و فيه نجوم لامعة انما الجيل الجديد دة بقي زملكاوي بأمارة ايه ؟
ملاحظة كمان شفتها كتير و هي ان الزملكاوي تحسه كدة شخص جواني في نفسه ، غير مندمج في المجتمع الكروي و مكتّم علي اتجاهاته ، و هوپ يطلع كدة فجأة من حيث لا تدري لو حصل معجزة و الزمالك كسب او اتأهل لدور متقدم في اي حدث كروي ، تكتشف يا خويا ان كان في زملكاوية كتير حواليك بس under cover و نايمين و مخبيين الحقيقة دي ، و قد عجزت عن فهم السبب ، هل من الخجل و لا من مبدأ داري علي شمعتك تقيد ؟
نقطة تانية معلش اعذروني ، الزملكاوي دة يا ولاداه هيقول لولاده ايه عن اختياره للزمالك ؟ هل مثلاً بيشجعه تعاطفاً مع الاقليات ولا علشان بيحب اللون الابيض ولا ليه ، و لما تجيلك الجراءة و تسأل ، يقولك رد في مقتل يجيبلك تهنيجة في دماغك ، يقولك علشان دة الزمالك . زي بالظبط لما حد يسألك بتحب مامتك ليه ، الاجابة بتكون علشان دي امي . مع الزمالك الاجابة كدة برضه : بحب الزمالك علشان دة الزمالك . و في النقطة دي انا ايقنت ان الانسان الزملكاوي هعيش الزملكاوي و يموت الزملكاوي.
نفسي مرة الموضوع دة يتفتح و اي مواطن زملكاوي يرد رد موضوعي علي شاكلة : بحب و بشجع الزمالك علشان فريق البطولات ، او علشان بيفرحنا ، او فريق فيه الفن في اللعب و التكنيك و بيقدم عروض قوية فيها تكافئ مثلا ، مفيش يا مؤمنين خالص الكلام دة ، الكيوپيد الزملكاوي اشبه بحب افلاطوني ملوش اسباب ملموسة ، بحبه يا بابا style .
علي قد ما ظاهرة انك تكون تكون زملكاوي مستوقفاني بس مقدرش انكر ان الزملكاوية دول حاله خاصة و بينهم كيميا او تعويذة او معمولهم عمل بينهم وبين النادي ، bond غريبه وعجيبة عجز عن تفسيرها اكبر الدكاترة النفسيين.
علشان ارتاح نفسياً اقنعت نفسي ان الزملكاوي دي بيبقي بالوراثة ، غالباً تلاقي مامته او بباه كانوا من الزملكاوية الأوائل فاكتسب الصفة دي زي ما بياخد صفات من شكل امه و ابوه و طباعهم .
طبعاً بعد كل ما سبق لو حلفت لكم اني مليش في الكورة خالص و لا بتفرج عليها مهما كان مين بيلعب مش هتصدقوا ، بس فعلاً بلا مبالغة انا اخري انيّ اتابع عن بعد و دة لو المنتخب بيلعب ، انما معدش اتفرج علي ماتش ابداً. علاقتي بالكورة هي اني بحب و أحترم بعض الناس الي في مجالها ، و عادة لأسباب انسانية او شخصية ، يحضرني مثلاً اتنين بحبهم و هم واحد اهلاوي و التاني زملكاوي : محمد صلاح و حازم إمام .
تبقي حقيقية عن علاقتي بالزملكاوية و هي اني فعلاً بتعاطف معاهم ، وجداً كمان . أهم و اغلي انسانة في حياتي زملكاوية ، مامتي الجميلة و هي محللة رهيبة و بتفهم في الكورة ، و كذلك كتير من اسرتي ، افتكر من كتر ما شافوا من الفريق بقوا يا روحي دارسين الخطط و الفنيات و عندهم hands on كتيرة عن تفاصيل اللعب ، و كمان علشان اكون حقانية ، الزملكاوية علي المستوي الشخصي بصراحة ناس adaptive و متأقلمين و عندهم سلام نفسي داخلي و راضيين بمصيرهم .و فوق كل شئ بقوا اكتر من كونهم شريحة كروية ، هم حالة و state في حد ذاتها ، زي لو حد سألك مالك كدة ؟ فتقوله انا تعبان او مصدع او متوتر شوية ، بنفس القياس لما حد لما يسألك مالك ممكن تقوله معلش اصلي زملكاوي شوية .
الانسان الزملكاوي ايقونة و لازم مننساش انهم اولادنا و اهلنا و حبايبنا ، كل واحد فيهم منهجه : ماشي في نور الله ، بدعي و بقول يا رب 🙏
#زملكاوي_الطباع_و_قلبي_شجاع

اترك تعليق

يرجي التسجيل لترك تعليقك

شكرا للتعليق