منى رضوان تكتب : سترونج اندبندنت ومان .. نقطة😊

0

بما ان شهر مارس دة شهر المرأة في العالم و في مصر ، و بما ان يوم المرأة العالمي في نفس الشهر و بما ان الست نص المجتمع و هي الي خلّفت النص التاني ، فأنا حابة اتكلم معاكم عن اكتر تعليق طلع علي الست او المرآة في الخمستاشر او عشرين سنة الي فاتوا …سترون اندپندنت ومان .
في رأيي المتواضع ان الاسم او اللقب دة ان صح التعبير هو تطور و تحديث متماشي مع الحياة و الاحداث ، يعني دة مش حاجة كدة طلعت شيطاني و لا تقليعة و لا استرجال ولا تقليد اعمي ولا بُعد عن الفطرة.
دة وضع و حالة حياتية مش مجرد شعار و مادة للقلش . وضع مش مقرون بالجواز و الخلفة ولا مقرون بعدمهم ، دة موضوع اكبر و اعمق حبتين تلاتة.
درجة الاعتماد علي النفس و تقليل الاعتماد علي الاخرين حاجة و اننا نكون ضد الطبيعية اللي بتخلينا محتاجين أهل وأصحاب وزوج وأولاد دي حاجة تانية.
اندپندنت ومان يعني واحدة عايزة تعيش حياتها و تحدد اهدافها ، ربنا خير الانسان و اداله عقل يفكر بيه و الست الي بتعمل كدة بتمارس ما انعم الله عليها به من كونها انسانة عاقلة ، بالغة ، راشدة.
هو اصلا هي ليه لازم تكون تابع لحد ولا في ضل حد ؟
ليه لازم يبقي وراء كل رجل عظيم امرأة ، ما هي ممكن تبقي جنبه علي فكرة .
سترونج اندپندنت ومان يعني واحدة بتحلم و احلامها ملهاش سقف او حدود ، ودة ميخلهاش متمردة او ‘ عبد الصمد ‘ في نفسها .
هو ليه مفيش وسطية ، يعني ليه عكس الاندپندنت ومان هو الهيافة و الدلع و ستوتة المتستتة ؟
وليه سترونج اندپندنت ومان معناها انها مش بتعيط و لا تتضايق و تفشل. و انها جامدة القلب و المشاعر ؟
هو كل الفكرة ان الست السترونج اندپندنت دي مش بتاعة ولولة ، دي واحدة كدة بتشيل نفسها في صمت و تتعامل مع الحياة بعدم تواكل و بتمشي المركب ساعات كتير علي حساب وقتها و صحتها و مدخراتها .
و الامر ميخلاش و محدش بيبقي عارف همها و اعباءها – السترونج اندپندنت ومان دي متحملة كتير و مبتسمة و فاردة وشها و فاهمة ان الحرية مسؤلية مش جرأة و خلاص .
انا بحب السترونج اندپندنت ومان – بشوف فيها الست الجدعة الي بتزق ولادها و مجتمعها لقدام ، الي بتحب الحياة و الي بتبني اجيال من متحملي المسؤلية .
و في احيان كتير بتكون الاب و الام و الستر و الغطا لما ظروفها تخليها كدة .
لقد هرمنا من اكلشيهات السترونچ اندپندنت و مان ، تقولش شتيمة مثلا و الواحد مش عارف ؟
و ايه موضوع المساواة دة الي مع كل مرة نقول سترونج اندپندنت يفرقع في وشنا ؟ حضرتك ربنا خلقنا متساويين في الثواب و العقاب و المشاعر و الاحاسيس ، المتميز بأخلاقه و اعماله علي فكرة.
يلا – قلت افضفض معاكم بكلمتين واقفين في زوري …
تحية كبيرة لكل سترونج اندپندت ومان من صحباتي و معارفي – انت ست الكل و الله و بتمري بتحديات كل يوم و قوي دافعة من غير ما تعدي تقولي انا عملت و سويت .
واخيرا احب اضيف ان السترونج اندپندنت ومان بتحس مش ترابيزة علي فكرة و ساعات بيجلها حالة اكتئاب و تعب و بتحتاج الناس تحس بيها زي ما هي بتحس بيهم ، و قبل كل شيء هي في احيان كتير بتبقي عايزة الي ينجدها و الي يدلعها . #انجدني_ارجوك
#القلب_اشتكي_من_قلة_الهشتكة
#سترونج_اندبندنت_ومان_أند_پراود

اترك تعليق

يرجي التسجيل لترك تعليقك

شكرا للتعليق