الكورونا هي حديث الساعة ، الي فاهم و الي مش فاهم و كل واحد بقي عنده آراء كورونية ، اشمعني انا يعني ميبقاش عندي انا كمان ؟ ناقصة ايد ولا رجل مثلا ؟
انا كمان عندي حاجات اقولها بس هي مشاهدات اكتر منها آراء، خد عندك يا سيدي :
احنا عايشين أجواء الثورة بالضبط بس زاد عليها غسيل الأدين و لبس الماسكات .
غسيل اليدين طلع اصعب من غسيل الأموال
في زمن الكورونا يعتبر غسيل المواعين نقطة مضيئة في حياة كل ام مصرية .
كمية المطهرات و الكحول و المنظفات و الكلور هتخلي الشعب لو عدي جمب اي نار يولع ، الشعب بقي قابل للأشتعال.
تمارين الچيم و المشي تم استبدالها بتمرينات غسل الأيدي و بقت زي مجاميع الرياضة كدة .
ال e-Learning المصري خدنا للعالمية ، العيال قاعدين بالنص الي فوق لبس خروج و الي تحت بنطلونات الپچامات و شباشب و شكلهم مش تعليم انترناشونال بالمرة.
الأمهات نفسهم مش بتوع e-Learning مينفعش يا حاجة تخشي علي الولد بطبق سندوتشات و يوستفندي ، الولد في الحصة . و لو مش مصدقة قربي من الكاميرا هتشوفي وشك و مناظر الأمهات زمايلك و عمايلهم كلها online متتخيرش عنك .
ال work from home بتاع العالم حمادة و بتاع المصريين حمادة تاني خالص ، طقم قمصان نوم و شعر منكوش و عنين مدخمسة لا يعلي عليهم ، و في النص تلاقي عيل من العيال داخل عليك او بيجري وراك و يفضحك وانت راسم نفسك بالپجاما و بتتكلم انجليزي..
المصري خلاص بقي بيتعامل بالزووم و السكايپ كولز ، انا بكلم چروپ اصحابي كدة و تعبير يلا نزووم مش معناه اننا كلاب ، بقي عادي كل حد بيزووم بطريقة مختلفة .
ال panic shoppers كسحوا المحلات و السوپرماركتات حرفياً ، بس مخزون ورق التواليت موجود غير مثلاً الي حاصل في اوروپا فمش عارفة دة بسبب ان مش كل الناس بيجيبوه و بيستعملوه زي الطبيعي و لا لأن الشطافة الحمد لله مخلية الناس بتستعملوا بأعتدال فمتوفر .
الجوانتيات الي الناس المفروض تلبسها بتعاملوا معاها اكنا ايديهم بالضبط ، يعني يمسح وشه و مناخيره و بيكح و يعطس فيهم ، طيب لابسه ليه حضرتك ؟ بتكمل الطقم مع الماسك مثلا؟
البوس و الأحضان زادوا زيادة طردية غير متناسبة مع الموقف بالمرة ، شباب هو انهي جزء في جملة ” يجب عدم التلامس ” انتوا مش فاهمنها ؟
مفيش تجمعات يعني مفيش تجمعات ، عندك ناس في البيت دة اسمه تجمع و الله العظيم .
الستات الي قاعدة في البيت مع عدم مرواحها للكوافير و كدة نفسيتها بتتعب فكمان متقرفهومش في عيشتهم و تسألوهم شعرك ماله عامل كدة ليه و التلقيح السمج من هذا النوع ، علي الاقل هي قاعدة بتطبخ انما حضرتك قاعد بتحشّ فحشّ و انت ساكت الله لا يسئك.
احنا هنتخن تخن عالمي اليومين الجايين فمن فضلكم بعد ما الأزمة تعدي مش عايزين اي تلميح عن الزيادة في الوزن او حجم الأرداف او الأفخاذ ولا ان صحتنا جت علي الكورونا و يا ريت عايزين هاش تاج #يلا_نخس_سوا
نهايته ، الكورونا عملت ضجة في مصر و العالم و اتمني ان تعود الأيام الي كانت فيها الكورونا بالنسبة لنا شوكلاتة .
ربنا يحفظ الجميع و يجعل كلامك يا كورونا خفيف علينا
#كورونا_روكيت #يلا_نزووم #كلمني_سكايپ #ورك_فروم_هوم_بالپجاما #المجد_للشطافة
السبت, أبريل 27, 2024
آخر الاخبار
- سلة زعيم الثغر تواجه الزمالك في قبل نهائي كأس مصر يوم 30 إبريل الجارى
- مجلس الصيد يكرم فريق مواليد ٢٠٠٩ لكرة القدم
- مصيلحى ينظم رحلة للجماهير لاستاد البرج
- رحلة لجماهير الثغر.. لمشاهدة لقاء الاتحاد السكندري و الإسماعيلى بإستاد برج العرب
- سموحة جاهز لمواجهة بلدية المحلة الهداف احمد على امين يبحث عن فرصة للمشاركة
- اطلاق اسم السباح نبيل الشاذلي علي مجمع حمامات السباحة بالنادى الاوليمبى
- فيوتشر يتخطى فاركو بهدفين ويصعد للمركز الثامن
- فوز فريق الاتحاد السكندرى ٢٠٠٧ على الزمالك بالقاهرة ٢-١