منى رضوان تكتب : ٢٠٢٠ خشي علينا برجلك اليمين

0

خلاص ٢٠١٩ بتقولنا باي باي و ٢٠٢٠ داخلة علينا ان شاء الله ،خشي علينا برجلك اليمين يا طاهرة.
قبل ما نقلا ورا ٢٠١٩ بالضبة و المفتاح و نكسر وراها قُلة تعالوا نشوف سريعاً حصل فيها ايه في الدنيا ، الحقيقة حصل كتير مش شوية .
محمد صلاح شرفنا و كسب افضل لاعب في افريقيا و المغربي اشرف حكيمي كان افضل لاعب صاعد ، مجلس العموم في بريطانيا صوت ضد مقترح تريزا ماي بالخروج من الاتحاد الأورپي ، ترامپ راح كوريا الشمالية في سابقة من نوعها ، ٢٨ مصري ماتوا في محطة مصر لما جرار قطر خبط حاجز في محطة رمسيس و بعدها وزير النقل استقال ، وفاة ١٥٧ شخص في تحطم طيارة اثيوپية و كان عليها مصريين و جنسيات من ٣٣ بلد ، ابو تفليقة رئيس الجزائر اعلن انه مش هيترشح للرئاسة للمرة الخامسة و بعدها تنحي عن منصبه بعد احتجاجات ترفض ترشحه و استمراره في الحكم ، حصل هجوم ارهابي مسلح علي مسجد النور في نيوزلندا و مقتل ٤٩ شخص ، ترامپ يوقع قرار بأعتبار هضبة الجولان جزء من اسرائيل ، أوبر اشتريت كريم ب ٣.١ مليار دولار ، كتدرائية نوتردام الاشهر في پاريس اتحرقت فيما يقال انه السبب اعمال الترميم ، انتحار رئيس پيرو السابق الن جارسيا لاتهامه بالفساد ، ٢٩٠ ماتوا في سيرلانكا بسبب حادثة ارهابية في احتفالات عيد الفصح ، امبراطور اليابان اكيهيتو اتنازل عن العرش ، ليڤيرپول خد الدوري لسادس مرة بقيادة محمد صلاح ، وفاة محمد مرسي ، وفاة ابن محمد مرسي ، الستات بقت بتحّكم في كورة القدم ، وفاة زين العابدين بن علي رئيس تونس ، توماس كوك تعلن افلاسها ، مصر تفوز ببطولة الشباب تحت ٢٣ سنة ، شعبان عبدالرحيم مات ، العاصمة الأدارية واكلة الجو و العمل فيها علي قدم و ساق ، المصريين كانوا و مازالوا بيحاولوا يعيشوا كويس و الطبقة المتوسطة بتطّلع في الروح ، و طبعاً لسة بيفرحوا ياكلوا ، يزعلوا ياكلوا و تتبقي اهم امانيهم انهم يعملوا دايت و يخسوا .
احداث كتير في العالم زي ما شوفتوا و اكيد احداث كتير عند كل واحد بشكل شخصي بما فيهم انا …بالنسبة ليا ٢٠١٩ هو عام الفقد ، فقدت فيه اتنين من اغلي الناس عندي ، اختي الكبري هالة و قريبي الحبيب شريف.
و هي سنة اتعلمت فيها كتير ، حاجات بطريقة ايجابية و حاجات the hard way بس في الأخر اتعلمت .
اتعلمت و نجحت اني مربطش سعادتي بحد ، كويس اننا نبقي سبب سعادة حد او حد سبب سعادتنا بس الاصل في السعادة داخلي من جوانا ، تفوقت في انيّ امشي بعيد عن الناس الي بتجيب سلبية في حياتي مهما كانوا بيحبوني ، الواحد مش قادر يتكدر بأسم الحب خلاص كبرنا بقي و فهمنا الي فيها ، اتعلمت ان حقيبة الماضي و الحاضر و المستقبل ممكن الناس تتنطط بينهم بس الي ثابت ان المستقبل اولي من الماضي بالاهتمام و ان الحاضر حاضر و بيغير المستقبل ساعات و ان الماضي خدعة لازم نردم عليه علشان نعرف نواصل ، اتعلمت ان الوفاء صفة نادرة و ان اوفي الناس ممكن ميكونوش ناس ، ممكن يكون كلب عادي يعني 🐶 ، اتعلمت ان الهري اسلوب حياة عن بعض الناس و ان عدم الهري اختيار و مسؤلية لسلامتنا النفسية ، احنا مش ناقصين يا اخوانا و الله 😊.
في ٢٠١٩ زي ما نجحت في حاجات كمان فشلت في حاجات ، زي اني اشجع الزمالك تضامناً مع مامتي الزملاكوية الأصيلة ، و اغير ستايل لبسي و شعري ، و افوت للناس الحمقي ، و اتعامل مع بعض الأمور بوسطية بدل ما ابقي يا ابيض يا اسود علشان الدنيا كلها رمادي الحقيقة ، و قبل كل شيء فشلت فشل ذريع في انيّ اتعلم اطبخ ، الموضوع صعب عليا و انا مبفهمش في سينس الطبيخ دة ، فقررت اكتفي بالأكل و خلاص.
علي اعتاب ٢٠٢٠ بحاول بكل قوتي ابص للنص الممتلئ من الكباية و اتمني ان تكون سنة فيها الحلو اكتر من المر و الخير اكتر من الشر و الحب اكتر من الكره و الكالوريز اقل من الي بناكله و طبعاً ان قلوبنا تبقي اكبر و نكون احسن و احنّ علي بعض.
سنة ٢٠٢٠ داخلة علينا و هنا يحضرني لما ٢٠١٠ جت و قبلها ال ٢٠٠٠ ، الواحد كبر و لا ايه يا جماعة ، هعتبر اننا كبرنا في الخبرة مش بس العمر و اهي حاجة تشيل حاجة .
امنياتي في ٢٠٢٠ كتير ، لأن فيها الي كان نفسي احققه في كل الأعوام السابقة ، و اكبر امنياتي ان يحفظ الله لي احبتي و علي رأسهم مثلي الأعلي مامتي و اختي مروة و ملك و احمد و مصطفي و طبعاً ابوهم الغالي و منة و احمد اولاد هالة و محمد ابوهم حبيب قلبي ، و اهلي الغالين و اخواتي و اخواني و اصحابي الي بحبهم كل يوم اكتر ، نورا و دولسي و دوتس و سالي و ريموز و منولا و شيري و طبعاً رندة و حبيبي مثال الوفاء و الحب الغير مشروط بقلظ كلبي ، و تبقي اكبر امنياتي ان مرض السرطان يتم علاجه لانه يفتك بأحبتنا واحد واحد .
مقدرش اختم امنياتي ل ٢٠٢٠ و مذكرش هالة و شريف و خالي ماهر و والدي الحبيب الي حرفياً فكراهم كل يوم و بعد اشوف صورهم معايا و معانا كلنا ، اتمني لكم الرحمة و ان ربنا يصبرنا علي فراقكم يا اغلي الناس .
#٢٠٢٠_خشي_برجلك_اليمين_يا_طاهرة
#2020_Resoulution

اترك تعليق

يرجي التسجيل لترك تعليقك

شكرا للتعليق