مني رضوان تكتب : أشهر عشر كدبات في مصر

0

ما يلي اشهر عشر كدبات فى مصر في رأي المتواضع:
١- مش معايا رصيد/ تلفوني قطع شحن ، دي كدبة الزوغان من انك تكلم حد تقيل علي قلبك او مش عايز تكلمه ، فتقوله كدة علي اساس يعني ان الموضوع خارج عن ارادتك وان المسؤل شركة الموبايل او الشركة المصنعة لبطارية الموبايل .
٢- أحنا علي فكرة بنشترى راجل ، دي كدبة بتتفقس مع اول اتفاق علي خطوبة او فرح او حتي خروجة، يبان بقي بنشتري راجل ولا محفظة ومعها راجل .
٣- أنا جاى فالطريق أهو ,خمس دقايق وأكون عندك ، دي كدبة معناها ان الشخص لو راجل يبقي لسة هياخد دش و يحلق ذقنه ويلبس وينزل وفي السكة هيعدي يجيب دستة جاتوه يبرر بيها التأخير و لو من ست يبقي هي في مرحلة اختيار هتلبس ايه و هتحط الوان نقاشة ايه في وشها وطبعا لون المانيكور بيكون قيد الدراسة لسة.
٤- أنتى تستهلى حد أحسن مني – دي كدبة الفركشة الدپلوماسية الي بعدها بيكون في تون مُحن و خنفان في الصوت يصاحبها نحنحة over شوية ، و اعتقد انها كذبة مهروسة من ايام امنحتب الاول ، يا ريت نجدد شوية يا شباب ، عايزين حاجات ٢٠٢٠ مش كلام الخمسينات دة.
٥- أنا عاوز بنتك بشنطة هدومها ،انا اخر حاجة تهمني الفلوس – الكذبة دي هي ال version الحريمي لأحنا بنشري راجل وتطبق عليها نفس الشروط والاحكام
٦- خلي ياباشا – كدبة كل الصنايعية و السواقين و ساعات مقدمي خدمات في نواحي كتير في القاهرة وكل محافظات مصر المحروسة و بعدها لما ياخد الفلوس يقولك دة قليل او عايز زيادة ، مع انه من لحظة كان بحلف و يقولك خليّ يا باشا .
٧- أنا عمر ماحد مسك ايدي – هي صادقة قي دي علشان هم بيخدوها بالحضن علي طول .
٨- أنا فاكر الشارع أتجاهين ، كدبة كل اليّ بيقابل كمين لسة محطوط جديد ، ونصيحتي انك يا تمشي صح يا تبص علي اپليكشن بيقولك من الموبايل ، متبقاش متآمر واهبل .
٩- هعمل دايت – دي كدبة بتستمر ٢٤ ساعة و تُجدد من تلقاء نفسها ، وعادة بيكون قرار اهوج و متسرع بيكون جاي كعامل محفز لتنيم الضمير وانت بتطلب پيتزاية لارج هتكالها لوحدك.
١٠- الفلوس مبتشتريش السعادة ، و دي كدبة عادة الناس الي مش معاها فلوس او عايزة فلوس بتحاول تصدقها 😂 ، هو طبعاً الفلوس في الأخر ورق بس ورق مهم دة غير ان طبعاً ساعات الفلوس بتجيب سعادة او علي الأقل بتمنع تعاسة أو بتخلي التعاسة اقل وطأة .لازم مننساش ان الفلوس بتجيب اشياء تقلل اوجه التعاسة و منها ما هو مادي زي البيوت و العربيات و الدهب و الياقوت و المرجان و كمان في حاجات معنوية زي انها بتسهل حاجات في الدنيا زي الجواز والطلاق و دول بيجيبوا سعادة غير مباشرة احيانا و بذلك مقولة الفلوس مبتستريش السعادة غير دقيقية بالمرة .
دي لستة أشهر عشر كدبات في مصر …يا تري انتم لستتكم فيها ايه؟
#الكدب_خيبة
#أشهر_عشر_كدبات_في_مصر

اترك تعليق

يرجي التسجيل لترك تعليقك

شكرا للتعليق