بالفعل أنا مش طنط …و أخر حد ينفع يبقي طنط و الي بيطنطتني دة اولاً مش عارف شخصيتي و لا مدرك مدي الجرح الي بيسببهولي و قبل دة و دة هو حافظ مش فاهم.
بادئ ذي بدئ كدة أحب اوضح ان طنط دي مش لقب ولا تعظيم او احترام للي قدامنا علشان فرق السن مثلاً او ما شابه ، بالنسبة ليا طنط دي اسلوب حياة و ساعات تشبيه …زي ما تقول فلان امور او فلانة لطيفة ممكن نقول فلانة دي طنط.
اذاً في مفهومي ( الي ممكن يكون غلط ) طنط بتوصّف الشخصية مش الشخص ، علشان كدة انا مش طنط.
لقب طنط في مجتمعنا مقرون بالسن – و هو دليل احياناً ان الصغير بيحترم الكبير و لهذا بيديلها لقب طنط مع انها ممكن تكون شخصيتها أعيل منه و روحها شابة حتي لو كانت عندها ٧٠ سنة.
بناء علي ما سبق : اي أم بعيال او حتي ست من غير عيال او اي واحدة عندها شعر ابيض او تجاعيد هي ممكن تكون مش طنط.
توصيفي لمن هم ليسوا طنط ممكن اختزله في الأتي :
– اي ست روحها مرحة و مقبلة علي الحياة …مش طنط
– اي ست بتجرب و متخافش و مش عايشة في الكومفورت زون …مش طنط
– أي ست بتاخد قرارات محسوبة ساعات او غير محسوبة كمان …مش طنط
– اي ست ضاحكة باسمة و تملاً دنيتها و دنيا من حولها بالمرح و خفة الظل و المغامرات …مش طنط
– اي ست تتحمل المسؤلية و تقوم بدورها و هي مش متمسكنة و لا مغلوبة علي امرها …مش طنط
مش علشان شوية شعر ابيض و كرمشتين في الوش ولا عيال كبيرة و طويلة نبقي طنطات يا اخونا …الموضوع اعمق من كدة شوية.
و يا ريتها بتقف عند كدة – دة ساعات يبقي حد بينا و بينه خمس و لا ست سنين و يقولنا طنط – مع ان هي او هو شكلهم يخلفنا اساسا ً.
و بعدين الي بيزودها و يخليها خل لما لمجرد انك تكوني اتجوزتي او خلفتي فتاخدي لقب طنط – نازل پاكدج مع الأمومة دة و لا ايه؟
من كام يوم واحدة صاحبتي بعتتلي ابنها ياخد منيّ حاجة – صاحبتي دي قدي في السن او اكبر منيّ بحاجة بسيطة ، فتحت الباب فقالي ازيك يا طنط …بس عينك ما تشوف الا النور – قلتله بلا اي تفكير :انا مش طنط خالص!
اخوه الصغير مثلا الي عنده ١٤ ولا ١٥ سنة بيقولي يا مني او ساعات يا منمن و هو ما يعكس شخصيتي .
في لبس كبير عند الناس ، فاكرين ان طنط بتدي احترام و تقدير – حابة اقولهم الي عايز يحترمني يا جماعة ممكن يقولي حضرتك مش يقولي طنط ????.
نهايته – محدش يحط الناس في قوالب و القاب تظلمهم ، او اضعف الأيمان لا تمثلهم .
خلينا نركز في الشخصية و علي اساسها نشوف نقول طنط و لا لأ – الشخصية هي المعيار الحقيقي الي لازم ناخده في الأعتبار.
انا بطالب الناس يعيدوا النظر في كل الطنطات الي حواليهم و يصنفوهم صح – و يا ريت ميصنفهومش اصلاً و دة يكون احسن .
المهم متجرحوناش و تسمونا طنط علشان تبقوا انتوا النُغة الصغنانين و احنا الطنطات العواجيز.
الي كل الستات الي شايفيين نفسهم مش طنط ، اليّ يقولِك طنط تقوليله كلمتين :طنط في عينك !
ملاحظة : نفس الكلام الي فوق دة ينطبق علي الرجالة الي بيتقالهم عمو و انكل و هم لا دة و لا دة
#أنا_مش_طنط
الخميس, أبريل 25, 2024
آخر الاخبار
- سلة زعيم الثغر تواجه الزمالك في قبل نهائي كأس مصر يوم 30 إبريل الجارى
- مجلس الصيد يكرم فريق مواليد ٢٠٠٩ لكرة القدم
- مصيلحى ينظم رحلة للجماهير لاستاد البرج
- رحلة لجماهير الثغر.. لمشاهدة لقاء الاتحاد السكندري و الإسماعيلى بإستاد برج العرب
- سموحة جاهز لمواجهة بلدية المحلة الهداف احمد على امين يبحث عن فرصة للمشاركة
- اطلاق اسم السباح نبيل الشاذلي علي مجمع حمامات السباحة بالنادى الاوليمبى
- فيوتشر يتخطى فاركو بهدفين ويصعد للمركز الثامن
- فوز فريق الاتحاد السكندرى ٢٠٠٧ على الزمالك بالقاهرة ٢-١