مني رضوان تكتب : خطرفة صيام – أنا و الكلب دينيس و شهيرة

 

كل سنة و انتم طيبين و رمضان كريم ، بكتبلكم دلوقتي و انا صايمة و عاملة دايت في رمضان و وحشني اوي المكرونة بالبشاميل و الازانيا و الأسكالوپ پانيه ، احلامي اتغيرت اوي و بقي فيها طواجن و نشويات و پيتزا و عيش – نفسي في عيش طبيعي ، تعبت من العيش المأدد الي باكله… يلا معلش محدش بياكلها بالساهل .

وانا في خضم الصيام و الدايت قاعدة بقلب في الفيسبوك و بسلي نفسي الاقي ايه طالع في وشي :

‘ الكلب دينيس نجح في خسارة ١٩ كيلو من وزنه خلال سنة عن طريق مواظبته علي الدايت و ممارسة التمارين ‘ .

أُسقط في يدي بصراحة اول ما شفت الخبر – دينيس عمل الي عليه و انا لأ ؟ و محطوط صوره before and after و الراجل بقي في منتهي الرشاقة .

اول حاجة جت في بالي ان شهيرة ( اخصائية التغذية الي متابعة معاها ) زاقّة الخبر دة عليا …كلب و انا بحبهم اوي و عمل دايت و خس و بقي قمر …هي شهيرة لها يد في الموضوع دة اكيد.

قعدت و فكرت في اليّ بعمله في نفسي دة و جيه في بالي سؤال بديهي و هو :

ليه منضمش لرابطة الناس اللي وقفت دايت عشان رمضان وهيكملوا بعد العيد ؟ اول ما السؤال دة نط قدامي ابتديت اتخيل الفطار و السحور و الكنافة و القطايف و البقلاوة بالمكسرات ( اكتر حاجة بحبها ) و قعدت اقارن بين الحاجات دي و ثمرة الفاكهة الي باكلها او قطعة الحلو الي قد عقلتين الصباع دة لو كان في منها في يوم الدايت …نفسنت جامد و تمردت داخلياً علي الوضع الي انا فيه حالياً و قلت لأاااااا و رحت مشوحة بأيدي و الكرامة خدتني و نفسيتي قبت عليا جامد و خبطت بأيدي علي الترابيزة و وقفت وقفة عزة و شمم و دفاع عن النفس و دفاع عن احياء جو رمضان الي انا مش هحّس بيه طول ما انا عاملة دايت و قررت ….قررت انيّ هكمل دايت من سكات و اخري افضقض معاكم بكلمتين و رجعت بصيت علي صورة دينيس القمر و استمديت منها بعض الأرادة و قلت انا مش اقل من دينيس في حاجة ، و ان هو مشي في الطريق دة قبلي و ان شاء الله هحذو حذوه و اعتبره قدوة ليا و تنزل صوري زيه كدة و مين عارف ممكن كمان نتصور سوا.

يلا الحمد لله – مفيهاش حاجة ان الواحد يطلع عيل و يرجع في كلامه و يكمل دايت … و املي في ربنا كبير و ان شهيرة لما تلاقيني ملتزمة تديني وجبتين فري و تدلعني شوية ، انا ورمت يا شهيرة و النبي راعي حالتي بقي 🥺

#مكملين_دايت

#أنا_و_الكلب_دينيس_و_شهيرة

التعليقات متوقفه