السؤال دة الي بيسأله او بيرد عليه بتأكد ان انا و هو او هي عمرنا ما هينفع نبقي اصحاب .
هذا السؤال بالنسبة ليا سؤال اهبل مغلف بسذاجة او الي بيقوله بصنفه حد حافظ مش فاهم .
مبدأياً كدة الشعب المصري مينفعش يرد علي السؤال دة ، السؤال دة خارج قدرتنا علي الرد لأنه out of our circle of influence and control لأن اقصي مدة ممكن حد يعرف هو شايف نفسها بعدها ايه او فين في ظل ظروف الحياة المحيطة بينا هي من ٤ ايام لأسبوع .
و عادة الي بيعرف و بيرد علي هو شايف نفسه فين بعد خمس سنين بتكون اجاباته شئ علي شاكلة : انه في الزحمة الي بيلف فيها حوالين نفسه ، او بيدور علي ركنة في المهندسين ، او علي المحور في طريقه للشيخ زايد او ممكن يكون رده عبارة عن امنية زي مثلاً انه بيحاول يخس او يلعب رياضة او ياكل اكل healthy .
السؤال بتاع الخمس سنين دة كل الي رد عليه في الأنترڤيو و الشركات عينتهم بيدفعوا دلوقتي تمن العملة السودة دي .
احنا ال time span ملناش اي سلطان عليه ، لو كان عندنا القدرة اننا نعرف هنكون فين بعد خمس سنين كنا مثلاً عرفنا من قبل الثورة بخمس سنين ان هيحصل ثورة ، او كنا عرفنا ان الدولار هيبقي سعره كدة او كنا عرفنا ان احلي ايام عمرنا جاية بدل ما احنا قاعدين مستتينها من حوالي ١٠ او ١٥ سنة.و كنا عرفنا ان في وباء اسمه الكورونا هيحطّ علي العالم كله او اضعف الأيمان كنا عرفنا نتعلم من الخمس سنين الي فاتوا حاجات تفيدنا في الخمس السنين الجايين بشكل موضوعي مش بشكل اماني و احلام منفصلة عن الواقع .
من الأخر كدة ، كلام التنمية البشرية دة هيودينا ورا الشمس ، الا لو شايف نفسك فين بعد خمس سنين معناها انك هتكون حددت البلد الي ناوي تهاجر لها ، بس طول ما انت في مصر خلي ال planning بتاعك مدته اسبوع بالكتير ، و خليها خروجات مثلا علشان متحبطتش.
يعني حد يقولك شايف نفسك فين بعد اسبوع ؟ تقوله شايف نفسي علي البحر و لابس لبس مصايف و شبشب و بشرب سموذي كيوي و مانجا .
شايف نفسك فين بعد بكرة ؟ تقوله شايف نفسي مزنوق علي كوبري اكتوبر فهاخد الدائري .
شايفة نفسك فين يوم الخميس بعد الظهر؟ شايفة نفسي عند حماتي و هتعد تهشك في ابنها الي ملوش زي فهاخد مهدأ قبل ما اروح.
شايف نفسك فين بعد الغدا ، تقوله علي القهوة او في الچيم او في السينما او بذاكر للعيال او بطبخ الخ…
عايزين نبتدي نقلل سقف طموحاتنا علشان نحقق اي نتايج يا جماعة ، انما هنفضل to aim high و نقع علي جدور رقبتنا كدة لحد لامتي ؟
اصحابي بتوع التنمية البشرية ، احنا حبايب و كل حاجة بس ارجوكم بلاش الاسئلة دي ، مش بس ملهاش معني ، هي كمان قدمت اوي و الله و ملهاش context خالص .
الله يستركوا عندنا مرارة واحدة و محتاجينها يا ريت تساعدونا انها متنفجرش.
#شايف_نفسك_فين_بعد_خمس_سنين
الجمعة, أبريل 19, 2024
آخر الاخبار
- فوز فريق الاتحاد السكندرى ٢٠٠٧ على الزمالك بالقاهرة ٢-١
- رحلة لجماهير الثغر.. لمشاهدة لقاء الاتحاد السكندري و الزمالك بإستاد القاهرة
- الاتحاد السكندرى يتصدر الدوري بفارق الأهداف
- حل فزورة فريش اليوم الأحد 21 رمضان.. بلد السكر والقهوة والتبغ في الكاريبي
- بحضور 600 شخص .. نادى السلام البحرى ينظم اكبر مائدة افطار على ضفاف قناة السويس ببورسعيد
- تأجيل مباراة الاتحاد السكندرى و المصرى البورسعيد لتقام يوم الخميس 4 إبريل
- سلة الاتحاد السكندري تتعاقد مع صانع الألعاب الأمريكي ” مايكل ديكسون “
- دوللي شاهين تنتهي من تسجيل أغنية “ست البنات”