مني رضوان تكتب : نقطة نظام

0

١- نقطة نظام : لما تختار حد يكون جوة دايرتك تحت أي مسمي متختاروش عشان مناسب و علي مقاسك أو بيحب نفس الي بتحبه و بيكره الي بتكرهه ولا لأن بينك و بينه أرضيات و خلفيات و ناس مشتركة ، لما تختار حد اختار اليّ يقّدر أن أنت الي هو اختاره من وسط الزحمة .
٢- نقطة نظام : ناس كتير من اليّ عندها ضغوط حياتية أو نفسية بيحاولوا يعدوا ايامهم و يعيشوا بشكل عادي من غير دراما و ولولة ، الناس دي بيكون عندها ثبات إنفعالي عالي ، تلاقيهم بيرسموا الأبتسامة و يعرفوا يقولوا إيه و أمتي و يبقوا موجودين علي السوشال ميديا و بينهم و بين معارفهم تواصل و ساعات كمان بيبقوا داعمين لناس غيرهم و بيدهوم طاقة إيجابية للأستمرار و هم في أمس الحاجة لحد يعمل معاهم كدة …فمتغركوش المظاهر .
٣- نقطة نظام : أي مجهود بتعمله لغيرك أكتر من اليّ المفروض تعمله عمره ما هينال التقدير المناسب حسب توقعاتك ، أي دور تطوعت أنك تقوم بيه بيتحول من جدعنة لواجب و من واجب لفرض . الحب أو الأهتمام أو المسؤلية الي بتقدمهم لغيرك تتحول لمن لا يقدرها الي تضحية في غير مكانها …الحاجات دي عاملة زي ما تحط القهوة جوة الكوباية و تملاها علي اخرها و الباقي يتدلق برّاها …مجهودك الزيادة دة زي القهوة المدلوقة دي ، شيء مُهدر … للأسف .
٤- نقطة نظام : الكل شريف حتي تأتي العاهرة ،
اول مرة سمعت الجملة دي اتخضيت و اتوترت و حسيت أن فيها مبالغة و تهويل بس بعد شوية خبرة مش وحشة في الدنيا قدرت افهم المعني العميق في الجملة :
أنت شريف علشان متحطتش في الأمتحان الي فيه اختبار مبادئك أمام شهواتك.أنت مخلص في الحب لحبيبتك طول ما مفيش ستات تانين ، أنت متربي طالماً محدش داسلك علي طرف ، انت ملتزم و مبتسرقش علشان متحوجتش للسرقة .
كلنا مُدعي الفضيلة لأننا لم نُختبر في غيرها و ساعات كمان بننتقد الي بيسقطوا في الأختبار لأننا متحطناش في نفس الاختبار بتاعهم و لا في نفس
درجته ،لذلك دعوتي دايماً هي : اللهم إجعلنا عبيد إحسانك و لا تجعلنا عبيد إمتحانك.
٥- نقطة نظام :الدين مش انك تصلي و تزكي و تصوم و تحج و تنطق الشهادة ولا أنك تروح الكنيسة و تطّلع عشورك و تردد آيات من القرأن او أسفار من الأنجيل …دي شكليات و عبادات شعائرية و بتعملها لربنا و لنفسك . بالنسبة للناس بقي المعادلة مختلفة ، الناس يهمها عباداتك التعاملية .فلما تحطلي صورة المسيح او لوحة فيها آيات أو صورة الكعبة أو تحط مصحف في تابلوه العربية أو تلبس صليب كبير بيلمع نشوفه من علي بعد ١٠ كيلو أحب اقولك ان إنتماءك الشكلي دة لا يعنينا في شيء ،الدين هو أستقامتك ، و هو معاملتك . ياما ناس كتير عندها دين في البطاقة و لكن ملهاش مّلة.
٦- نقطة نظام : لا تحزن عند الصدمات ، فلولاها لبقينا واهمين لمدة طويلة ، هي قاسية … لكنها صادقة .
٧- نقطة نظام : احنا عايشين وقت المعايير المقلوبة ، وقت فيه الزواج أهم من الحب، و مراسم الدفن و العزا و النعي أهم من الميت ، الهدوم أهم من الجسد و المعبد اهم من الله
٨- نقطة نظام : الماضي بتاعنا هو حصيلة تجاربنا و خبراتنا و الخبرات مقسومة ما هو سلبي و وحش او ايجابي و كويس ، كل التجارب دي هي حصاد قرارتنا الي يا أما اصبنا أو اخطأنا لما خدناها . فيها قرارات سهلة و واضحة و فيها ما هو صعب و باتر …القرارات دي تصبح اختياراتنا .لو غلطت فيهم و عايز تمشي لقدام لازم تبص لقدام ، انك تلف و تبص كل شوية لورا دة هيعرقل خطواطك و يعطلك ، مهما مرت عليك المواقف تأكد انك مُخير و مهما تشابهت خليك عارف ان المواقف مختلفة لأننا من اختلفنا في التعامل معاها …كما قالوا قديما : الإنسان لا يسبح في النهر مرتين …فرغم أنه نفس النهر ..لكنها ليست نفس الماء ..فالماء متجدد ومتشابه لكنه يتحرك ..كذلك هي المواقف.
٩- نقطة نظام : هو مسيحي بس كويس ، هي ست بس جدعة ، هو فلاح بس عنده ذوق ، هو صعيدي بس بيفهم ، هو ابوه بواب بس طلع الاول ، هي سمرة بس حلوة ، هي محجبة بس هاي كلاس ، هي مش محجبة بس محترمة …هو مجتمع عنصري بس مش واخد باله
١٠- نقطة نظام : من اكبر الاخطاء البشرية الفضفضة ساعة الزعل ، غالبا بنشوف اي حد محل ثقة و هو بالكتير محل كشري!
#نقطة_نظام

اترك تعليق

يرجي التسجيل لترك تعليقك

شكرا للتعليق