لتاني مرة في ٢٠١٩ اروح الهند في زيارة عمل ، كنت هناك في مايو الماضي و كتبت عن رحلتي بس كنت في نيودلهي و المرة دي رحت حيدرآباد (Hyderabad) . رحلة طويلة و لازم تنزل ترانزيت علشان مفيش رحلة مباشرة ، و بالفعل قضيت ٣ ايام من الخمسة في المطارات و الطيارات و اليكم توثيقي للرحلة الي استمتعت فيها و قابلت فيها اصحابي الي هناك و زملائي في العمل ،الهدف من الزيارة كانت لحضور بعض الأجتماعات و دورة تدربية لأخذ شهادة ما و الحمدلله اتمتت المهمة علي اكمل وجه ????
نخش بقي في المفيد ???? ، الهند زي مصر كدة ، بلد مينفعش مهما رحتها تجيبها في زيارة واحدة او حتي اتنين او تلاتة ، و لما كمان بتبقي عارف ناس من اهل البلد و الموضوع مش رسمي بتقدر تتبسط اكتر لانهم بيقولولك معلومات و يودوك اماكن مختلفة و مرتبطة بالبلد مش شغل سياحة و خلاص .
حيدر آباد كانت بلد مستقلة بذاتها و هي دولة هندية إسلامية سنية في جنوب وسط الهند و استمرت من سنة ١٧٢٤ الي ١٩٤٨ و كانت العاصمة هي حيدرآباد ، اسسها آصف جاه قمرالدين في فترة ضعف امبراطورية المغول في القرن التمنتاشر و كان اخر حكامها عثمان علي خان او زي ما كانوا بيسموه The Nizam Of Hydrabad .و معناها الحاكم او رأس الدولة .كان عثمان علي خان اغني رجل في العالم في الوقت دة و قدرت ثروته ساعتها ب ٢٣٦ بليون دولار حسب صحيفة الأندپندنت الأنجليزية.
اثناء تقسيم الهند و انفصال پاكستان عنها في سنة ١٩٤٧ اعلن نظام حيدرآباد انه مش هينضم للهند او لپاكستان و اعلن نفسه دولة مستقلة فقامت الهند بالعملية پولو و امتصت حيدرآباد تاني في الأتحاد الهندي سنة ١٩٤٨.
حالياً حيدرآباد هي سادس اكبر مدينة في الهند و تعدادها ٦ مليون شخص و هي من اكتر مدن الهند تقدماً من ناحية الحداثة و التتطور و كانت قبل كدة معروفة بمنطقة اللؤلؤ و هي حالياً مصنفة انها المدينة الاولي من حيث اولوية التنمية بسبب حجمها و تعدادها.
كل الشركات حالياً بفتح في حيدرآباد ما يعرف بbusiness & support hubs نظراً لآنها متوفر فيها مقومات العمالة المناسبة و المناخ المتتطور ، فطول ما انت ماشي تشوف مكاتب Facebook و Wipro و Deloite و Amzon و Microsoft و حالياً شركتي كمان فتحت مكتب هناك و هو دة الي زرته في الرحلة دي.
المدينة متميزة بأكلها و مطبخها الشهير الي مختلط بين المطبخ العربي و الأيراني و الهندي و فيها ناس كتير من اصول عربية و فارسية من الي هاجروا لها ، علي سبيل المثال لا الحصر البرياني بتاع حيدرآباد احلي واحد علي الأطلاق و مشهورين بيه و كمان في مبدأ انه حلال نظراً لوجود عدد مسلمين كتير.
الوقت مأسعفنيش اني اروح اماكن سياحية خالص بس اصحابي ودوني سوق للولولي و ياااااه حاجة خيالية ، المكان كله بيلمع و فيه اللولي من اوله لأخره و كله لولي طبيعي و الوانه كتير بين الابيض و الاسود و الأوف وايت و الاشكال الدائرية او البيضاوية او الي علي شكل رزة ، بيتعمل منهم حلقان و سلاسل و انسيالات روعة في الشكل و الأسعار مقارنة بالسعر عندنا.
قبل ما اروح اي بلد حتي لو شغل بقرا عنها كتير من رحلات الناس و البلوجرز هناك و لما قريت عن حيدرآباد ذكرت شوية اماكن و كانت صورها مبهرة بس للأسف مكانش عندي وقت اروحها زي مسجد تشارمينار الي اتبني في القرن الستاشر احتفالاً بالتخلص من وباء الطاعون و هو تحفة معمارية و مزار سياحي للمسلمين و الغير مسلمين و كمان في قلعة جولكاندا فورت الي اتبنت في القرن الاتناشر و هي احد اشهر حصون الهند و في قصر الملكة الي بيعملوا فيه عروض للصوت و الضوء و اخيراً في قصر تشوماهالا الي يعتبر مكان سياحي بيجيله الناس من كل حتة و يتميز بتصميم غاية في الجمال و فيه نوافذ و منحنيات و حدايق و برج الساعة و فيه اربع مباني و معارض لمجوهرات الملكية و غرفة للسيوف و مجموعة نادرة من العربيات القديمة و متحف سالار جونج الي يعتبر من اكبر متاحف الهند.
رجعت محملة بذكريات حلوة و سوڤينيرات قصتها تفضل في قلبك و عقلك للعمر كله ، منها ما هو مرتبط بمعتقداتهم و دياناتهم المختلفة ، كلها تحمل في فكرتها حب و صداقة كبيرة و طبعاً وصلوني و جابوني و فسحوني في حدود الوقت الي كان متوفر.
مثلاً اهداني صديق حلق لولي فيه الؤلؤة عمرها ١٠٠ سنة و قالي انه يتمني ان تستمر صداقتنا ١٠٠ سنة زي عمر اللؤلؤة دي و اتأثرت جداً من اللفتة ، و جابلي زميل اخر فانوس يتحط فيه شمعة في احتفال الديوالي الي في المعتقدات الهندوسية و هو عيد الأنوار و جالي كمان سلحفاة زحاجية كدة و معاها طبق زجاجي و لازم تملا الطبق مية و تغمر السلحفاة في الماء كلها ، في المعتقدات الهندية السلحفاة دي جالبة للحظ و الزرق و هدية تانية عبارة عن تمثال لعازفين بيعزفوا الناي فيما يعني انه فأل خير و يشيع الفرح و البهجة في الاسرة و البيت .
الخلاصة : مفيش حاجة زي انك تشوف صحابك القدام و تتقابلوا بعد فراق ، و دة اصدق شعور رجعت بيه مصر و اتمني اشوفهم تاني و هم بيحبوا المصريين او بيحبوني انا علي الأقل ???? و فاكرين كل الحاجات الي عملنها و شفناها في مصر سوا لما زاروا مصر في الأتناشر سنة الي فاتوا من ساعة ما عرفنا بعض .
و تظل الصداقة ملهاش جنسية او ديانة لانها مشاعر انسانية بحتة . اتبسطت كمان اوي اني قابلت صديقي و زميلي العزيز جو و صديقتي و زميلتي التايلاندية پيچرين و طبعاً راتشنا الي من الهند اصلاً و جات لنا من نيودلهي لحيدرآباد .
#नमस्ते_Nameste
#مني_في_حيدرآباد
اشترك في نشرتنا الإلكترونية مجاناً
اشترك في نشرتنا الإلكترونية مجاناً.
الجمعة, مارس 29, 2024
آخر الاخبار
- سلة الاتحاد السكندري تتعاقد مع صانع الألعاب الأمريكي ” مايكل ديكسون “
- دوللي شاهين تنتهي من تسجيل أغنية “ست البنات”
- ملتقى العصر بالجامع الأزهر يوضح مفهوم العبادة وخصائصها في الإسلام
- الاتحاد السكندري ينعى الكابتن فؤاد مرسى أحد نجوم الجيل الذهبي لزعيم الثغر
- بمشاركة ٤٠ عارضا و٧٥ لوحة مدير تعليم بورسعيد يفتتح معرض مدرسة الخط العربي
- برواية حفص وشعبة ورويس.. آلاف المصلين من مختلف الجنسيات يشهدون صلاة التراويح بالجامع الأزهر
- الإمام الأكبر: القرآن دفع المسلمين وشجعهم على إنارة الغرب والشرق في عهد الظلمات
- بحضور رئيس المكتب السياسي والمتحدث الرسمي … حزب العدل ينظم حفل إفطار جماعي وأمسية رمضانية بالإسكندرية