نبيل سلطان يكتب : الزتونة يا ريس

1

عنوان عجيب مش كدة بس معبر جدا عن ما هو قادم ..كلمة الزتونة يستخدمها عادة الناس بينهم وبين بعضهم قائلين ادينى الزتونة يعنى ادينى الفايدة إللى هاتعود عليا فى الاخر .

وانا هنا بردوا يسأل الرئيس فين الزتونة فين الفايدة ..جاية امتى يا ريس انا والناس مستحملين كل أنواع الفساد والتخبط وغلاء الأسعار ووقف الحال والضنك والتقشف وحكومة اللى شغال فيها ٢ او ٣ وبرلمان هو الاضعف على الاطلاق فى تاريخ مصر ومحليات متاجلة مش عارفين لية او عارفين ومطنشين وضرايب وجمارك الخ الاخ ..

وبطلنا يا ريس والله المكسرات والسيمون فيمية وشغالين على السودانى والفنكوش ومستحملين فواتير الكهرباء والغاز والمياه وبطلنا لحمة بلدى والفراخ بقت رفاهية والزيت حطينا معاة قطارة والمشوار بقى بحساب عشان البنزين وهانستحمل اكتر صدقنى يا ريس مستعدين نستحمل اكتر املأ فى انك تطلعلنا بالزتونة بالفايدة

مستعدين نستحمل لو طلعت علينا قبل الإنتخابات الجاية وقلتلنا معلش انا المرة إللى فاتت مجبتش معايا برنامج عشان مكنتش عامل حسابى ومشيتها معاكو افكار كل يوم ومشاريع طلعت بالليل ونفذناها الصبح وقرارات خدتها الحكومة من غير دراسة ومن غير تجهيز كويس وقانون استثمار لسة مظهرش حتى الآن بس المرة دى انا برنامجى يرتكز على اصلاح التعليم واصلاح منظومة الصحة ورفع ميزانية البحث العلمى ورعاية العلماء ودعم الاستثمار والمنتجين والمصنعين ..عارف يا ريس لو طلعت علينا بالكلمتين دول هتبقى فعلا اديتنا الزتونة لأننا عايشين بس دلوقتي عشان ولادنا عاوزينهم يطلعوا فى بلد بجد مش شبة دولة ولا دولة ضائعة عاوزينهم يعيشوا فى امل احنا فقدناه خلاص ان البلد دى تتقدم فى التعليم والصحة والبحث العلمى إللى هما على فكرة مش رفاهية خالص .

بالعكس دول هما مصنع التقدم والتحديث والتخلص من الجهل والفقر والإرهاب هو السبيل الوحيد للتخلص من عادات اكتسبها الكثير من أبناء هذا الوطن على مر اربع عقود ماضية ويذيد من فساد وخراب فى الضمائر والزمم والأخلاق وتدين شكلى يحمل بداخلة جميع أنواع الموبيقات بل أسوائها على الإطلاق .

التعليم .. الصحة … البحث العلمى .. الاستثمار هما دول الزتونة إللى مستنينها منك يا ريس …كفاية اسمنت ورصاص واسفلت خش بقى على البشر .ادينا الزتونة يا ريس .

التوقيع

مواطن

تعليق 1
  1. د.حنان عبد العظيم يقول

    كلام معبر عن ما في خاطر كل مصري بيحب بلده ونفسه ترجع تاني مصر القوية الأبية إللي بتساعد غيرها مش منتظره إللي يساعدها مش محتاجين نقول قد إيه لآخر لحظة بندعمك ياريس بس عاوزين فعلاً يكون دعمنا في محله الحمل تقيل الله يعينك ويقويك وخصوصا مع أغلبية شمتانه أكتر منها متعاونة وشقيانه تربي ولادها في بلد بجد بلد نفتخر به بلد نقدر نحميه كي نستحق العيش به?
    ياريت نعيد نظر في:
    البرلمان(ده وجهة مصر مش هزار فين العلماء والمفكرين ورجال الإقتصاد والدين بجد)
    الداخلية (مافيش وجود فالشارع لهم وضاع امن والأمان)
    الصحة(فين التأمين الصحي بجد إللي يخلي المستشفيات الحكومية والجامعية أفضل من الخاصة)
    التعليم (ياريت الدين الإسلامي والمسيحي يدرس مثل زمان مش يتلغي؛ فين التبادل الثقافي مع الدول المتقدمة؛ فين تشجيع المتفوقين والمبتكرين ومعارض العلوم والمسابقات المحلية والإقليمية والعالمية وفين وفين ألخ).
    تسلم إيدك حضرة المهندس نبيل سلطان بجد كلمة ما يحس بها غير إللي بيحب بلده علشان هي دي زيتونة المصريين ???

اترك تعليق