تعشق وَليف يسلاك
تعشق وَطن يحنيك
بين غربتك جواك
وحدود بتشمَت فيك
الصدفة بتحب اللي مش بيحبها
ودا طبعها
والصدفة وارد تخدمك من قلبها
والوقت مارد تحرقه ينسّيك
عيش اللي مات منك وهو يعلمك
في جرح بيهدّك عشان يبنيك
ما انتاش ضعيف..ما انتاش جدع
والحكمة مش إنك تكون حِمل الوجع
كام م اللي قبلك عاش حزين شيّال
الفكرة مين حَرّم ومين تاني انخدع
يختل تل تدوس كتافه تلال
يا قلبي يا عصفور..
طرح الخطاوي خَضار..
بس الغنا مكسسور..
من رعشة المنقار
افرد جناحك وانت تنسى الزقزقة
وتبدّل الأحلام شقى
مسجون بريء عشمان ف حبل المشنقة
من سجن بارد لسعته بتكويك
بين ألف بر لمحته أصله سراب
السِرب قادر بالونس يحميك
إرحل فصيح..
ترجع قوي
طعم الكلام يحلو كل مايستوي
وانت اللي ياما شبعت مر كلام
هدّك نظام!..
حَلّق لعالم فوضوي
دا مافيش سكك في السما..مفروشة بالألغام
#أحمدأسامة
عالم فوضوي