كتبت – أسماء المهدي
نشر الفنان أحمد جمال تعليقا له عبر صفحته على موقع التواصل الاجتماعي فيسبوك بمناسبة نتائج الثانوية العامة.
وقال جمال: بالنسبة للناس اللي جابت مجموع كبير في الثانوية العامة مليوووون مبروك انت كده ابتديت اول خطوة في مشوار حياتك بس لازم تكمل بنفس الطاقة اللي عندك دي عشان متهدش اللي بنيته.
اما بالنسبة للي جاب مجموع مش عاجبه او مكانش متوقعه صدقني دي مش نهاية الكون، ياما ناس نجحت في حياتها اكتر من ناس نجحت في دراستها.
وناس قدرت تنجح في مجالات غير مجال دراستها تماما نتيجة انها قدرت تشغل دماغها كويس مع شوية مجهود.
في النهاية افتكر كويس ان ده نصيبك وده اللي ربنا اختارهولك وربنا مبيختارش إلا الخير بس انت مش عارف.
واضاف جمال قائلا: اهم نصيحة هقولهالك: متضيعش وقت حتى لو دخلت كلية مبتحبهاش دور وفكر هتعمل ايه جنب دراستك عشان يكون ليك كيان كبير في المستقبل.
وانهي حديثه قائلا: استغل كل دقيقة انت عايشها دلوقتي في حاجة مفيدة عشان هتعرف قيمتها بعدين.