محمد جرنان خلَّص فى مشوار العلام لحد ثانية إعدادى، ومن صغره شغال فى مكتبة البلدية فى محرم بيه، مكان شغله إداله فرصة عمره للقراية، أى حاجة تقع تحت إيده يقراها، كتب ماشى، مجلات ماشى، جرانين ماشى، والجرنان تحت باطه منين ما يروح، وما بيسيبش صفحة ما بيقراهاش، حتى صفحة الوفيات، أما بقى الإعلانات المبوبة دى بيحفظها صم، ولو روحت له البيت ح تلاقيه مقصقص الإعلانات المهمة ومعلقها على مراية الدولاب، برغم إنه ما بيدوّرش على شغل، ولا بيفكر يسافر بره، بس لزوم مساعدة أى حد بيدوّر على شغل، لدرجة إنه عادى جداَ تلاقى عيل صغير بيخبط على باب شقته، وبيقول له أبويا بيسلم عليك وبيقولك ماصادفتش النهارده فى الجرنان شغلانة لاخويا كنّو، وده اللى خللى الجيران مسمينه محمد جرنان، وطبعاً محمد من كتر القراية لابس نظارة كعب كوباية، فردة شنبر منها مكسورة، ورابطها فى ودنه بأستك، ومحمد بيركب الترماى الصفرا من أول الخط فى عزبة سعد لمحطة الرصافة، وكل الكمسارية والمفتشين، وتلات أرباع الركاب عارفينه، وبياخدها مشى لحد المكتبة فى شارع زين العابدين، وتقريباً محمد كل يوم والتانى بيبقى منهمك فى القراية من أول ما يركب الترماى، وبتروح عليه المحطة، وما بيفوقش إلا لما الكمسارى يقول له، وتقريباَ بيكون وصل لمحطة مصر، ويضطر ينزل ياخدها مشى لحد الشغل.
ومحمد نموذج مثالى لبيسو المسكف، كل جمله لازم يسبقها، او ينهيها بكلمة النظرية، النظرية يا باشمهندس فى الموضوع ده، إن المجلس لا مؤاخذه كان بيماين مع الإخوان عشان يشوف ميتهم، أصلك مش واخد بالك لا مؤاخذه من النظرية، الجماعة العسكر دول رِئِمين، ويفضلوا لابدين فى الدرة، وساعة الجد تبص تلاقيهم نازلين قلمين على شلوتين، ولم تعابينك يا ولا إنت وهوّ وهىّ، ويشطبوا الليلة، حقهم برضو، فاهمين الفولة، ودارسين لا مؤاخذه اتجاه الريح، والنظرية إنهم م الآخر متخَصَصين فى الإستراتشية، مش زى العيال لا مؤاخذه بتوع الروبلالية و6 أكتوبر دول، أنا مفيش بينى وبينهم أيتها حاجة والله، بس النظرية إن العيل فيهم لسه بياخد مصروف من أبوه، وما يعرفش لا مؤاخذة القرش بييجى إزاى، وكل همّه يقولك عايزين روبلالية ودَستور، ويروح يعطل مصالح خلق الله وقالبهالك مليونية واعتسام، وهو مش عارف ان الاعتسام ده حرام، واللى عايز يعتسم لا مؤاخذه، يعتسم بحبل الله، مش يروح نايم لى فى خيمة، وبنات على سوبيان، ومسخرة، وتيجى تكلمه بالذوق يقولك إنت فلولى، ومش روبلالى.
ومحمد متابع جيد للأخبار، وبعد ما تنتهى نشرة الأخبار إللى بيحب يتابعها فى القهوة، يبدأ بقى فى تحليل الأخبار، ومحمد متخصص فى كله، يعنى سياسة ماشى، رياضة ماشى، سياحة ماشى، أخبار علمية ماشى، ومش قادر أنسى يوم ما جت سيرة ثقب الأوزون فى نشرة أخبار، والواد روما اللى بيشتغل مستخلص فى الجمرك، سأل محمد، ألا أيه المشكلة فى موضوع ألأوزون ده؟ هم ناويين يلغوا أوزون الاستيراد، الله يوقف حالهم زى ماهم عايزين يوقفوا حالنا، وعنها وأبو حميد إتعدل فى قعدته، وحط رجل على رجل، وقال له، أوزون استيراد أيه يا جاهل، دول بيتكلموا عن خرم الأوزون، وبدأ أبو حميد يتكلم عن المشكلة العلمية الخطيرة دى، وكأنه عالم من علماء البيئة: واخد لى بالك بقى يا روما، السما اللى إنت شايفها دى، فى أخرها زى قشرة إزاز كده معمولة بقى من الأوزون ده، بتنفِد نور ربنا عشان ينور الأرض، بس زى ما تقول العالم اللى بتستخدم البخاخات بتاع الكالونيا، والناموس دى عماّل على بطّال بيتسببوا فى إن لا مؤاخذه البخار اللى طالع ده بياكل فى القشرة الإزاز دى، وبيخرمها، الخرم ده بيدخل بقى شعاعات عفيّة بتضر جسم البنى آدم ولا مؤاخذه الحِيْوان، والنبات، وكل إشى حى على وش الأرض، ح يواصل روما استفساره، طيب والخرم ده فين بالظبط يا حمّو؟، يعنى فى أى منطقة فى البلد؟، ح يكمّل أبو حميد بدون أى تردد، يُكال والله أعلم، إنه فوق المنطقة اللى بين الحميات والمنارة، يعنى بالظبط كده فوق المستشفى الطليانى لا مؤاخذة، بس حادف سنة يمين قبلى القطر، طيب وده مالوش حل يا حمّو؟، ده واحد من زباين القهوة بيسأل، مفيش حاجة مالهاش حل، ده رد بيسو المسكف، ويفسر بيسو أكتر وأكتر: هوّ ح يحتاج ايه يعنى غير شوية مونة، على جبس أبيض، بعد ما تتصنفر حروف الخرم كويس، وتديها سكينة معجون، وفى الآخر تديها وش أزرق سماوى عشان تبقى ميه واحدة لا مؤاخذة، وما تبوظش المنظر.
طيب مين اللى ح يقدر على الشغلانة دى يا حمو؟ ده زبون تانى بيسأل، ح يرد بيسو بكل ثقة: آنى ولا مؤاخذه بعون الله أقدر أخلص الشغلانة دى فى ساعتين زمن بالكتير، بس ح احتاج سلم مطافى طويل، يتثبت كويس، وواحد معايا يناولنى.
ح تخلص نشرة الأخبار، وح ييجى برنامج عن عالم البحار، ح تلاقى بيسو أصبح ولا كأنه د. حامد جوهر فى زمانه، وخد بالك بقى من الكلام الزبد، الصورة فيها سمكة تونة، والكلام عن سمك التونة، بس بيسو مالوش دعوة، ح يقولك: سمك القرش ده خِطِر، وفيه منه فى النيل بالهبل، بس ورا السد العالى، الحمد لله إنه ما بيوصلش هنا، من كام سنة أرَم واحد صياد، وأكل دراعه، والسمكة من النوع ده بتبيض مليون بيضة، وبيفقس منهم يادوبك 4 بيضات بس، اتنين يطلعوا دكورة، واتنين نتايات، سبحان الله، عشان ما حدش يجور على التانى، ح يرد واحد يقول له يا حمو دى تونة مش قرش يا جدع، ح يرد يسو المسكف، ح يقول له يا فالح تونة ده إسم السمكة بعد ما تتقطَع ويحطوها فى علب، لو اتحطت فى علبة واحدة تبقى تونة، ولو تلات، أربع سمكات فى علبة، ح تبقى سلامون، إنما هى فى الأصل قرش، وعشان تعرف ليه بقى سمّوها سمكة قرش، آنى نقول لك، السمكة دى البيضا بتاعتها بتبقى قد القرش المخروم، ومخرومة برضو زيّه، بس الخرم على جنب مش فى النص.
ممكن الجرسون يقلب المحطة على برنامج طبى بيتكلم عن مرض السكر، ح تلاقى بيسو بيقول للجرسون خللى بالك بقى معايا من موضوع السكر ده، لو ح تحط فى الشاى سكر يبقى لازم يكون سكر قوالب، لكن السكر العادى ده، أو سكر البودرة هو ده اللى منبع الخطر، زمان مثلاً أيام سكر الأقماع، ما كونتش تلاقى حد عيان بالسكر ده خالص، ده بقى لامؤاخذه سببه إيه، أنا اقوللك، السكر لما بيدخل الجسم بيرجع تانى يتشكل جوه الدم على شكله الأساسى، بياخد لا مؤاخذه نفس المنظر بتاعه الأولانى، لو كان سكر اقماع، ح يرجع تانى جوه الدم اقماع، لو كان فى الأصل قوالب، ح يرجع قوالب، وأسهل نوع بقى فيهم اللى تلاقيه يسلك فى الدم لا مؤاخذه، هو السكر البودرة، بيمشى سخونة جوه الشرايين، لكن إدينى عقلك إنت بقى، ازاى القوالب والا الأقماع اللى قد كده، ح تمشى جوه شريان قد كده؟.
شوية وح تلاقى بيسو قام واقف، وقال لامؤاخذة بقى أنا لازم أقوم أروح، لازم البنى آدم ينام بدرى عشان لا مؤاخذه الخلايا بتاع جسمة تريح شوية، ماهو البنى آدم لما بينام كل خلايا جسمه بتقف ما عدا نص خلايا القلب عشان ما يحصلوش كرشة نفس وهو نايم، وخلايا المثانة لامؤاخذه عشان لو إتحظر، يقدر يقوم يروح الحمام بفك ميه لا مؤاخذة.
اشترك في نشرتنا الإلكترونية مجاناً
اشترك في نشرتنا الإلكترونية مجاناً.
الجمعة, مارس 29, 2024
آخر الاخبار
- سلة الاتحاد السكندري تتعاقد مع صانع الألعاب الأمريكي ” مايكل ديكسون “
- دوللي شاهين تنتهي من تسجيل أغنية “ست البنات”
- ملتقى العصر بالجامع الأزهر يوضح مفهوم العبادة وخصائصها في الإسلام
- الاتحاد السكندري ينعى الكابتن فؤاد مرسى أحد نجوم الجيل الذهبي لزعيم الثغر
- بمشاركة ٤٠ عارضا و٧٥ لوحة مدير تعليم بورسعيد يفتتح معرض مدرسة الخط العربي
- برواية حفص وشعبة ورويس.. آلاف المصلين من مختلف الجنسيات يشهدون صلاة التراويح بالجامع الأزهر
- الإمام الأكبر: القرآن دفع المسلمين وشجعهم على إنارة الغرب والشرق في عهد الظلمات
- بحضور رئيس المكتب السياسي والمتحدث الرسمي … حزب العدل ينظم حفل إفطار جماعي وأمسية رمضانية بالإسكندرية