باهرب في دواير مقفولة
واكتب عن ناس مش عارفاني
مين فينا بيصعب ع التاني..!
العالم بقى مزعج جدًا
والناس دوسهات على رف المال
الحال اتغير تدريجي
وخلاص كام يوم وتبان اهوال
الدمعة اللي بتنزل تسرق
تقاطيع العمر تسيب تجعايد
كت دمعة بتنزل على عالم
سعداء جدًا طول ما انت بعيد
لو “آدم” كان شافك مرة
كان يحلف ما يخلف تاني
ويجيب ذرية بتشبهلك
او نوح كان حس باشعارك
كان عاب في سفينتة
بلعها البحر
وقضا على كل البشرية
لكن تدابير من رب الكون
وحكم ومواعظ إلهية
الكون مبدور في كوليه الماظ
على صدر الحلوة اما بتضحك
هتقرب ..
هتقرب جدًا
تضحك ..
فتميل
طول عمرك بتحب التفاصيل
وتحب الضحك المتعري
وتحب النيل
والنيل كان كاره أمثالك
والليل لو شافك يستغفر
والصبح إن لمحك في الشارع
دا نهار اخبر
منبوذ يا حزين
واكمنك ساذج ومفلس
ماشي بتتلزق في الماشيين
الزيف كِيِّف
والحق رغيف
والبفرة كفيف
لو يتلسوع بيحب النار
وعشان الدنيا اما توزع
بتوفق دايمًا وتساوي
خدت الأشعار!!
ديناميت
وقتابل مع تبغك في مَرل الدنيا بيتلوفوا
وبتشرب وتفجر نفسك
“محابيس في مشاعرك يتزفوا”
والليل بيشارك في مماتك
اكمنه اتغرق بدموعك
والجنة اما بدات السكة
تتسيقها ماكنش في مجموعك
الدنيا جريمة بطبيعتها
والموت عامل دور القاضي
وبيحكم دايمًا بالإعدام
الزقة اللي مابتوقعشِ
واخدك على خطوة لقدام
القهوة اللي مابتفوقشِ
اكمن نصيبك هتنام
والقوة اللي في وسط الكترة
دايمًا بتقول استسلام
الحق ببصرخ في الثورة
الثورة العورة في عين باشا
الجرح اللي منبت فيا
مابينفعلوش ولا كماشة
والخوف الفطرة بطبيعتنا
والعضم اللي مصاب بهشاشة
وضميرك لو عنده زكام
دي حاجات بتجيلك على بالك
اول ما تلاقي سؤال مالك
مع ذلك بترد -تمام-
روبابيكا يا عالم روبابيكا
مين عنده حاجات م الانتيكة
هاخد على قد ما هتبيعوا
واديكم صبر ومزيكا
روبابيكا يا عالم روبابيكا
شاري العِشرة
وشاري الجيرة
هاخد بالسعر اللي يناسب
تنهيد وعوايد وجبيرة
روبابيكا يا عالم روبابيكا
مين بايع تاني هنا يقرب
هاخد واديكم من قلبي
من قلبي الحلو المتغرب
روبابيكا يا عالم روبابيكا
قربنا نشطب قربنا
روبابيكا يا عالم روبابيكا
الروح بتروح للي خالقها
روبابيكا يا عالم روبابيكا
وماعدش خلاص
شئ في ايدينا
روبابيكا يا عالم روبابيكا
روبابيكا
خلاص
استكفينا