(1)
– صباح الخير يا بنت المتطلقة ?
– إنت بتقول إيه؟! ? قصدك إيه؟! ?
– مالك زعلتي ليه؟! هي مش دي حقيقة بردو؟! ?
– أيوة يا سيدي حقيقة .. بس ارجوك مش تحسسني إنها وصمة عار ? أو ذنب أنا أذنبته ?
(2)
– مفيش عندنا بنات في العيلة يطلبوا الطلاق!
انتي اتجننتي يابنتي؟ .. اعقلي .. استحملي!
عيب البنت تتطلق .. الناس هتآكل وشنا .. إياكي نسمعك مرة تانية تنطقي الكلمة دي! آل طلاق آل.
(3)
– بقولك ايه .. انا بفكر اتجوز تاني.
– يا عم هو حد يقدر اليومين دول على مصاريف بيت واحد لما يفكر يفتح بيت تاني؟!
– ما انا مش هدفع مليم .. يا عم دي واحدة متطلقة .. ومش بس كدة، دي كمان موظفة كمان .. يعني هى اللي هتصرف عليا، وعلي بيتي وعيالي .. وفي نفس الوقت هتشوف مزاجي وهتدلعني.
– يابن اللعيبة … هو دا الكلام … إنچوووووي يا ماااان .. وياريت بقى تشوفلي اختها ولا صاحبتها تكون هى كمان متطلقة .. دا احنا بالنسبة لهم لقطة وفرصة مش هيضيعوها وماهيصدقوا ان واحد يعبرهم ويفكر يتجوزهم.
– ايوة يا بني .. يحمدوا ربنا ويبوسوا إيديهم وش وضهر كمان .. دا احنا حلم ونعمة كبيرة بالنسبة ليهم.
– ماتجيب سيجارة بقي.
(4)
– بقولك ايه يا أحمد…
– ايه ياصاحبي؟ .. اهري.
– انا شكلي كدة حبيت وبفكر اتجوز.
– حلو جدا الكلام ده .. مين بقى اللي أمها داعية عليها دي؟ ايه ظروفها يعني؟ وعرفتها فين؟
– هى بنت جميلة وفيها كل المواصفات اللي بدور عليها .. بس فيها عيب واحد بس.
– عيب ايه ده؟!
-هى قالت لي انها متطلقة ?
– متطلقة؟! لا لا لا يا برنس .. ابعد عن البيت دي .. دي اكيد واحدة شمال ?
– يا عم مفيش الكلام ده .. دي بنت ناس ومحترمة ودي ظروف اتعرضت ليها مش باختيارها يعني.
– يا عم انت متعرفش حاجة .. يعني ايه تقول لأهلك انك هتجوز واحدة خرج بيت؟
– ده مش يعيبها .. وانا حسيت براحتي معاها.
– يعني بنات الدنيا خلصوا عشان تفكر في واحدة معيوبة وناقصة؟! ???
دي باختصار إطلالة سريعة على نظرة مجتمعنا للست المتطلقة ???
أو اللي والدتها أو أختها أو حتي بنتها متطلقة ???
دا مش بس من خلال الكلمة اللي ممكن تجرحهم وتدمرهم نفسياً .. لأ دا ممكن من خلال النظرة .. تقتلهم .. تدبحهم .. تكرههم في حياتهم ككل ???
عشان كدة .. قررنا نسلط الضوء ونتكلم عن الناس المؤذية دي .. ونفهمهم مدى تأثير كلماتهم على المطلقات، ممكن يتسبب في إيه ???
مش بس عشان ننصف المرأة المطلقة، ونصحح نظرة المجتمع ليها، لكن مع بعض كلنا لازم نساهم في تصحيح النظرة .. ومش بس كدة، دا احنا لازم كمان نساهم في مساعدتهم ومساندتهم في مشوار حياتهم، حتي لو بمجرد كلمة حلوة.
وكما قال عمرو دياب، وأخبارك مع التفاصيل بحب أسمعها بالتفصيل .. هو دا حال مجتمعنا .. الملئ بالأمراض .. منها النظرة الدونية للمرأة المطلقة .. والخوض في التفاصيل والسرد والنقد والتحليل .. ويبدأوا في تنصيب أنفسهم حكم وجلاد .. بلا رحمة ولا مراعاة لخصوصية التفاصيل ?
إيه اللي يضطر الست تفكر إنها تهد بيتها بإيدها وتطلب الطلاق لتواجه بعد ذلك صراع من نوع آخر مع المجتمع؟ وتبدأ خوض معارك وصولات وجولات في محاولات منها .. لتبرير وشرح أسبابها؟
انتظرونا قريبا .. في الحلقة الأولى من سلسلة (مذكرات مطلقة) .. في الحديث عن ما الذي يدفع المرأة لهدم بيتها ومملكتها بكامل إرادتها؟!
ولماذا تجد المرأة راحتها في الانفصال وقطع كل خيوط الأحلام والآمال من قبح الأفعال .. فنحن مجرد ردود أفعال?
#مذكرات_مطلقة
#شيماء_أحمد