القلوب العاشقه أنواع :
1 ـ قلب مفروش
2 ـ قلب ايجار جديد
3 ـ قلب ايجار قديم
4 ـ قلب تمليك
5 ـ قلب لوكانده !!
6 ـ قلب زى ولاد الشوارع ( تحت الكوبرى)
القلب المفروش : بيبقي زى الشقق المفروشه بيكتر في الصيف, وله زمن معين ومحدد ..وبيبقي للى بيدفع اكتر من مشاعره وماله, وطبعا بيتحدد سعر العواطف حسب موقع القلب..يعنى القلب اللي ع الكورنيش غير القلب اللي مستوطن في حي ابو خروف !!
قلب ايجار جديد :
تعمل حسابك ان ممكن صاحب القلب يطردك في اى وقت..ولك مدة صلاحيه معينه..ودائما سعر عواطفه غاليه وبيبقي للضرورة القصوى !
قلب ايجار قديم:
تقدر تسميه ببساطه حب بنت الجيران..او الحب الاول ..بس عيبه انه بيبقي رخيص اوى للى مش بيعرف قيمته ..فتلاقي مثلا حسونه لقرع اللي جاى من مثلث الانتقام في الدلتا يقع حظ اهله ان ابوه واخد شقه ايجار قديم في سان استيفانو ب 3 جنيه 7 حجرات وصالتين واتنين حمام وف العماره اللي قدامه الاستاذ او المهندس او الدكتور فلا ن الفلاني اللي مراته من جذور مصريه اصيله وبنتهم انجي مثلا او نوران خريجة سان مارك وحاصله علي ليسانس اداب فرنسى ومعيده في الجامعه ..يتقدم لها حسونه ليخطبها وتقع الفاس ف الراس لان ابو حسونه يمتلك طين وزفت علي دماغ اللي جابه في البلد وقادر ـ ولا يقدر علي القدره الا الله ـ ويتم الزفاف .. طبعاحسونه بحكم موقعه في الحي اتعلم وبقي نص مثقف وعرف يختار الوان ملابسه بعد نصائح تهذيبيه من شباب الحي الراقي… المهم …. تفوت سنتين تلاته ويرجع حسونه لاصله ولطينه وتبان مزايا زرائبه وسباخه .لكن يصعب الطلاق والانفضال لان حسونه واخد انجي ( إيجار قديم ب 3 جنيه !!!) والقانون الظالم يمنع طرد الزوج المستاجر لزوجته إيجار قديم ..ولا حتى يعطيها فرصه لرفع قيمة الايجار بان يقلع حموده قفطانه ويرتدى الكاجوال الحديث !!!!
قلب تمليك:
وده الحب الحقيقي ..لانه بالاختيار بين الطرفين إختيار الروح ..ودائما الطيور هنا تقع علي اشكالها…. حتى لو احد الطرفين وقع في مصيبة الايجار القديم… بيبدل موقعه ويختار قلب تمليك يستحقه!
قلب لوكانده :
وده بيبقي زى رحلة اليوم الواحد او بالكتير اسبوع لو قابلته في شرم الشيخ !!
قلب تحت الكوبرى:
ده نتيجة انفصال الدوله عن ارض الواقع وإنتشر كثيرا بعد الانفتاح الاقتصادى!!
عادل حراز