لسه خايفه م المقابله
انتى رافضه ولا قابله
انتى قابله تتكلمى
تحكى ليا وتفهمى
ان حبى ليكى فرض
وان شوقى ليكى فرض
تطلعى للسما
تنزلى للارض
حتجوزك
لو حتى كنتىى واحده هبله
لسه خايفه م المقابله ؟
****
لسه خايفه م الجواز
قلبى ..قلب بابور الجاز
من حكه واحده تولعيه
لو هب فيكى ..اكتميه
وبسن ابره ..سلكيه
وان بات مكشر ..زغزغييه
ودلعييه بطار وطبله
تطلعى للسما تنزلى للارض
حتجوزك
لو حتى كنتى واحده هبله
******
عندى شقه ايجار جديد
طوبه حمرا وباب حديد
تدخلى م الباب يمين
تلقى خالتى ام اسماعين
ماليه بيتها بالخزين
طشتها مليان عجين
وشها ولا وش عبله
تطلعى للسما تنزلى للارض
حتجوزك
لو حتى كنتى واحده هبله
*****
حبى ليكى شيىء غريب
كيس مخلل بالزبيب
حلو حادق منه فيه
تضحكى لما تشوفيه
تصرخى لما تدوقيه
فوق شفايفك حتلاقيه
زى طعم احلى قبله
تطلعى للسما تنزلى للارض
حتجوزك
لو حتى كنتى واحده هبله