_ الزمالك والفتح … أسمع عن فرقة كورة تلعب شوط آه وشوط لأ .. أو فرقة تتدلع آخر ربع ساعه .. لكن فرقة تلعب 5 دقايق في ماتش واتعشت فدي جديدة.
_ أنا لا بشوف أحمد توفيق في هجمة الزمالك ولا في هجمة المنافس .. تقريبا التليفزيون عندنا عامل له ميوت.
_ احمد توفيق في أي كورة مهما كانت اول حاجه بيفكر فيها انه يحط جسمه يحجز عالكورة .. الزمالك لو جاله ضربة جزاء والمفروض يشوطها هيدخل يحط جسمه برضو.
_ الزمالك بقى قليل الحيلة اوي لدرجه ان فريق من لبنان اللي معندهمش غير ستار اكاديمي كسبه.
_ أي مهاجم مهما كان مستواه بيعدي من ورا علي جبر لدرجه اني بدأت أشك انه بيشتغل شغلانتين وقت الماتش عشان يحسن دخله.
_ تشكيل الزمالك قدام النصر النهارده يدخل الزملكاوية الإنعاش مستريح.
_ شوقي السعيد ده انا نفسي اشوف الغبي اللي اقنعه يطلع لاعب كرة.
_ حازم امام جنب حسني فتحي واسامة إبراهيم ولا كأنه كافو.
_ حسني فتحي بيعمل مجهود في السجود بين الاشواط وبعد نهاية الماتش اكبر من المجهود اللي بيعمله في الماتش نفسه.
_ احمد رفعت ده انا بكسل اشتمه زي ماهو بيكسل يجري في الملعب.
_ الزمالك بيشتري طوب الأرض من لاعيبة بس مفيش مدرب زي اللي بيشتري عفش للشقة وبيجهزها وهو اساسا معندوش شقة.
_ ماتشات الزمالك قلبت معايا بضحك لدرجة اني توقعت سيف زاهر يطلع يحلل الماتشات بجوب.
_ معلق اون سبورت اللي بيقول على إبراهيم عبدالخالق واسامه إبراهيم مكسب كبير للزمالك ياريت ياخدهم يلعبوا معاه خماسي.
_ طارق يحيي حصد نتيجة تعبه مع الزمالك السنين اللي فاتت .. ده فوت مباريات تقعده مدرب للفرقه مدى الحياة.
_ مشهد النهاية في الزمالك هيكون لاعبي الزمالك القدامى شايلين نار وماشين في جامعه الدول بيقولوا باطل وعلاء مقلد هيعمل نفسه شغال وايتر في كوستا.