سلسلة محو الأمية الزوجية .. الحلقة الثانية
كيف أستعيد الحب بيني وبين زوجي؟
دايماً تسمع من زوجة، “مبقاش فيه حب بينا زي زمان، أنا حتى بطلت أسأل أو أهتم عشان بقيت أحس إن الجو ده مبقاش لايق علينا، وهو كمان بيحسسني بكده”!
1) غيري الفكرة اللي حابسة نفسك فيها، كل ما تفكري تتغيري وتتصرفي كويس، وبلاش تفضلي محتفظة بصورتك اللي كلها فقدان أمل وقلة ثقة بنفسك .. جددي نيتك .. الفكرة دي مش موجودة غير في عقلك بس، حتى لو هو بيأكدهالك طول الوقت .. أول ما تقرري تتخلي عنها وتؤمني بنفسك، هتلاقي العيون كلها شافتك برضو بنفس النظرة .. الناس كلها بتشوفنا حسب ما احنا بنفكر في الأشياء.
2) كان في قصة، لزوجة كانت قربت تكره جوزها، عشان مبقاش يهتم بيها، فسألت حكيم عن طريقة تنتقم بيها منه قبل ما تطلب الطلاق .. الحكيم طلب منها إنها تدي لنفسها شهر تعمل كل حاجة تخليه يحبها، قالها لو حبك فعلاً وبعد كده فكرتي تسبيه، ساعتها فعلاً هيبقى ده أكبر انتقام .. فعلاً عملت في الفترة دي كل حاجة هو بيحبها .. أكل .. طريقة كلام .. معاملة مع أهله .. المهم إنها كانت مركزة أوي إنه يحبها، لأنها فعلاً عايزة لما تسيبه، يكون فعلاً حبها .. بعد الفترة دي قابلت الحكيم .. وقالتله إنها خلاص مبقتش عايزة تسيبه، لأنها مجرد ما خليته يحبها، بدأت هى كمان تنسى أي حاجة عملها … (المقصود .. بدل ما تدوري على حاجات تبعد بينكم، ركزي في الحل واللي بدايته إزاي تكسبية).
3) إفهمي واتأكدي إن أي حاجة هتعمليها هيقابلها باستنكار، ومش هيقدر، بس مع التكرار والبال الطويل هياخد باله وهيتأكد إنك فعلاً صادقة في نيتك، مش بتعملي كدة بالصدفة معاه، أو إنك مثلاً عايزة حاجة عشان كدة بدأتي تتغيري للأحسن.
4)كل رجل ليه نقطة ضعف .. ممكن تكون أكلة حلوة، معاملة حلوة لأهله، ضحكة في وشه .. حاولي تحرزي نقاط كبيرة جداً في المواضيع اللي انتي أكتر واحدة عارفة إنها مدخل لقلبه.
5) بطلي تبقي كثيرة البكاء والقمص .. على الأقل في البداية .. واختاري الوقت المناسب اللي تعاتبيه فيه، لو صدر منه حاجة زعلتك.
6) حاولي يكون ليكي أي اهتمامات غيره، عشان تقللي تركيزك الدائم للخناق معاه مثلاً (قراءة، رياضة، حفظ قرآن، وصفات طبخ على اليوتيوب) أو اكتبي قائمة بالحاجات، اللي بتحبيها، واقعدي فكري إيه اللي بيسعدك وممكن يملي وقتك وابدأي فوراً.
7) اكتبي ورقة فيها كل الحاجات الحلوة اللي عملهالك حتى من أيام الخطوبة .. وتغاضي عن ذلاته والمشاكل اللي فاتت .. واعرفي إن كل البيوت فيها مشاكل وخلافات .. المهم إمتى نقرر نعيش حياتنا على مزاجنا.
8) اسجدي .. طلعي أي طاقة سلبية عندك، وتعبك مع أطفالك، أو مع أي ضغوط وانتى ساجدة .. أظن الفترة اللي فاتت، اشتكيتي كتير للناس ومسمعتيش غير معلش.
وأخيراً .. الدعاء، ادعي وكأن الدعاء هو مفتاحك الأول والأخير لقلبه .. واعرفي إن أي استقرار هتوصليله معاه، هيعود على أطفالك بالراحة، ولنفسك قبلهم.
مايسة كمال
محاضر ومستشار العلاقات الزوجية
مؤسس فريق زعماء فالصغر