” حبك يا صديقى يزهر فى قلبى بساطا من ربيع، ويصنع من صحارى روحى المقفرة حدائق ذات بهجة ”
قرأت هذه العبارة ذات يوم ولم تخرج من قلبى أبدا…..
لما فكرت فيها وركزت اوى سألت نفسى هو يعنى إيه صديق؟
هل أى شخص معدى كده من جنبنا وعاملنا كويس ينفع نقول عليه صديق؟
ولما قرأت العبارة دى وجدت إن دى أصدق عبارة ممكن توصف يعنى إيه صديق ويعنى إيه صداقة…
الأصدقاء هم السند، هم اللى وجودهم طمأنينة، هم ربيع قلوبنا وبهجة عمرنا، هم السلام اللى دائما بنبحث عنه، اللى روحنا بتستكين بوجودهم…..
فى رحلتنا فى الحياه محتاجين لسند ودعم، بشوف إن أكتر ناس ممكن تقدم لنا الاتنين هم الأصدقاء، ولما بقول أصدقاء أقصد المعنى الحقيقى للصداقة، اللى بتبان وتظهر وتزهر مع المواقف المختلفة اللى بنتعرض لها وبنتحط فيها من وقت للتانى….
الأصدقاء هم ال comfort zone الخاصة بنا، موجودين فى كل الأوقات حتى لو غابوا بمعنى مش شرط أكلمك ال ٢٤ ساعة لكن لما تحتاجني هتلاقينى معاك، بسندك لما تتعثر فى الحياة، وجودى بالنسبة لك سلام …
صديقى هو أخى الذى لم تلده أمى هو الروح، هو الحياة اللى بدونه أشعر إن فى شئ ينقصنى..
صديقتى هى السند والدعم..
صديقك هو اللى بيبذل قصارى جهده علشان يشوف الضحكة على وجهك مرة تانية…
الصديق هو اللى بيحميك من استفراد نفسك وعقلك بك، مش بيترك لك مجال للندم وإنك تقول ياريتنى….
الصديق هو اللى بيفهمك ومش محتاج إنك تبرر له أى تصرف على الإطلاق، اللى متبقاش شايل هم هو فهمك صح ولا لا، مش محتاج تشرح له انت كنت قاصد إيه فى موقف معين..
الصديق اللى بيحترمك ولا يقلل من شأنك أبدا…
الصديق الحقيقى هو مرايتك، لو عملت الصح معاك ولو عملت الغلط معاك برضه بس بينصحك ويقومك ويشدك للصح…
الصديق هو الصادق فى كلامه ومشاعره، هو اللى بيلتمس لك العذر..
الصديق الحقيقى رزق..
فى مثل تركى بيقول :
” Kardeş, dost olmayabilir ama dost her zaman kardeştir ”
بمعنى ” قد لا يكون الأخ صديقا، لكن الصديق دائما أخ”
لما بفكر فى العلاقات بشكل عام، بجد إن الأبقى والأبهج والأحلى هى الصداقة، لها مكان تانى كده فى القلب، مختلفة عن باقى العلاقات..
وبرضه لما فكرت إيه أكتر حاجة صعبة ممكن تحس بها أو تخاف منها هى فراقك عن صديقك…..
وعلشان كده دائما بقول اعملوا ذكريات حلوة ما بينكم وبين الناس اللى بتحبوها، اتصوروا كتييييير، عيشوا حياتكم وافرحوا واصنعوا ذكريات ، لأن الذكريات دى هى الشئ اللى بنلجأ له لما نكون مرهقين ومخنوقين من زحمة الحياة ومحتاجين نرجع بالزمن لوراء شوية ونفتكر أيام حلوة عدت علينا….
محتاجين ذكريات حلوة علشان لما تقعد تتقلب فى دماغنا تقلب علينا الحنين متقلبش علينا المواجع…
” الصداقة” كلمة قيمة جدا بالنسبة لى، مش أى حد يصلح إنه يحظى بها…
هو صحيح كلنا بنخطئ وبنستعجل فى حكمنا على الآخرين وكتير اتخدعنا فى ناس وما زلنا بنتخدع، بس برضه بنتعلم…
ومع الوقت بنعرف قيمة الأصدقاء والمعنى الحقيقى للصداقة ….
الدنيا حلوة بالناس الحلوة اللى بنلاقيها حوالينا ..
يمكن كلنا اتعرضنا لخيبات أمل كتيرة من ناس استعجلنا ووضعناهم فى خانة الأصدقاء لعدم وعى مننا أو لطيبة زايدة لكن الحقيقى إن ربنا بيعوضنا بناس تانية أحسن كتييير …
بقاء الناس أو خروجهم من حياتك ده أمر طبيعى وده حال الدنيا، مش دائما تسمع إن دوام الحال من المحال..
لكن مش معنى إن الدائرة اللى حولك بدأت تصغر إنك تضايق ، عارف ليه؟
أنت بتشوف إنها بتضيق عليك لكن الحقيقة غير، هى بتهيأ نفسها لاستقبال ناس جديدة تعوضك عن اللى خرجوا منها أو بتفضى مكان لناس موجودة أصلا بس محتاجين يأخذوا مساحتهم الحقيقية فى قلبك…
وعلشان كده اوعى تزعل لما حد يطلع من حياتك لأن ربنا بيعوضك بالأحسن والأفضل..
ولما تلاقى صديق حقيقى جدع وبيحبك امسك فيه بإيدك وأسنانك واوعى تسيبه…
باولو كويلهو بيقول: ” عندما يرحل أحدهم فذلك لأن أحدا آخر على وشك الوصول” …
والحياة بشكل عام عبارة عن تلاقى وفراق، جايز جدا إننا نكون مجبرين على الفراق لكن الفراق بيكون عدم وجودنا فى نفس المكان مع الناس اللى بنحبهم لكن روحنا دائما حاضرة معاهم، جايز جدا بعد الفراق يبقى فى تلاقى وجايز لا، بس الأكيد استمرار وجود الناس دى فى قلبك…
لما فكرت اكتب المرة دى، قررت إنى اكتب عن الصداقة وعلشان اقول للناس اللى بحبها اد إيه هم غاليين عندى ومهما فرقتنا الظروف أو البلاد هيفضل مكانكم محفوظ فى قلبى ودوما ستظلون الأقرب…
كلموا أصدقائكم وطمنوهم إن مهما بعدتكم الظروف، هم الأقرب والأغلى..
Life is too short…
الحقوا قولوا للغاليين إنهم غاليين، اتحاموا فى أصدقاء عمركم…
وأنت بتسأل نفسك مين أصدقائك ركز فى علاقتك باللى حواليك وفكر مين اللى هتقدر تقوله:
كن صديقى…. فأنا محتاج جدا لميناء سلام…..♥️
#كن_صديقى
#منةالله_المشيرفى