من ساعة ما اتلميتي علي شوية العيال دول و انت حالك اتبدل ، انا لازم افهم ايه الي بيحصل يا يسرية …لا بقيتي عارفة حاجة عن العيال و لا عارفة حاجة عن البيت ، دة حتي امك بقت تسألني عليكي ، ايه الي جرالك يا يسرية ؟ ايه الي حصل ؟ قوليلي عايزة ايه بالضبط ؟ انطقي قولي عايزة ايه ؟
عايزة ورد يا ابراهيم
الحوار السابق دة بين الراحل الجميل خالد صالح و هند صبري او يسرية و ابراهيم في فيلم احلي الأوقات – و بما اننا علي اعتاب الڤلانتاين يبقي اليومين دول يومين الورد او الخناقات علي ان الورد مجاش سواء علشان الكباب رومانسي اكتر من الورد عند بعض الناس او علشان في مبيحتفلوش بعيد الحب او لأي سبب اخر.
بدون الدخول في تفاصيل قصة عيد الحب نفسه و القديس ڤلانتاين اليّ نُسب اليه اليوم – تعالوا نبصلها من ناحية فكاهية و نتخيل لو بعض قصص الحب الي شفناها و عشناها مع ابطالها في السينما المصرية كانت حصلت في وقتنا الحالي:
– مني و أحمد: في فيلم أغلي من حياتي مني و احمد بيتقابلوا بعد ما اتفرقوا بسنوات طويلة صدفة و هم ماشين قدام محل جواهرجي ، و المخرج بينرل بموسيقي تصويرية و slow motion كل واحد بيلف و يتقابلوا face to face و يمسكوا ايد بعض و تركب معاه العربية و الموسيقي التصويرية تشتغل – بغض النظر عن الأوڤر اوي اوي في الحبكة الدرامية الي حصل دة لو كان الي حصل في وقتنا الحالي كانوا هيلاقوا بعض من خلال people you may know علي الفيسبوك.
– سميحة و صلاح : في فيلم الوسادة الخالية ، عبد الحليم بيغني اغنية مشغلول و حياتك و حياتك مشغول و لأخر الأسبوع مشغول – فتقوله هشوفك بكرة ؟ يقولها انا بكرة مواعد قلبي راح يحكي الي مخبيه ، هيقولي حكاية حبي و هقوله علي انا فيه – و شوية و تقوله و بعد بكرة فيقولها انا عندي معاد مع صورة لصبح اسهر قدامها – و تستمر الأغنية علي هذا المنوال ، النهاردة لو حد سأل حد عندك ايه بكرة هيقوله هشوف الكالندر و ارجعلك .
فريدة و ابراهيم : في فيلم حبيبي دائماً ، نور الشريف بيقول لپوسي و هم في الجنينة قاعدين انه عايزها معاه في كل حتة و هتيجي معاه العيادة كل يوم و تنظمله مواعيده و حساباته – لكن كل اسبوع ‘ هيعملوا ويك اند ‘ و قال : في الشتا نروح مرة الفيوم و مرة حلوان و في الصيف نروح مرة اسكندرية و مرة بلطيم – لو الحوار دة تم اليومين دول سيتم استبدال الفيوم و حلوان بالعين السخنة او الجونة و اسكندرية و بلطيم بسهل حشيش او سيدي عبد الرحمن.
نرجع بقي للورد و عيد الحب و الموضوع دة …هل الورد دليل علي الحب ؟ و لا في ناس تفضل اشياء اخري زي ابراهيم جوز يسرية الذي يفضل الكباب مثلا؟
بالمناسبة المصريين عندهم عيدين حب واحد للحب في معناه الشامل بداية من حب الله والأسرة والجيران والأصدقاء والناس كلها و دة يوم ٤ نوڤمبر – و التاني هو يوم عيد الحب العالمي يوم ١٤ فبراير ، لو تسألوني ايهما افضل اقولكم ان انا بحب العيدين و انتهز اي فرصة للأحتفال بأي شيئ ايجابي ، لو عملوا عيد لمحشي الكرنب هحتفل بيه ، بتلكك علشان احتفل و افرح ، و يوم عيد الحب العالمي بجيب لنفسي هدية ، مش مستنية ابراهيم يجيلي ورد و ان كنت من محبي الورد بس الواحد مش لازم يبقي في حد بيحبه علشان يحتفل بعيد الحب ، الصمود في الحياة و ان الواحد لسة مخه مضربش دة في حد ذاته انجاز يستحق ان نحتفل فيه بالحب من انفسنا لأنفسنا ، و شكراً اوي يا ابراهيم علي الورد الي مجاش ????
#أنا_عايزة_ورد_يا_ابراهيم