موضوع الصاروخ الصيني دة فكرني بفيلم السفارة في العمارة لما الصاروخ دخل من الشباك و دغدغ البيت و جاب عاليه واطيه ، قلت لنفسي دة اليّ هيحصل بس بجد و حق و حقيقي مش كلام افلام .
بعد كدة لما تابعت الأخبار عنه انتابني إحساس انه عيل تايه بيدوروا علي اهله بس اهله دول صينين و العالم كله واقف يبص في السما و مستني ان الصاروخ هينزل و يخبط فوق سطح بيتهم .
الرواية بتقول ان وكالة الأنباء الصينية اعلنت خروج صاروخ اسمه لونج مارش ٥ ب صيني الصنع و وزنه عند الأطلاق ٢٢ طن عن السيطرة و انه في احتمال يقع علي منطقة مأهولة بالسكان بعد اتمام مهمته و ان حطامه دة هينزل متفشفش تسعوميت حتة و هيضرب الكرة الأرضية … قلت دة كدة فيلم امريكاني مش صاروخ صيني و تسألت : هي دي نهاية العالم و لا ايه ؟
و هل لو فعلاً حطامه وقع في حتة هيبقي دمار شامل و هيحصل اندثار للمنطقة الي هيقع فيها و الناس هتموت ؟
و بعدين اذا كان اصلاً الكرة الأرضية نسبة اليابسة فيها ٢٩% و المية ٧١ % و اليابسة تشمل صحاري و غابات و مساحات فاضية شاسعة يبقي ليه في اتجاه انه هيسيب كلدة و يقع علينا و يفرتكنا ؟
و بعدين هو مش احنا خدنا في الفيزيا ان اي صاروخ بيُطلق وزنه بيقل اول ما الغازات الي فيه عالية الاحتراق تقل و يوصل لمداره ؟ هي مش الحاجات دي محسوبة و لا ايه ؟ و بعدين كمان خدنا ان اي جسم غريب بيحترق لما يعدي من الغلاف الجوي ، اشمعنا الصاروخ دة بقي مش هيحصله كدة ؟ .
دة حتي كل الأفلام الخيال العلمي الي كلها صواريخ كان في مشهد ثابت : كل العلماء واقفين يراقبوا انطلاق الصاروخ و يعدوا عد تنازلي من ١٠ الي ١ و بعدين تتم العملية بنجاح و يحضنوا بعض و يسقفوا و بعدها علي طول يقع الحطام الحامل و يبقي كله تمام التمام ، يعني الحطام بيقع كدة كدة مش حالة استثنائية صينية ????????
و بعدين من امتي اخبار الصواريخ و الفضاء و اجري ورا الصاروخ و الحق الصاروخ اخترق الغلاف الجوي و الحاجات دي بتهمنا و لا بنعرفها اصلاً ؟ مش وقته يا جماعة احنا دلوقتي بنتكلم في مواضيع أهم زي الكحك و الغُريبة و بسكوت النشادر .
و بعدين احتمالية ان الحطام ينزل و يدمر مكان او يمّوت ناس كام في المية في مقابل ڤيروس الكورونا مثلا ؟ و هنقدر نعمل ايه علشان نتفادي كارثة الحطام لو حصلت في مقابل هنعرف نعمل ايه في مواجهة الكورونا ؟ اضعف الأيمان نقعد في البيت و نلبس الكمامة و لا ايه ؟
انما تقولي صاروخ و صيني و اوعي وشك و هننفجر كلنا دة بالضبط اسلوب بص العصفورة علشان محدش يركز في الأنتصار الصيني الي حصل و انهم خلاص بتوع صواريخ هم كمان و عندهم برنامج فضائي و ماشين في تنفيذه ، طيب حد جاب سيرة الفايدة من صاروخ هتبقي ايه ؟
استهدوا بالله يا جماعة و سيبكم من الصاروخ الصيني و خلينا نحط كلمة صاروخ دي في جملة نفهما و عارفينها – البنت دي صاروخ ????
#البنت_دي_صاروخ