تجربة الكورونا دي لما الواحد بيعدي بيها بيتغير مع ناس حواليه و هو نفسه كشخص بيتغير.
واحدة صاحبتي اوي اوي جالها كورونا – و هي عموماً ست بنت اصول و خدومة – الدور جالها جامد شوية و في ايام تعبت اوي و الحمد لله ربنا منّ عليها بالتحسن و لازالت في فترة التعافي.
سألتها يا دوتس ايه اكبر الدروس المستفادة بعد التجربة دي ؟ ردت عليا رد حكيم اوي – جابته من ست صاحبتها حكيمة جداً ( و هي حكيمة بالفعل لانها دكتورة – و صاحبتي كمان دكتورة) .
قالتلي يا مني التجربة دي علي رأي صاحبتي الحكيمة زوزو ورتني ان في نوعين من الأصحاب :
– اصحاب صور و اصحاب بجد.
الكلمة قطّعتني بصراحة – شوف لما حد بعد التجربة دي يقول كدة.
قعدت و فكرت و مخمخت – الصداقة فعلاً مواقف مش عشرة عمر…
الصداقة مش عيش و ملح و ذكريات و قصص و ناس مشتركة و اماكن مشتركة…
الصداقة مش صور مع بعض و خروجات و تليفونات يومية و تفاصيل عن وقتك و يومك ، مش ترتيب لحفلة عيد ميلاد و لا تنظيم لرحلة مع بعض و هنطلع الچونة و لا شرم و لا بيروت و لا تركيا ، الصداقة مواقف.
مبنعرفش الناس بطول السنين وعددها لكن بالمواقف الي حصلت و بتحصل في السنين دي.
تثبت لي الحياة مراراً و تكراراً انه في وقت الشدة مش دايما اقرب اصدقائك بيكونوا حواليك و مش ديما بتكلمهم او يكلموك، في مواقف في الدنيا بيكون الي جمبك فيها مش اعز اصحابك ، لا ممكن يكون حد في دايرة بعيدة شوية عن دايرة الاصدقاء المقربيين .
في ناس كدة ، تعرفها و تظن فيهم ما تظن و تيجي المواقف تلاقي الي معاك حد تاني ، حد مش متوقعه.
المواقف دليل معادن الناس ، في البراق من برة ، مطلي و بيلمع و جوهره صفيح ، وناس مش براقة من برة لكن جوهرها نفيس ،الناس معادن و يا ما هنقابل ناس مصدية .
الناس و الصداقة مش friendship request ولا mention و tag في الصور .
المواقف هي المعيار الحقيقي لمنزلتنا عند حد و لمنزلته عندنا ، هي الدليل المعنوي و المادي لمعرفة استمرت سنين وشهور و ايام ، هي الامتحان العملي الواقعي لمسمي الصداقة الي كلنا بنقولها في كلامنا .
وياما في حياتنا يجي ناس ملهاش لازمة بس بتيجي في الوقت صح ، بنفتكرهم اصحاب او ناس تسندنا بس في الاخر بنكتشف انها ناس جت علشان بس تعرفنا قيمة الناس الصح الي ممكن نقابلهم بعد كدة .
في الاخر في ناس و صداقات بتكون علامات فارقة و ناس وصداقات بتكون علامات فارغة.
ادعو الله انيّ اكون مش من العلامات الفارغة – و ان اكون سند و عون لغيري و انيّ مكنش صديقة صور علي رأي الحكيمة زوزو بل صديقة مواقف .
#علامات_فارغة
#الحكيمة_زوزو