الي اتلسع من الشوربة ينفخ في الزبادي – مثل بنطبقه كل يوم في حياتنا و هو في رأي العبدة لله خاطئ و بيلبس في الحيطة بنسبة ١٠٠٪ .
لا شك ان الحذر و الحيطة مهمين و لهم دور كبير في ان الناس متغلطش او علي الأقل متكررش اخطاءها ، لكن لازم مننساش ان الحذر والحيطة لا مبيمنعوش ان الناس تعمل اخطاء جديدة لأنها كل يوم ممكن تمر بحاجات جديدة و معدتش عليها قبل كدة.
مبدأ ان الانسان يتعلم من اخطاءه مبدأ محمود و هو أصل التجارب الحياتية بس الدارج انه مش ان الشخص بيتعلم من الاخطاء و بس هو كمان بيعلم علي الناس و بيُسقط عليهم تجارب هو مر بيها و هم ملهوش اي يد فيها .
و من هنا تبتدي الناس تعمم من تجربة فردية نسمع كلام علي شاكلة :
كل الرجالة خاينة ، كل الستات نكدية ، كل المصريين فهلوية ، كل الي متجوزين من الاجانب مرتاحين ،كل المسلمين ارهابيين ، كل المسحيين متشددين ، كل المحجبات معقدين ، كل البيض حلوين ، كل برج الجوزاء مجانين او بوشين ، كل برج الميزان راسين ، كل العرب عشوائين و طبعا كل الستات مقهورين و كل الرجالة مفتريين .
اهو دي بالضبط وصفة اللبس في الحيطة في خطوة واحدة ، الناس بتمشي في سكة الي يروح ميرجعش بالطريقة دي بالضبط ، طريقة إسقاط التجارب الفردية و تحويلها لحاجة عامة و نشّد معانا فصيل بأكمله علشان احنا اتكعبلنا في حد ولا اتنين ولا تلاتة شبه بعض في تصرفاتهم و عملوا معانا نفس الموقف تقريباً .
و بعد كدة يتحول الموضوع ان كل واحد مر بتجربة يدينا دروسه المستفادة اليّ عادة مبيكونش هو شايف انه غلطان فيها او انه كان ممكن يتصرف أو يفكر بشكل تاني ، أو يبص بعين فيها اكتر شمولية و inclusion . عادة بيبص بنظرة فيها حد ضحية وحد غلطان.
التعميم مش بس غلط إجتماعي هو كمان غلط وراثي ، محدش فينا زي التاني ، محدش فينا دماغه متستفة بنفس الشكل ، البصمة الوراثية بتاعتنا مختلفة زي ما شخصياتنا مختلفة ، البني آدم اعقد حاجة في الدنيا علشان احنا مش نسخ من بعض ، لو كنا زي بعض كان طلع حد من مئات السنين والف كتاب :
How To Deal With People For Dummies
وكان زمانا عندنا manual للبشر نرجعله يقولنا نعمل ايه مع مين .
احنا مختلفين جداً و في إختلافنا رحمة و مزايا كتير.
طبعا في اوجه تشابه كتير وصفات عامة بتجمع مجموعات من الناس بس مفيش اتنين copy paste من بعض .
خلاصته بلاش نعمم ونسقط تجاربنا علي الاخرين .
اللي إتلسع من الشوربة المفروض ينفخ في الشوربة مش في الزبادي الغلبان اللي عمره ملسع حد…مش عايزين نطلع عقدنا علي ناس ممكن تكون كويسة عشان جت في حياتنا بعد ناس وحشة.
متبقاش ملسوع و كمان غبي ????
الجمعة, مارس 29, 2024
آخر الاخبار
- سلة الاتحاد السكندري تتعاقد مع صانع الألعاب الأمريكي ” مايكل ديكسون “
- دوللي شاهين تنتهي من تسجيل أغنية “ست البنات”
- ملتقى العصر بالجامع الأزهر يوضح مفهوم العبادة وخصائصها في الإسلام
- الاتحاد السكندري ينعى الكابتن فؤاد مرسى أحد نجوم الجيل الذهبي لزعيم الثغر
- بمشاركة ٤٠ عارضا و٧٥ لوحة مدير تعليم بورسعيد يفتتح معرض مدرسة الخط العربي
- برواية حفص وشعبة ورويس.. آلاف المصلين من مختلف الجنسيات يشهدون صلاة التراويح بالجامع الأزهر
- الإمام الأكبر: القرآن دفع المسلمين وشجعهم على إنارة الغرب والشرق في عهد الظلمات
- بحضور رئيس المكتب السياسي والمتحدث الرسمي … حزب العدل ينظم حفل إفطار جماعي وأمسية رمضانية بالإسكندرية