‘ الدنيا مسرح كبير ، و كل الرجال والنساء ما هم إلا لاعبون على هذا المسرح ‘
المقولة دي قالها الكاتب الكبير وليم شكسبير بس فات عليه نقطة مهمة و هي ان الرجال و النساء دول تصنيفهم يا مهندسين يا ناس عاديين .
قبل ما تزعلوا منيّ و تقولوا انيّ متحزية للمهندسين عايزة اقولكم ان واضح ان دايرتي حاطّاني في خانة المهندسين بجدارة لدرجة ان في يوم صحيت لقيت حد من اصحابي عملي tag للجملة التالية و عينكوا ما تشوف الا النور – طلعت مش لوحدي و طلعنا كتير اوي و هي جملة تمثلني جداً الصراحة بناء علي كم التعليقات و التريقة الي جاتلي ????
الجملة هي :
– ازيك يا بشمهندس فرد عليه المهندس و قاله الحمد لله يا إنسان يا عادي
حاولت مخدهاش بشكل شخصي بس مما لاشك فيه ان المهندسين مختلفين عن جموع الناس ( و بمختلفين لا اعني انهم افضل من غيرهم لأن different does not mean better ) .
علي عجالة كدة تعالوا نشوف نماذج من كلام او تصرفات المهندسين و الناس العاديين.
– لو واحد بيسأل علي عنوان او تايه و محتاج حد يساعده – لو سأل مهندس هيقوله قالولك اي علامة مميزة للمكان انما لو انسان عادي هيقوله هم قالولك فين.
– لو حد بيقول انه عيان و خد حقنة المهندس هيكون رده خدت الحقنة فين انما الأنسان العادي هيكون رده خدتها ليه او سلامتك.
– لو مجموعة اصحاب قاعدين و حد بيقترح يخرجوا مثلاً المهندسين هيقولوا امتي و فين و الناس العاديين هيقوا ماشي نضبط ان شاء الله .
– لو حد سأل المشوار من كذا لكذا عامل ايه في الزحمة لو مهندس هيقوله شوف جوجل ماپس لو انسان عادي هيكون رده خد اكتوبر هتلاقيه احسن من الدائري او العكس.
– لو واحد عايز يتصور صورة علشان يطلع فيزا و بيسأل الصورة مقاسها ايه – لو مهندس هيقوله ادخل علي صفحة سفارة البلد الي انت رايحلها و هتعرف مواصفات الصورة ايه و تقولها للمصوراتي انما الانسان العادي هيقوله لما تروح تتصور قول للمصوراتي عايزة مقاس صورة بتاعة البلد الي هتزورها هو اكيد عارف .
– لو في كوباية مية مش مليانة كلها ، الانسان العادي هيبص للجزء الفاضي او المليان و هيقول كوباية فيها شوية مية ، المهندس تفكيره هيبقي انها كوباية كلها مليانة ، جزء مية و جزء هوا
– المهندس بيسمي المباني من برة واجهات و التصميم بتاعها من فوق اسمها مساقط – الانسان العادي بيسميها شكل المبني و تقسيمته من جوة .
– المهندس بيمشي يرتب حاجات غير منطقية ، لازم الحاجات تكون متوازية علي مكتبه و الشوكة و السكينة و المعلقة منظمين و في مكانهم الصح – الأنسان العادي يهمه ياكل و مش بيفسفس في الحاجات دي.
– في بعض المهندسين بيرتبوا هدومهم بالألوان و الي مغسول الاول يتحط علي الوش و كدة ، الانسان العادي ابسط من كدة بكتير بيلبس الي قدامه .
لو مهندس او مهندسة سأل او سألت علي وصفة اكل هتلاقي الأستفسارات علي شاكلة : كوباية اللبن كام ملل و الزبدة كام جرام ، لو انسان عادي هيعتبر ان اي كوباية هتفي بالغرض و ان الأكل نفس مش مقادير و اوزان.
المهندس بيربط حاجات كتير بالأشكال الهندسية و بيكون محدد ، زي سبعاوي طه لما قال لفوزية ان الڤرندة علي شكل مربع ، و في بلكونات علي شكل متوازي مستطيلات و في منها علي شكل مسدسات – و كمل جملته : اما الأعمدة فهي عبارة عن خرسانة مسلحة و اكتر من كدة معرفش لأني مهندس ميكانيكا و مفهمش في الأسمنت المسلح .
الخلاصة : المهندس دخل هندسة و اكتسب مهارات بالأضافة الي تحصيله العلمي بس هو كمان تاعب نفسه و بيتعب الي حواليه – الأنسان العادي بيتعب الي حواليه بس انا هو مرتاح – و بتفكير هندسي من الجملة سالفة الذكر : الأنسان العادي يكسب لانه تاعب الي حواليه فقط ????
مين منكم متحيز لمهنته زيي؟ و مين شايف ان الدنيا دكاترة و ناس عادين او محاسبين و ناس عاديين و مين شايف ان كله محصل بعضه؟
#جعلوني_مهندساً
اشترك في نشرتنا الإلكترونية مجاناً
اشترك في نشرتنا الإلكترونية مجاناً.
الجمعة, أبريل 19, 2024
آخر الاخبار
- فوز فريق الاتحاد السكندرى ٢٠٠٧ على الزمالك بالقاهرة ٢-١
- رحلة لجماهير الثغر.. لمشاهدة لقاء الاتحاد السكندري و الزمالك بإستاد القاهرة
- الاتحاد السكندرى يتصدر الدوري بفارق الأهداف
- حل فزورة فريش اليوم الأحد 21 رمضان.. بلد السكر والقهوة والتبغ في الكاريبي
- بحضور 600 شخص .. نادى السلام البحرى ينظم اكبر مائدة افطار على ضفاف قناة السويس ببورسعيد
- تأجيل مباراة الاتحاد السكندرى و المصرى البورسعيد لتقام يوم الخميس 4 إبريل
- سلة الاتحاد السكندري تتعاقد مع صانع الألعاب الأمريكي ” مايكل ديكسون “
- دوللي شاهين تنتهي من تسجيل أغنية “ست البنات”